မြည်တမ်းခြင်း "၅၅"

ဒါဝိဒ်၏ ဘဝ၌ အင်မတန်နာကျင်ခံစားခဲ့ရသည့် အချိန်ကာလများစွာရှိခဲ့သည့်အထဲ၌ “၅၅” ခုမြောက်သော ဆာလံသည် အနာကျင်ရဆုံးများထဲမှ ဒုတိယတစ်ခု ဖြစ်လိမ့်မည်ဟု ကျွန်ုပ်ယူဆမိသည်။ အဘယ့်ကြောင့်ဆိုသော် ဤဆာလံသည် လူယုံတစ်ဦး၏ သစ္စာဖောက်ခြင်း တနည်းဆိုရသော် ဒါဝိဒ်၏ နောက်ကျောအား ဓါးဖြင့်ထိုးခြင်းကြောင့် မြည်တမ်းလေခြင်း ဟုဆိုလေရော့မလား … သားဖြစ်သူပုန်ကုန်ခြင်းကြောင့် နာကျင်ရပါသော်လည်း လူယုံကြောင့် မိအေးနှစ်ခါနာ ဖြစ်ရခြင်းပင် … ကျွန်ုပ်တို့၏ ဘဝတွင်လည်း ဤကဲ့သို့သောအဖြစ်များကြောင့် နာကျင်ရလွန်းသည့် ကာလတစ်ခုကို ကြုံတွေ့ရနိုင်ပါသည်။ (၂ရာ ၁၅ ကိုကြည့်လျှင် အဟိသောဖေလ ဟုယူဆရသည်။)

ဆာလံကျမ်း ၅၅:၁၂
ငါ့ကို ကဲ့ရဲ့သောသူသည် ငါ့ရန်သူမဟုတ်။ ဟုတ်လျှင် သည်းခံနိုင်၏။ ငါ့ကို ရန်ဘက်ပြုသောသူသည် ငါ့ကိုမုန်းသောသူ မဟုတ်။ ဟုတ်လျှင် ထိုသူကို ငါရှောင်နိုင်၏။

မိမိနောက်ကွယ်မှ အတင်းပြောဆိုခံရခြင်း၊ မိသားစု၏ သစ္စာဖောက်ခံရခြင်း၊ အပေါင်းအသင်း၏ နောက်ကျောမှ ဓါးဖြင့်ထိုးခံရခြင်း စသဖြင့် မိမိအား ရှုံ့ချခြင်း၊ အထင်သေးစေခြင်းများကြောင့် စိတ်ပျက်ကာ နာကျင်စေရခြင်းသည် တစ်ကြိမ်တစ်ခါတော့ အနည်းဆုံးကြုံတွေ့ရတတ်ပေသည်။ ထိုသို့သောအခြေအနေများကြောင့် အထင်သေးခံရခြင်း၊ လူများ၏ အမြင်၌ အဆင်မပြေရခြင်း၊ တဖက်သတ်ပြောစကားများကြောင့် အထင်အမြင်လွဲသွားစေခြင်းတို့သည် မိတ်ဆွေနှင့် ကျွန်တော်တို့၏ ဘဝအသက်တာ၌ ဖြစ်ပျက်တတ်သည် မဟုတ်ပါလား (“Fremenies” ကဲ့သို့သော လူမျိုးထဲမှာ သင်နှင့်ကျွန်ုပ်မပါပါစေနှင့်။ သင်နှင့်ကျွန်ုပ်သည် ထိုသူမျိုးမဖြစ်ပါစေနှင့်) … ထို့ကြောင့် ယခုဆာလံအား ကျွန်ုပ်တို့ခံစားနေရသည့် ထိုကဲ့သို့သော အခြေအနေများအတွက် “Counselling” ရှုထောင့်မှ ခွန်အားယူကြပါစို့။

ထိုအခြေအနေတို့သည် နာကျင်ရမည် မှန်ပါသည်။ အဘယ့်ကြောင့်ဆိုသော် ထိုသို့သောသူသည် အခြားသူ မဟုတ် … ဒါဝိဒ်၏ စကားဖြင့် ပြောရမည်ဆိုလျှင် “ငါ့ကို ကဲ့ရဲ့သောသူသည် ငါ့ရန်သူမဟုတ်” ဟုဆိုရနိုင်သကဲ့သို့ “ငါနှင့် ဘက်သောသူ၊ ငါ့မိတ်ဆွေ၊ ငါအသိအကျွမ်း” ပင် … ထိုသူသည် မိမိ၏ မိတ်ဆွေ၊ အပေါင်းအသင်း၊ အခင်မင်ရဆုံးသော သူငယ်ချင်း၊ မိသားစုများထဲမှ တစ်ဦးဦး၊ ဇနီး၊ ယောကျာ်း၊ ချစ်ရသူတစ်ဦးဦး၊ အလုပ်ရှင်၊ အလုပ်သမား၊ အတူတကွ လုပ်ဆောင်သူ၊ ကျောင်းနေဘက်၊ အမှုတော်ဆောင်ချင်း၊ အိမ်နီးချင်း၊ မိမိလေးစားရသော ဆရာ၊ ဆရာမ စသဖြင့် မည်သူမဆို ဖြစ်နေတတ်ပေသည်။

ဤအခြေအနေတို့သည် အင်မတန် နာကျင်ရလွန်းသဖြင့် ဒါဝိဒ်ကြီးပင်လျှင် ချိုးငှက်၏ အတောင်ပံကို တောင့်တကာ အဝေးသို့သာ ပြေးထွက်သွားချင်ကြောင်းကို တွေ့မြင်ရသည်။ မိတ်ဆွေနှင့် ကျွန်တော်တို့အတွက် ထိုအခြေအနေတို့သည် ထပ်တူများ ဖြစ်နေလေမလား …

သို့သော်လည်း ဤအခြေအနေသည် ဒါဝိဒ်အတွက် နာကျင်ရလွန်းသော်လည်း ဘုရားသခင်ကိုသာ မျက်နှာမူစေခဲ့သကဲ့သို့ ဘုရားသခင်ကိုသာ ကိုးစားစေခဲ့သည်။ ထိုမှတဆင့် နာကျင်ရသည့်ကြားမှ လူကို ဖြေရှင်းနေခြင်းထက် ဘုရားသခင်ကိုသာ တိုင်တည်ခြင်း၊ ဟစ်ကြော်ခြင်း၊ ဆုတောင်းခြင်း၊ ကိုးစားခြင်းနှင့် ယုံကြည်ခြင်းတို့ကို မြင်တွေ့ခဲ့ရသည် မဟုတ်ပါလား။ ဤသည်မှာပင်လျှင် ချိုးငှက်၏ အတောင်ပံနှင့် တောအရပ်၌ နေရာကျခြင်းထက် ဒါဝိဒ်ကြီးအား သက်သာရာရစေခဲ့သည်။

ဆာလံကျမ်း ၅၅:၁၆
ငါမူကား၊ ဘုရားသခင်ကို ပတ္ထနာပြု၍၊ ထာဝရဘုရားသည် ကယ်တင်တော်မူမည်။

ရန်သူမဟုတ်သူ၏ မိမိအား ထိုးနှက်ချက်တိုင်းသည် နာကျင်ခဲ့ရသည်။ ထိုအခြေအနေတို့အား ပြန်လည်တွေးတောမိခြင်းတိုင်းသည်လည်း အမြဲတစေပြန်လည် နာကျင်လာစေတတ်သည်မှာတော့ အမှန်ပင်ဖြစ်သကဲ့သို့ ထိုသူ၏ ထိုလုပ်ရပ်များအား ပြန်လည် တွေးတောမိသည့် သို့မဟုတ် စိတ်ထဲ၌ ပြန်လည်ပေါ်ပေါက်လာသည့် အချိန်တိုင်းသည်လည်း မိမိအား အကြိမ်ကြိမ် ဆွဲချကာ ဖြိုလှဲနေမည်မှာလည်း အမှန်ပါ … “သူ၏စကားသည် ဆီထက်ပျော့သော်လည်း၊ ထုတ်သောဓား ဖြစ်၏” ဟုဆိုသကဲ့သို့ပင် …

ထိုသို့သော အချိန်တိုင်း၌ဖြစ်စေ၊ ချိုးငှက်၏ အတောင်ပံအား တမ်းတမိသည့်အချိန်တိုင်း၌ဖြစ်စေ၊ မိတ်ဆွေ၏ သစ္စာဖောက်ခြင်းကြောင့်ဖြစ်စေ စသဖြင့် နာကျင်နေရလျှင်လည်း ဤဆာလံအား ပြန်လည် ဖတ်ရှုကာ ဆင်ခြင်နှလုံးသွင်း ခွန်အားယူဖို့ရန် တိုက်တွန်းပါရစေ။ ထို့ကြောင့် မိတ်ဆွေနှင့် ကျွန်ုပ်တို့အသက်တာအတွက် ထိုဖြစ်ရပ်တို့သည် နာကျင်ရပါသော်လည်း “အကျွန်ုပ်မူကား၊ ကိုယ်တော်၌ ခိုလှုံပါမည်” ဟူသော ဤဆာလံအဆုံး၌ပါရှိသည့် ဒါဝိဒ်၏ ပြောစကားကို ဆင်ခြင်ရင်း … ဤလေးလွန်းလှသည့် ဝန်များအား ထာဝရဘုရား၌သာ အပ်ကာ ဆုတောင်းပဌနာပြုလျက် ကိုယ်တော်၌သာ ခိုလှုံရင်း ထိုဘုရားသခင်အား “၅၅” ခုမြောက်သော ဆာလံအားဖြင့် မြည်တမ်းကြပါစို့။

ဘုရားရှင်ဆက်လက်စကားပြောပါစေ။

⚠️ Gentle Reminder:

ယခုဆောင်းပါးသည် မူရင်းစာရေးသူ ဆရာ Titus Kyaw Nyi နှင့် λόγος ၏ မူပိုင်စာမူဖြစ်ပြီး ရေးသားသူ၏ ဘုရားသခင့်အမှုတော်မြတ်အတွက် ကြိုးစားအားထုတ်မှုကို လေးစားတန်ဖိုးထားကြောင်း ပြသသည့်အနေဖြင့် လျော်ကန်သော ချီးကျူးဂုဏ်ပြုမှု (appropriate credit) မပေးဘဲ အခြားနေရာများ၌ စာသားများအား ကူးယူဖော်ပြခြင်း၊ စီးပွါးဖြစ်ထုတ်ဝေကာ ရောင်းဝယ်ဖောက်ကားခြင်းများ မပြုလုပ်ကြပါရန် မေတ္တာရပ်ခံပါသည်။ ကြိုက်နှစ်သက်ပါက မူရင်း website link ကို ဖော်ပြပေးကာ ထပ်ဆင့်ဖြန့်ဝေပေးခြင်းအားဖြင့် ကျွန်ုပ်တို့၏ အမှုတော်မြတ်လုပ်ငန်းကို ပံ့ပိုးကူညီနိုင်ပါသည်။ အသေးစိတ်သိရှိလိုပါက λόγος ၏ “အသုံးပြုခြင်းဆိုင်ရာ သတ်မှတ်ချက်များ” တွင် ဖတ်ရှုလေ့လာပါ။

မြည်တမ်းခြင်း “၅၅”