အသင်းတော်ဟာဆေးရုံဆိုလျှင်

နာမကျန်းဖြစ်နေတဲ့ လူနာကို ကုသတဲ့အခါ “ဆေး” ကို လိုအပ်သလို “ဆေးသမား(တနည်း) ဆရာဝန်” ကိုလည်း လိုအပ်ပါတယ်။ ဆရာဝန်ကသာ မိမိလူနာခံစားနေရတဲ့ ရောဂါနဲ့ ထိုရောဂါကို ပျောက်ကင်းအောင် “ဆေး”ကို အသုံးပြုပြီး ကုသပေးတာဖြစ်ပါတယ်။ ဆေးရုံတရုံမှာ “ဆေး”တွေပဲ ရှိပြီး “ဆရာဝန်” မရှိရင်လည်း သဘာဝမကျပါဘူး။ ဆေးပဲရှိပြီး ဆရာဝန်မရှိတဲ့အခါ လူနာက မိမိထင်သလို တွေ့ကရာ “ဆေး”တွေကို ရမ်းသမ်း ပြီးသောက်လို့မရပါဘူး။ ပို၍တောင် အန္တရာယ်ဖြစ်စေပါလိမ့်မယ်။

ထို့အတူ အသင်းတော်မှာ “နှုတ်ကပတ်တော်” ရှိရမှာ ဖြစ်သလို “နှုတ်ကပတ်တော်ကို သန့်ရှင်းသောဝိညာဥ် တော်ရဲ့ လမ်းပြမှုနဲ့အညီ သွန်သင်ပေးမယ့် အမှုတော်ဆောင် ဆရာများ” လည်း ရှိဖို့လိုအပ်ပါတယ်။ ဒါကြောင့်မို့လို့ အောက်ပါကျမ်းစကားအတိုင်း ယုံကြည်သူတွေဟာ နှုတ်ကပတ်တော်ကို ခံယူတဲ့အခါ ဝိညာဥ်တော်လမ်းပြမှု နဲ့ အညီသွန်သင်ပေးမယ့် ဆရာများ လိုအပ်ပါတယ်။

“သင်တို့အမှုကို စောင့်၍၊ ခရစ်တော်ထံ၌ သစ္စာရှိသော ဆရာတည်းဟူသော ငါတို့ချစ်သော ကျွန်ချင်း ဧပဖြသည် သင်တို့ကို သွန်သင်သည်အတိုင်း သင်တို့သည် ကြား၍၊ ဘုရားသခင်၏ ကျေးဇူးတော်ကို မှန်ကန်စွာ ဝန်ခံသောနေ့မှစ၍ ထိုသို့သောအကျိုးရှိ၏။”
(ကောလောသဲ ၁ : ၇)

ထိုသို့မဟုတ်ဘဲ၊ မိမိ၏ အသွေးအသားတပ်မက်သည့်အလျောက် နှုတ်ကပတ်တော်အား မှားယွင်းစွာဝန်ခံမိပါက အကျိုးယုတ်စရာအကြောင်းရှိပါလိမ့်မယ်။
ဆေးနဲ့ ဆေးဆရာ အပိုင်းပြီးသွားတဲ့အခါ နောက်ထပ်အရေးကြီးတဲ့ အပိုင်းအချို့ကျန်ပါသေးတယ်။ ဆေးရုံမှာ ဆေးလည်းရှိတယ်၊ ရှိတဲ့ဆေးကလည်း စစ်မှန်တယ်၊ ဆေးကုပေးမယ့် ဆရာလည်း ရှိတယ်ဆိုပေမယ့်

+ လူနာကိုကုသပေးတာတွေ ကောင်းတဲ့ဆေးကို ညွှန်းပေးတာတွေ စသဖြင့် ဆရာဝန်က ကုသပေးတဲ့အရာတွေ အထဲမှာ ပို၍အရေးကြီးတဲ့ အရာတခု ကျန်ပါသေး တယ်။ ဒါကတော့ “ချစ်ခြင်းမေတ္တာ” ပါပဲ။ မိမိလူနာကို ကုသပေးနေတဲ့ ဆေးဆရာဟာ မိမိလူနာ အပေါ် ချစ်တဲ့စိတ်နှင့် ကုသပေးခြင်းဟာ အလွန်ပဲအရေးကြီးပါတယ်။ သို့ပေမယ့်လည်း အချို့သော ငွေရမှ ဂရုစိုက်တတ်တဲ့ အသပြာဆရာဝန်တွေလို လူနာရဲ့မျက်နှာကိုတောင် သေချာမကြည့်ဘဲ ကုပေးနေတဲ့ ပုံစံမျိုးကတော့ အလွန်ပဲဝမ်းနည်းစရာကောင်းပါတယ်။

+ ထို့နည်းတူ အသင်းတော်မှာလည်း ဝိညာဥ်ရေးရာ မကျန်းမာတဲ့သူတွေ အပေါ် နှုတ်ကပတ်တော်ဆေးနဲ့ ကုသပေးတဲ့အခါမှာ ဆရာတွေ အနေနဲ့ လောကီ အသပြာဆရာဝန်တွေလို လူနာရွေးကုတာမျိုး။ ဆယ်ဖို့တဖို့အများကြီး ပေးတဲ့ အသင်းသား၊ ကားနဲ့လာခေါ်ပေးတဲ့ အသင်းသား၊ လစဥ်အလှူငွေ ပုံမှန်ပေးနိုင်တဲ့ အသင်းသား၊ စတဲ့ အသင်းသားတွေ အပေါ်မှာပဲ ဂရုတစိုက်ပေးတာမျိုး၊ အင်တာနက် ပေါ်တင်ပြီး ဟောတဲ့တရားဟောချက်ကိုတောင် Member ဝင်ကြေး အနည်းအများအလိုက် ပေးရပြီး ဝင်ကြေးမပေး နိုင်သူ က Sermon ရဲ့ တချို့တဝက်ပဲနားထောင်၊ ပုံမှန်ဝင်ကြေးပေးတဲ့သူဆို အစအဆုံးနားထောင်၊ ဝင်ကြေးအများကြီး ပေးထားတဲ့ member ဆိုရင်တော့ Sermon လည်းအစအဆုံးနားထောင်၊ ပြီးတော့လည်း Bonus အနေနဲ့လည်းဆရာ ကိုယ်တိုင်က တိုက်ရိုက်ဆုတောင်းပေး၊ ဆရာနဲ့တိုက်ရိုက် မိသဟာရဖွဲ့လိုရ) စတဲ့ ‌လောကီစီးပွားရေး သမားတွေ သူတို့ရဲ့ Product တွေကို Customer level ခွဲပြီး ရောင်းချတဲ့ပုံစံမျိုးတွေကိုတွေ့နေရပါတယ်။ ဒီလိုမျိုး ပြုမူခြင်းဟာ ခရစ်တော်ရဲ့ ကယ်တင်ခြင်း‌ကျေးဇူးတရား သတင်းကောင်းကို “ခရစ်ယာန်တွေရဲ့ ထုတ်ကုန် တခုပုံစံမျိုး” အခယူပြီး Promote လုပ်နေခြင်းဟာ အသင်းတော်က လောကီပုံသဏ္ဍာန်ကို အတုယူနေခြင်း သာဖြစ်ပြီး ထိုကဲ့သို့ လုပ်နေတဲ့ ဆရာတွေကတော့ ဝိညာဥ်ရေးရာအသပြာဆရာဝန်တွေပါပဲ။