နာဗုတ်၏ ပိုင်ဆိုင်သော စပျစ်ဥယျာဥ်ကို ရှင်ဘုရင်အာဟပ်သည် အင်မတန်မျက်စိကျသဖြင့် ရောင်းရန်တောင်းဆိုခဲ့သည်။ ထိုဥယျာဥ်သည် နန်းတော်နားတွင်ရှိသဖြင့် ရှင်ဘုရင်အင်မတန်မှ လိုချင်လေသည်။ ထိုဥယျာဥ်ကို ပေးလျှင် သာ၍ကောင်းသောဥယျာဥ်ကိုပေးမည် သို့မဟုတ် ထိုအတွက် အခကြေးငွေကိုပေးမည်ဟုပင်ဆိုသည်။
သို့သော် နာဗုတ်သည် သူ၏ ဘိုးဘွားပိုင်စပျစ်ဥယျာဥ်ဖြစ်သောကြောင့် မရောင်းနိုင်ကြောင်းပြောဆိုကာ ငြင်းလေသည်။ ထိုအတွက် ရှင်ဘုရင်အာဟပ်သည် မအိပ်မစား မရွှင်မပျဖြစ်ကာ အလိုမကျဖြစ်နေပေတော့သည်။ ထို့သို့ဖြစ်နေသည်ကို မြင်သော သူ၏ခင်ပွန်း ယေဇဗေလသည် အကျိုးအကြောင်းကို မေး၍ သိသောအခါတွင် သူပြင်ဆင်လေတော့သည်။
“အာဟပ်မင်း၏ အခွင့်နှင့်စာရေး၍ တံဆိပ်တော်နှင့်ခတ်ပြီးမှ၊ နာဗုတ်နေရာမြို့၌ သူနှင့်အတူနေသော အသက်ကြီးသူနှင့် မှူးမတ်များထံသို့” ပို့ဆောင်သည်။ ထိုစာထဲတွင် ပါသောအကြောင်းအရာများမှာ သူတို့၏ အကြံအစည်၊ မတရားသိမ်းယူရန် မဟာဗျူဟာများပင်ဖြစ်ချေသည် မဟုတ်ပါလား။
တနည်းဆိုရလျှင် ထိုအရာသည် စနစ်တကျအစီအစဥ်ဆွဲ၍ကြံစည်ကာ ပြင်ဆင်သော အကြမ်းဖက်ခြင်း “Structural Violence” ဟုလည်းခေါ်ပေသည်။ သူ၏အစီအစဥ်မှာ အစာရှောင်ရာနေ့ကို ကြေညာစေပြီးလျှင် အဓမ္မလူနှစ်ဦးကို ထား၍ လူများရှေ့တွင် နာဗုတ်သည် ထာဝရဘုရားနှင့် ရှင်ဘုရင်ကိုစွန့်ပယ်ပြီဟု မမှန်သောသက်သေကိုလည်း ခံစေပြီး နာဗုတ်အား ကျောက်ခဲနှင့်ပေါက်သတ်စေခဲ့ပေသည်။
ကျွန်တော်တို့မသိမသာ လုပ်ဆောင်မိလေ့ရှိကြသော စနစ်တကျအကြံအစည်တို့သည် လူမသေစေသော်လည်း “Structural Violence” ဘက်သို့ရောက်နေပါသလား။ မိမိရာထူးအတွက်၊ စည်းစိမ်၊ ဂုဏ်၊ အာဏာ၊ အခြားအခြားသော တပ်မက်ခြင်းအမျိုးမျိုးအတွက် သူတပါးကို လှေကားထစ်သဖွယ်လုပ်ကာ မတရားနင်း၍ အဓမ္မလမ်းစဥ်ဖြင့် မတရားမှုကိုစနစ်တကျကြံစည်မိလျှင် ထိုအရာတို့သည် အစီအစဥ်တကျအကြမ်းဖက်ခြင်းဖြစ်နေသလား၊ သို့မဟုတ် သမ္မာအာဇီဝဖြင့် ဓမ္မလမ်းစဥ်ကျပါရဲ့လားဆိုတာကိုလည်း ယနေ့ဆင်ခြင်ကြပါစို့။
ဓမ္မရာဇဝင် တတိယစောင် ၂၁:၁၉
ထာဝရဘုရား မိန့်တော်မူသည်ကား၊ သင်သည် လူအသက်ကိုသတ်၍ သူ့ဥစ္စာကို သိမ်းယူပြီလော။ တစ်ဖန် မိန့်တော်မူသည်ကား၊ ခွေးတို့သည် နာဗုတ်အသွေးကို လျက်သောအရပ်၌ သင့်အသွေးကိုပင် လျက်ကြလိမ့်မည်ဟု မိန့်တော်မူကြောင်းကို ဆင့်ဆိုလော့ဟု မှာထားတော်မူ၏။
ထိုအမှုအရာအတွက် ဧလိယအား ထောက်ပြပြောဆိုရန် ထာဝရဘုရားစေလွှတ်ခဲ့သည်။ အာဟပ်သည် ရှင်ဘုရင်ဖြစ်သော်လည်း ဧလိယ ဂရုမစိုက်ခဲ့။ ပြောရမည့်သတင်းစကား၊ ထောက်ပြရမည့်အရာကိုသာ ပြတ်သားစွာ ပြောဆိုပေသည်။ “လူ့အသတ်ကိုသတ်ပြီး သူတပါးဥစ္စာကို သိမ်းယူပြီလား၊ ခွေးတွေ နာဗုတ်သွေးကိုလျက်တဲ့အရပ်မှာ မင်းရဲ့သွေးကိုလည်း ခွေးတွေလျက်ကြလိမ့်မယ်” စသဖြင့် မျက်နှာမထောက်ဘဲ ပြောသည်ကိုလည်းတွေ့ရသည်။
သက်ဦးစံပိုင်ရှင်ဘုရင်၊ လက်ညှိုးညွှန်ရာ ရွှေဖြစ်ပြီး သတ်ချင်သောသူကို သတ်နိုင်သော လက်ရှိအာဏာတော်တည်ရာဘုရင်ဖြစ်သော်လည်း ဂရုမစိုက်ဘဲ အဓမ္မအရာကိုဖော်ပြခိုင်းသော ထာဝရဘုရား၏အမိန့်တော်ကိုသာ ဧလိယ လိုက်နာခဲ့သည်။ အဓမ္မလမ်းစဥ်နှင့် သိမ်းယူထားသော နာဗုတ်၏စပျစ်ဥယျဥ်အကြောင်းသည် သာမာန်အတိုင်းဖတ်သွားလျှင် မသိသာသော်လည်း စနစ်တကျတွေးခေါ်ကြည့်မည်ဆိုလျှင် ကြံစည်သူမှာ တစ်ဦး၊ လုပ်ဆောင်သူမှာတစ်ဦး၊ အကောင်အထည်ဖော်သူတို့သည် တစ်ဦးဖြစ်သော်လည်း အာဟပ်ဘာမျှမလုပ်ပါ။ တံဆိပ်တော်ကိုထု၍ စာရေးသူမှာလည်း သူမဟုတ်ချေ။ အာဟတ်၏ အလိုဆန္ဒမှာတော့ ထိုအရာကို လိုချင်နေသည်၊ ဘယ်လိုနည်းဖြင့် ရပါစေဟုပင် သူတွေးပေလိမ့်မည်။ ထို့ကြောင့် ထိုသူတို့ကို အခွင့်ပေး၍ လုပ်ဆောင်စေသည်ဆိုလျှင်လည်း မမှားချေ။
သို့သော် ထိုသို့မတွေးဘဲ အာဟပ်သည် နာဗုတ်သေစေမည့်ကိုအရာကိုသိသည်ဖြစ်စေ မသိသည်ဖြစ်စေ မတရားယူမည့်အစီအစဥ်ကိုတော့ သိသည်။ မတရားမှုကိုသိသော်လည်း ကိုယ်ကျိုးစီးပွားအတွက် နှုတ်ဆိတ်နေခြင်းသည် အလိုတူ၊ အလိုပါဖြစ်နေသည်ဟုပင် ဆိုနိုင်ပေသည် မဟုတ်ပါလား။ မတရားသောအမှု၊ အဓမ္မအမှုတို့ကို ကိုယ်တိုင်မလုပ်၊ အစီအစဥ်မဆွဲသော်လည်း နှုတ်ဆိတ်နေခြင်းသည်ပင်လျှင် အတူတကွဒုစရိုက်ကိုလုပ်ဆောင်ခြင်းဖြစ်ပေလိမ့်မည်။
အချုပ်အားဖြင့်ဆိုရသော် အချို့သောသူတို့သည် ကိုယ်ကျိုးအတွက်သော်လည်းကောင်း စီးပွားရေးအတွက်သော်လည်းကောင်း မတရားမှုကို သိသော်လည်း ဆွေမျိုးမကင်း၍ နှုတ်ဆိတ်နေကြသည်၊ အချို့တို့သည် မတရားမှုကို မသိချင်ယောင်ဆောင်ကြသည်၊ အချို့တို့သည် မဆိုင်သလိုနေတတ်ကြသည်၊ သို့သော် မတရားမှုကို မတရားမှုမှန်းသိလျက်နှင့် နှုတ်ဆိတ်နေခြင်း ရပ်တန့်ရန် မပြောဆိုခြင်းတို့သည် ထိုသူတို့နှင့်အတူတကွ မတရားမှုကိုကျူးလွန်ခြင်း သို့မဟုတ် ထိုမတရားမှုကို အားပေးအားမြှောက်လုပ်ခြင်း “Corporate Evil” ဖြစ်နေကြခြင်းပင် ဖြစ်ပေတော့သည်။
ဘုရားရှင်ဆက်လက်စကားပြောပါစေ။
ယခုဆောင်းပါးသည် မူရင်းစာရေးသူ ဆရာ Titus Kyaw Nyi နှင့် λόγος ၏ မူပိုင်စာမူဖြစ်ပြီး ရေးသားသူ၏ ဘုရားသခင့်အမှုတော်မြတ်အတွက် ကြိုးစားအားထုတ်မှုကို လေးစားတန်ဖိုးထားကြောင်း ပြသသည့်အနေဖြင့် လျော်ကန်သော ချီးကျူးဂုဏ်ပြုမှု (appropriate credit) မပေးဘဲ အခြားနေရာများ၌ စာသားများအား ကူးယူဖော်ပြခြင်း၊ စီးပွါးဖြစ်ထုတ်ဝေကာ ရောင်းဝယ်ဖောက်ကားခြင်းများ မပြုလုပ်ကြပါရန် မေတ္တာရပ်ခံပါသည်။ ကြိုက်နှစ်သက်ပါက မူရင်း website link ကို ဖော်ပြပေးကာ ထပ်ဆင့်ဖြန့်ဝေပေးခြင်းအားဖြင့် ကျွန်ုပ်တို့၏ အမှုတော်မြတ်လုပ်ငန်းကို ပံ့ပိုးကူညီနိုင်ပါသည်။ အသေးစိတ်သိရှိလိုပါက λόγος ၏ “အသုံးပြုခြင်းဆိုင်ရာ သတ်မှတ်ချက်များ” တွင် ဖတ်ရှုလေ့လာပါ။