အသည်းရောင် “ဘီ” ပိုးရောဂါ ကုထုံး

“အသည်းရောင်အသားဝါ ဘီပိုးအကြောင်း သိကောင်းစရာများ” နှင့် “အသည်းရောင် ဘီပိုး ရှိ/မရှိနှင့် ဆေးကုသမှု လို/မလို စမ်းသပ် စစ်ဆေးခြင်းများ” အကြောင်းဖော်ပြခဲ့ပြီး ဖြစ်ပါသည်။ ဤဆောင်းပါးတွင် အသည်းရောင်အသားဝါ ဘီပိုးကူးစက်ခဲ့ရသောသူများအား ဆေးကုသရာတွင် အသုံးပြုသော ကုထုံးများကို ဖော်ပြထားပါသည်။

ဆေးကုသရာတွင် သောက်ဆေးနှင့် ထိုးဆေးဟူ၍ နှစ်မျိုးရှိသည်။

(၁) သောက်ဆေး (Nucleos (t)ide analogues)

• Tenofovir Alafenamide Fumerate 25mg(TAF)

• Tenofovir Disoproxil Fumerate 300mg (TDF)

• Entecavir 0.5 mg or 1mg

တစ်နေ့တစ်လုံး နေ့စဉ်မှန်မှန်သောက်သုံးရန် လိုအပ်ပါသည်။ နှစ်ရှည်လများ ကုသရပြီး ဆေးယဉ်မှုများရှိနိုင်ပါသည်။ ဆေးစသောက်ပြီး(၆)လအကြာတွင် HBV DNA ပိုးကောင်ရေ မကျပါက ဆေးထိရောက်မှု မရှိပါ။ (၆) လကြာတိုင်း HBV DNA စစ်ရပါမည်။ ဆေးကုသနေစဉ် ပိုးကောင်ရေတက်လာပါက ဆေးယဉ်ပါးမှု (Resistance) ဖြစ်ပါသည်။ ဆေးတစ်မျိုးပြောင်းရမည် (သို့) ဆေးထပ်ပေါင်းရမည်။ (၆) လတစ်ခါ HBV DNA ပြန်စစ်ရပါမည်။

ဆေးစွမ်းထက်၍လည်းကောင်း၊ ဆေးယဉ်ပါးမှုနည်း၍လည်းကောင်း၊ Entecavir သို့မဟုတ် Tenofovir ကို first choice အနေဖြင့်သုံးကြပါသည်။ ဤဆေးများကို တစ်နေ့တစ်လုံး ပုံမှန်သောက်ခြင်းအားဖြင့် ပိုးကောင်ရေကို လုံးဝ(သို့)အနည်းငယ်အထိ ချထားနိုင်ပါ၍ မိမိကိုယ်တိုင်တွင် ရောဂါမတိုးလာနိုင်ခြင်း၊ အသည်းခြောက်ခြင်း၊ အသည်းကင်ဆာဖြစ်ခြင်းတို့မှ ကာကွယ်ပေးနိုင်ပါသည်။

အထက်ပါစားဆေးများသောက်လျှင် ကျောက်ကပ်စစ်ဆေးမှုများ ပြုလုပ်ရပါသည်။ကျောက်ကပ်ရောဂါရှိသူများတွင် ကျောက်ကပ်ရောဂါဆိုးမှု အလိုက် Entecavir နှင့် Tenofovirတို့ လျော့ရပါသည်။ (၁) ပတ်လျှင် (၆) ရက်၊ (၁) ပတ်လျှင် (၃) ရက်၊ (၁) ပတ်လျှင် (၂) ရက်၊ (၁) ပတ်လျှင် (၁) ရက်မျှသာ စသည်ဖြင့် သောက်ရန်ညွှန်းရပါသည်။ TDF(300 mg) ကိုရေရှည်သောက်လျှင် အရိုးပွရောဂါရတတ်သည်။ TAF(25 mg) သည် ကျောက်ကပ်ထိခိုက်မှုနှင့် အရိုးပွရောဂါဖြစ်မှုကို လျော့ကျစေပါသည်။ Tenofovir ကို ဘီပိုးကောင်ရေများသော ကိုယ်ဝန်ဆောင်မိခင်များတွင် (၂၄–၂၈) ပတ်မှစ၍ ပေးခြင်းအားဖြင့် ကလေးသို့ ရောဂါပိုးကူးစက်ခြင်းကို ကာကွယ်နိုင်ပါသည်။