ဟာမန်သည် မော်ဒဂဲနှင့် သူ၏လူမျိုးများအား အကုန်အစင်သတ်ပစ်ရန် ပြင်ဆင်ခဲ့သည်။ ထိုအရာသည် ယနေ့ခေတ်တွင် ထင်ရှားသော (Genocide) လူမျိုးတုန်းသတ်ဖြတ်ခြင်းပင်ဖြစ်သည်။ ထိုသို့သတ်ဖြတ်ခြင်းကိုလုပ်ဆောင်လျှင် ဟာမန်အတွက် ပြဿနာတွေ့နိုင်သည်၊ လူအစုလိုက်အပြုံလိုက်သတ်မှုဖြစ်နိုင်ပေသောကြောင့် ဥပဒေနှင့် ငြိစွန်းနိုင်သည်။ ထို့ကြောင့်ဟာမန်သည် စနစ်တကျစီစဥ်ခြင်း၊ ပြင်ဆင်ခြင်းများကို သေသေချာချာလုပ်ဆောင်၍ ရှင်ဘုရင်လက်ခံစေရန် ကြံစည်ကာဆောင်ရွက်ခဲ့ပေသည်။
ထို့ကြောင့် ရှင်ဘုရင်၏ သဘောတူညီမှုရသွားသောကြောင့် ဟာမန်၏ စနစ်တကျ ဥပဒေဘောင်အတွင်းမှ အကြမ်းဖက်ခြင်းသည် မည်သူမျှအပြစ်တင်ခွင့်မရ၊ မည်သူမျှတိုင်တန်း တရားစွဲဆိုခွင့်လည်း မရကြတော့ပါ။ ထိုအရာသည် တကယ်တမ်းတော့ အဓမ္မအမှုအရာပင်ဖြစ်ချေသည် မဟုတ်ပါလား။ တနည်းဆိုရလျှင် အစီအစဥ်တကျ စနစ်တကျကြံစည်ကာ အကြမ်းဖက်ခြင်းပင်ဖြစ်ပေသည်။
ဟာမန်၏ ယုဒလူမျိုးများအားလုံးကို မတရားသတ်ဖြတ်ရန် ကြံစည်ခြင်းသည် မည်သူတစ်ခုတစ်ယောက်မျှ အလွတ်ပေးလိမ့်မည် မဟုတ်ပါ။ ကလေးဖြစ်စေ၊ လူကြီးဖြစ်စေ၊ ဆင်းရဲသား၊ သူဌေး၊ ပညာတတ်တတ် မတတ်တတ်၊ အောက်ခြေလူတန်းစားဖြစ်စေ လူတန်းစားမရွေးသကဲ့သို့၊ သူတောင်းစား၊ ဆရာဝန်၊ လေဝိ အစရှိသဖြင့် ခြွင်းချက်ဟူ၍ မရှိပါ။ မတရားမှုဟူသည် အသက်အရွယ်မရွေးသလို လူတန်းစားမရွေးဘူးဆိုသည်ကို နားလည်စရာရှိပါသည်။
ဧသတာဝတ္ထု ၄:၂-၃
လျှော်တေအဝတ်ကို ဝတ်လျက် နန်းတော်တံခါးထဲသို့ အဘယ်သူမျှ မဝင်ရသောကြောင့်၊ နန်းတော်တံခါးရှေ့မှာ ရပ်နေ၏။ ရှင်ဘုရင်အမိန့်တော်စာ ရောက်လေသော အပြည်ပြည်တို့၌ ယုဒလူတို့သည် အလွန်ညည်းတွားခြင်း၊ အစာရှောင်ခြင်း၊ ငိုကြွေးမြည်တမ်းခြင်းကို ပြု၍၊ လူများတို့သည် ပြာနှင့်လျှော်တေအဝတ်၌ အိပ်ကြ၏။
ထိုအမှုအရာကြောင့် ယုဒလူတိုင်း ဝမ်းနည်းကြေကွဲကြသည်။ ငိုကြွေးမြည်တမ်းလျက် အော်ဟစ်ကြသည်။ အစာရှောင်ခြင်း လျှော်တေအဝတ်ကိုဝတ်လျက်အိပ်ခြင်း စသဖြင့် အမျိုးမျိုးသော အမှုအရာများလုပ်ဆောင်လျက် ထိုအဓမ္မအမှုကို သဘောမတူကြောင်း ပြသခဲ့ကြပေသည် မဟုတ်ပါလား။ “အပြည်ပြည်တို့၌ ယုဒလူတို့” ဟုဆိုသောကြောင့် ယုဒလူမျိုးမှန်လျှင် အကုန်လုံးပါဝင်သည်။ ထိုအထဲတွင် လေဝိများလည်း အော်ဟစ်မြည်တမ်းကြမှာဖြစ်သလို ကလေးများလည်းပါဝင်ပေလိမ့်မည်။
လူငယ်လည်းပါသလို၊ လူကြီးလည်းပါသည် လူတိုင်းလူတိုင်းသည် လမ်းပေါ်ထွက်လျက် ငိုကြွေးမြည်တမ်းခြင်း၊ ထာဝရဘုရားကို အော်ဟစ်ခြင်း၊ အစာရှောင်ခြင်း၊ လျှော်တေဝတ်ခြင်း အမျိုးမျိုးတို့ကို တတ်နိုင်သည့်အတိုင်း အသီးသီးလုပ်ဆောင်ကြသည် မဟုတ်ပါလား။ မော်ဒဂဲသည်လည်း ထို့အတူပင်ဖြစ်ပေသည်။
“ယုဒလူမျိုးမှန်လျှင် ယုဒလူမျိုးအားလုံးအပေါ်သို့ ကျရောက်သည့် အဓမ္မမှုကြီးသည် အသက်အရွယ်ကြီးသည်ဖြစ်စေ ငယ်သည်ဖြစ်စေ ဆင်းရဲချမ်းသာ၊ လေဝိဘာညာမရွေးဘဲ လူတန်းစားမရွေး အားလုံးနှင့်ဆိုင်ပေသည်။ တနည်းဆိုရသော် နိုင်ငံ့အရေးသည် နိုင်ငံသားအားလုံးနှင့် ဆိုင်ပေသည် မဟုတ်ပါလား။”
နန်းတော်တံခါးရှေ့တွင်လည်း ရပ်လျက် ခေတ်စကားနှင့်ဆိုရလျှင်တော့ အဓမ္မအမှုကို လက်မခံကြောင်း ဆန္ဒကိုထုတ်ဖော်သကဲ့သို့ပင်ဖြစ်နေပေလိမ့်မည်။ နန်းတော်ထဲမှ မည်သူမျှလာမကယ်တင်ပါဟုပြောလျှင် ပြောနိုင်မည်ဖြစ်သော်လည်း မော်ဒဂဲသည် အဓမ္မအမှုအားလက်မခံကြောင်းကို ပြသခြင်း၊ ဘုရားသခင်အား အော်ဟစ်မြည်တမ်းခြင်း၊ ငိုကြွေးခြင်းများပင်ဖြစ်ပေသည်မဟုတ်ပါလား။ နားလည်နိုင်ဖို့ရာ ဘုရားရှင်ကောင်းကြီးရှိပါစေ။
အချို့က ကလေးများသည် နိုင်ငံရေးနားမလည်ခြင်း၊ ခံယူချက်မရှိခြင်းဟုဆိုကာ စာလုပ်ခြင်း သို့မဟုတ် စိတ်ဝင်စားသည့်အရာကိုသာ လုပ်ဆောင်လျှင် အကျိုးရှိမည်ဟု ဆိုကြသူများလည်းရှိကြသည်။ တနည်းဆိုရသော် ထိုအဓမ္မအမှုသည် ထိုကလေးများအတွက်လည်း အနာဂတ်မရှိပါ။ ကလေးဆိုသည်နှင့် ဟာမန်အလွတ်မပေးခြင်းကို နမူနာကြည့်လျှင် နားလည်နိုင်ပေလိမ့်မည်။ ထို့ကြောင့် စာလုပ်၍ ထူးချွန်သွားစေဦးတော့ အဓမ္မအမှုကြောင့် အနာဂတ်မရှိသည့် ကလေးများ၏ဘဝသည် အသတ်ခံရမှာပင်ဖြစ်သောကြောင့် ဘာမျှမထူးပါ။
ဟာမန်၏အကြံအစည်သည် ယုဒလူမျိုးများအားလုံးအား လူမျိုးတုံးသတ်ဖြတ်ရန်ဖြစ်သဖြင့် ကလေးဟူ၍ အလွတ်ပေးမည်မဟုတ်သကဲ့သို့ လေဝိဟူ၍လည်း အလျှော့ပေးမည်မဟုတ်သည်ကိုတော့ နားလည်နိုင်ဖို့ရာ ဘုရားရှင်ကောင်းကြီးရှိပါစေ။ ဟာမန်ပြုရန်ကြံစည်သော ထိုအမှုအရာကို ကျွန်ုပ်တို့သည် ဆင်ခြင်ရင်း အဓမ္မမှု၊ မတရားမှုတို့မည်သည် လူမျိုးမရွေး၊ ဘာသာမရွေး၊ လူကြီးလူငယ်မရွေး၊ လူတန်းစားမရွေးဘူးဆိုသည်ကို နားလည်ရပါသည်။ ထိုအဓမ္မအမှုအား မော်ဒဂဲ၊ ယုဒလူမျိုးများ၏ ဖြေရှင်းခြင်းကို ဆင်ခြင်နှလုံးသွင်းလျှက် အားယူကာ ရှေ့ကိုဆက်ကြပါစို့။
ဘုရားရှင်ဆက်လက်စကားပြောပါစေ။
ယခုဆောင်းပါးသည် မူရင်းစာရေးသူ ဆရာ Titus Kyaw Nyi နှင့် λόγος ၏ မူပိုင်စာမူဖြစ်ပြီး ရေးသားသူ၏ ဘုရားသခင့်အမှုတော်မြတ်အတွက် ကြိုးစားအားထုတ်မှုကို လေးစားတန်ဖိုးထားကြောင်း ပြသသည့်အနေဖြင့် လျော်ကန်သော ချီးကျူးဂုဏ်ပြုမှု (appropriate credit) မပေးဘဲ အခြားနေရာများ၌ စာသားများအား ကူးယူဖော်ပြခြင်း၊ စီးပွါးဖြစ်ထုတ်ဝေကာ ရောင်းဝယ်ဖောက်ကားခြင်းများ မပြုလုပ်ကြပါရန် မေတ္တာရပ်ခံပါသည်။ ကြိုက်နှစ်သက်ပါက မူရင်း website link ကို ဖော်ပြပေးကာ ထပ်ဆင့်ဖြန့်ဝေပေးခြင်းအားဖြင့် ကျွန်ုပ်တို့၏ အမှုတော်မြတ်လုပ်ငန်းကို ပံ့ပိုးကူညီနိုင်ပါသည်။ အသေးစိတ်သိရှိလိုပါက λόγος ၏ “အသုံးပြုခြင်းဆိုင်ရာ သတ်မှတ်ချက်များ” တွင် ဖတ်ရှုလေ့လာပါ။