ငါတို့သည် သင်တို့ကဲ့သို့

တမန်တော်ဝတ္ထုတွင် ရှင်ပေါလုနှင့် ဗာနဗတို့အား လူအများ၏ အမြင်တွင် နတ်ဘုရားသဖွယ် ထင်မှတ်မိကြသည့် အဖြစ်အပျက်တစ်ခုရှိခဲ့ဖူးသည်။ အကြောင်းမှာ လုတ္တရမြို့တွင် ခြေမစွမ်းသူတစ်ဦး၏ ကျန်းမာခြင်းရသွားသည်ကို ရှင်ပေါလု၏ အစွမ်းကြောင့်ဟု ယူဆကြဟန်တူပေသည်။

“နတ်ဘုရားတို့သည် လူယောင်ဆောင်၍” ဟူသည့်အချက်သည် ထိုလူအများတို့၏ စိတ်နှလုံးအတွင်း၌ အစွမ်းတန်ခိုးကိုသာ မျှော်လင့်ခြင်းကြောင့်များလား၊ မိရိုးဖလာ နတ်ကိုးကွယ်မှုကြောင့်များလား၊  သို့တည်းမဟုတ် ထိုမြို့၏ ယဥ်ကျေးမှု ဓလေ့ထုံးနန်းလွှမ်းမိုးမှုများကြောင့်ပင်လား …

ပေါလု၏ သာ၍ဟောပြောခြင်းများကြောင့် “သူ့ကို ဟေရမဟူ၍ ၎င်း၊ ဗာနဗကိုဇုသဟူ၍၎င်း” ဟုတွေ့ရခြင်းသည်လည်း ထိုသူတို့၏ စိတ်နှလုံးထဲတွင် ပေါလုနှင့် ဗာနဗတို့သည် သူတို့ထက် ထူးမြတ်သူများ၊ နတ်ဘုရားဝင်စားသူများ၊ လူယောင်ဆောင်ထားသူများ၊ ဂရိနတ်ဘုရားများဟုပင် မှတ်ယူလိုက်ကြသည့်ပုံပင် မဟုတ်ပါလား။ ဤနေရာမှာတင် မရပ်ကြသေးဘဲ … တဆက်တည်းမှာပင် ဇုသ၏ ယဇ်ပရောဟိတ်ဆိုသူသည်လည်း လူအစုအဝေးနှင့်အတူ ပူဇော်မှုပြုရန်ပင် ပြင်ဆင်လျက်နေကြသည်ကို တွေ့ရပေသည်။

သို့နှင့် ထိုသတင်းစကားကို ကြားသည်နှင့် ဗာနဗနှင့် ပေါလုသည် အဝတ်ကိုဆုတ်ကာ ထိုလူစုများထဲသို့ ပြေးဝင်လျက် ယနေ့ထက်တိုင် သတိထားရမည့် စကားတစ်ခွန်းကို ဆိုခဲ့လေသည်။ ဤသည်ကို ကြည့်ခြင်းဖြင့် တမန်တော်တို့သည် ဂုဏ်ဆာသူများ၊ အမြှောက်ကြိုက်သူများ၊ အောက်ခြေလွတ်တတ်သူများ မဟုတ်ဘဲ ဘုရားသခင်ကိုသာ ဘုန်းပေးအပ်သူများဖြစ်ကြောင်းကို သင်ယူရစေသည်။

တမန်တော် ဝတ္ထု ၁၄:၁၅
အချင်းလူတို့၊ အဘယ်ကြောင့် ဤသို့ပြုကြသနည်း။ ငါတို့သည် သင်တို့ကဲ့သို့ လောကဓံတရား၌ ကျင်လည်သောသူဖြစ်ပါ၏။ သင်တို့သည် ဤအချည်းနှီးသောအရာတို့ကို ပယ်ကြ၍၊ ကောင်းကင်၊ မြေကြီး၊ သမုဒ္ဒရာမှစ၍၊ အသက်ရှင်တော်မူသော ဘုရားသခင့်ထံတော်သို့ ပြောင်းလဲရကြမည်အကြောင်း၊ ငါတို့သည် ဧဝံဂေလိတရားကိုဟောပြောကြ၏။

တခါတရံတွင် ကျွန်တော်တို့၏ အမြင်တွင် ဆရာသမားများသည် သာ၍ ဘိသိက်ရှိသည် သာ၍ ကောင်းမြတ်သည်ဟု ယူဆမိတတ်ကြသည်။ မိမိတို့မှာတော့ လောကအလုပ်ကိုသာ လုပ်နေရ၍ ဘိသိက်သိပ်မရှိဘဲ ထိုသူများသည်တော့ သာ၍အဆင့်မြင့်သည်ဟု ယူဆကာ သင်းအုပ်ဆရာ ဘိသိဘ်၊ အချိန်ပြည့် အမှုတော်ဆောင် ဘိသိက် စသဖြင့် ခွဲခြားကာ သာ၍ ဘိသိက်ပြည့်ဝသူများ၊ သာ၍ ကြီးမြတ်သူများဟုပင် ယူဆတတ်ကြပေသည်။ ရှင်ပေါလုတို့၏ သတိပေးစကားဖြစ်သည့် “ငါတို့သည် သင်တို့ကဲ့သို့ လောကဓံတရား၌ ကျင်လည်သောသူ” ဟူသည့် စကားသည် ယနေ့ထက်တိုင် သတိထားစရာလည်းဖြစ်ပါသည်။ ဤသို့ဆိုသဖြင့် ဆရာသမားများအား မလေးစားရဟု ဆိုခြင်းမဟုတ်သည်ကိုတော့ နားလည်နိုင်ဖို့ရာ ဘုရားရှင်ကောင်းကြီးရှိပါစေ။

ကျွန်ုပ်တို့သည် သူ့နေရာနှင့်သူ၊ ကိုယ့်နေရာနှင့်ကိုယ် မိမိတို့၏ ဆုကျေးဇူးများအလိုက် ဘုရားသခင်၏ ခွဲခန့်မှတ်သားထားသော နေရာများတွင် တာဝန်ကျေပွန်စွာ ထမ်းဆောင်နေကြသော အင်္ဂါချင်းများပင် … ဤသည်မှာ ခရစ်တော်၏ ကိုယ်ခန္ဓာဖြစ်သော အသင်းတော်အတွက်လည်းဖြစ်သည့်နည်းတူ တလုံးတဝတည်းဖြစ်ခြင်း၏ အနှစ်သာရ “Unity” မှာလည်း ကျွန်ုပ်တို့၏ ယုံကြည်သူအစုအဝေးဖြစ်သည့် အသင်းတော် “The Church” (Greek အခေါ်အရ “ecclesia”) ဖြစ်ခြင်းပင် မဟုတ်ပါလား …

ထို့ကြောင့် သမ္မာကျမ်းစာတွင်တွေ့ရသော “လူအချို့တို့ကို တမန်တော်အရာ၌၎င်း၊ အချို့ကို ပရောဖက်အရာ၌၎င်း၊ အချို့ကို သာသနာပြုအရာ၌၎င်း၊ အချို့တို့ကို သင်းအုပ်ဆရာ၊ ဆရာအရာ၌၎င်း” ဟူသည့် နေရာအလိုက်၊ ဆုကျေးဇူးအသီးသီးအလိုက် ခွဲခန့်မှတ်သားခြင်းတို့သည် “The Body of Christ” လည်းဖြစ်၊ ယုံကြည်သူအစုအဝေးလည်းဖြစ်သည့် အသင်းတော် “The Church” ကို တည်ဆောက်ရန်သာဖြစ်ကာ သင်းအုပ်များ၊ ဆရာသမားများ၊ အချိန်ပြည့်အမှုတော်ဆောင်များသည် ဘိသိက်ပိုရခြင်း၊ သာ၍ မြတ်ခြင်း၊ အဆင့်အတန်းပိုမြင့်ခြင်းမျိုး၊ သာ၍ ကောင်းကြီးခံစားရခြင်းမျိုး မဟုတ်ကြဘဲ ရှင်ပေါလုတို့၏ သတိပေးစကားနည်းတူ “ငါတို့သည် သင်တို့ကဲ့သို့” လောကဓံတရား၌ ကျင်လည်သောသူများပင်ဖြစ်ပါကြောင်း …..

ဘုရားရှင်ဆက်လက်စကားပြောပါစေ။