ယုံကြည်ခြင်းမျိုးစေ့

ခရစ်ယာန်တစ်ယောက်ရဲ့ အခြေခံအုတ်မြစ်ဟာ “ယုံကြည်ခြင်း” ဖြစ်ပါတယ်။ အဲ့ဒါကြောင့် ခရစ်ယာန်တွေကို “ယုံကြည်သူ” တွေလို့ ခေါ်ဆိုကြပါတယ်။ “ယုံကြည်ခြင်း” သည် ဘုရားသခင်ထံမှ ရရှိသော “ကျေးဇူးတော်” ဖြစ်ပါတယ်။ ယုံကြည်ခြင်းကို အနီးစပ်ဆုံး ဥပမာ ပေးရရင်

နိုင်ငံခြားကို လေယာဉ်နဲ့ ခရီးသွားမယ် ဆိုကြပါစို့။ 

ဦးစွာ ပထမ အနေနဲ့ online ကနေသော်၎င်း၊ Agent ကနေတစ်ဆင့်သော်၎င်း air ticket booking လုပ်ရပါမယ်။ သွားမယ့် နေ့ရောက်ရင် check in ဝင်ရပါမယ်။ Immigration ဖြတ်ရပါမယ်။ အနည်းဆုံး အထက်ပါ အကြောင်းအရာတွေကို နားလည်သိထားရပါမယ်။

ဒါပေမဲ့ ကျွန်တော်တို့ လေယာဉ် အင်ဂျင် အလုပ်လုပ်ပုံကို မသိသလို လေယာဉ်လည်း မမောင်းတတ်ကြပါဘူး။ ကမ္ဘာမြေကြီး ဆွဲအားကို ဆန့်ကျင်ပြီး လေယာဉ်ကို လေပေါ်ပင့်တင်ပေးထားနိုင်တဲ့ aerodynamic အကြောင်းလည်း နားမလည်ကြပါဘူး။

ထိုအရာတွေကို နားမလည်ပေမဲ့ ကျွန်တော်တို့ သွားမယ့် နေရာကို ပို့ပေးနိုင်မယ်လို့ “ယုံကြည်ပြီး” လေယာဉ်‌ပေါ်လိုက်ပါစီးနင်းကြပါတယ်။ အဓိက ကတော့ ယုံကြည်ခြင်းရှိလို့ လေယာဉ်ကို လိုက်ပါစီးနင်းရဲတာဖြစ်တယ်။ လေယာဉ်အင်ဂျင်အလုပ်လုပ်ပုံ နားလည်မှ၊ လေယာဉ်‌မောင်းတတ်မှ သွားမယ်ဆိုရင် ကျွန်တော်တို့ သွားချင်တဲ့ နေရာကို ရောက်ဖို့ ဘယ်လောက်အချိန်ယူရမလဲ။

မိမိကိုယ်ကို အားကိုးပြီး ခြေလျင် သွားကြမှာလား။ ထိုနည်းတူစွာပင်၊ ဓမ္မဟောင်းကာလယုံကြည်သူတွေဟာ ဓမ္မဟောင်းခေတ်မှာ ထာဝရဘုရားသခင်ကိုယ်တော်တိုင်က ပရောဖက်များမှတဆင့် ကိုယ်တော်၏တည်ရှိမှုအကြောင်းနှင့် ဘုရားသခင်၏သဘောသဘာဝကြောင်းသိခွင့်ရခဲ့ကြသလို ဓမ္မသစ်ခေတ်မှာ သခင်ခရစ်တော်အားဖြင့် တမန်တော်မြတ်ကြီးတွေကတစ်ဆင့်  ဘုရားသခင်ဆီရောက်နိုင်မယ့်လမ်းအကြောင်း သိခွင့်ရကြတယ်။ ဘာကြောင့် ယုံကြည်ခြင်းက အခြေခံအုတ်မြစ်ဖြစ်တယ်လို့ပြောရတာလဲဆိုရင် ကျွန်တော်တို့လူသားတွေရဲ့ အသိဉာဏ်က limitation ဆိုတဲ့ ကန့်သတ်ချက်ရှိလို့ဖြစ်ပါတယ်။ ဥပမာအနေနဲ့ ဆေးပညာရပ်ကို လေ့လာသူတစ်‌ယောက်က အင်ဂျင်နီယာ ဘာသာရပ်ကို နားမလည်နိုင်ဘူး။  ဆေးပညာကိုလေ့လာတဲ့ ဆရာဝန်တစ်ယောက်မှာတောင် limitation ရှိပါတယ်။ နှလုံးအထူးကု ရွေးမလား၊ သားဖွားမီးယပ်လား၊ အရိုးအကြောအထူးကုလား များစွာရှိတဲ့အထဲက တစ်ခုပဲ ရွေးပြီးလေ့လာရပါတယ်။

ဘုရားသခင်က လူသားအားလုံးကို တစ်မျိုးစီ ကန့်သတ်ချက်လေးတွေ (limited) နဲ့ ကောင်းချီးပေးထားသလို လွတ်လပ်စွာ ရွေးချယ်ခွင့်၊ အသုံးပြုခွင့်လည်း ပေးထားပါတယ်။

ဘုရားသခင်ပေးထားတဲ့ အရာကို ကောင်းမွန်စွာအသုံးချဖို့ကိုလည်း ဘုရားသခင် အလိုတော်ရှိပါတယ်။ ရွေးချယ်မှုနဲ့ အသုံးချမှုက မိမိ တာဝန်ပါ။

ကျွန်တော်တို့ ဖန်ဆင်းခံ လူသားတွေ အနေနဲ့ စကြဝဠာအရာအားလုံးကို ဖန်ဆင်းတော်မူတဲ့ ထာဝရဘုရားသခင်အကြောင်း အကုန်သိရှိနားလည်ဖို့ဆိုတာ မဖြစ်နိုင်တဲ့ ကိစ္စပါ။

ကျွန်တော်တို့ရဲ့ အသိဉာဏ်နဲ့ ဘယ်လိုမှ နားမလည်နိုင်ပါဘူး။ သန့်ရှင်းသောဝိညာဉ်တော်၏ ကျေးဇူးတော်အားဖြင့်သာ ဘုရားသခင်အကြောင်း သိရှိနားလည်ရသောအခွင့်ကို ရရှိခြင်းဖြစ်ပါတယ်။

ဘုရားသခင်အကြောင်း အကုန်သိရှိနားလည်မှ ကိုးကွယ်ချီးမွမ်းမယ်ဆိုရင် ဘယ်အချိန်မှ ကိုးကွယ် ချီးမွမ်းမှာလဲ။ ဘုရားသခင်အကြောင်းနဲ့ ဘုရားသခင် ဖန်ဆင်းတော်မူတဲ့ နက်နဲသောအရာများကို သိရှိနားလည်ဖို့ဆိုရင် အခြေခံအုတ်မြစ်ဖြစ်တဲ့ ယုံကြည်ခြင်း ရှိဖို့လိုအပ်ပါတယ်။

ခရစ်ယာန်တွေဟာ သခင်ခရစ်တော်အားဖြင့် ထာဝရအသက်ရရှိပြီး ဘုရားသခင်နိုင်ငံကို ရောက်ရှိမယ်ဆိုတာ အကြွင်းမဲ့ ယုံကြည်ကြပါတယ်။ ဒါပေမဲ့ ခရစ်တော်ကို ယုံကြည်ရင် ‌ဘုရားသခင်နိုင်ငံကို ရောက်မှာလား။ အထက်မှာ ပြောခဲ့သလို လေယာဉ်တစ်စီးက သွားချင်တဲ့နေရာကို ပို့ဆောင်ပေးနိုင်တယ်ဆိုတာ ယုံကြည်ပြီး လိုက်ပါစီးနင်းကြတယ်။ လေယာဉ်ပေါ်မတက်ခင်မှာ လုပ်ဆောင်ရမယ့် အရာတွေ ရှိပါတယ်။ အဲ့ဒါတွေလုပ်ဆောင်ပြီးမှသာ လေယာဉ်ပေါ်လိုက်ပါစီးနင်းခွင့် ရရှိမှာပါ။ ထိုနည်းတူစွာပင် သခင်ခရစ်တော်ကို ယုံကြည်ခြင်းအားဖြင့် ထာဝရ အသက်ရရှိဖို့ နဲ့ ဘုရားသခင်နိုင်ငံတော်ကို ရောက်ရှိဖို့ လုပ်ဆောင်ရမယ့် အရာတွေရှိပါတယ်။ 

လေယာဉ်နဲ့အတူ သွားချင်တဲ့နေရာရောက်ဖို့ လေယာဉ်ပေါ်မတက်ခင် passport ရှိရပါမယ်။

ခရစ်တော်ကို ယုံကြည်ခြင်းအားဖြင့် ဘုရားသခင်နိုင်ငံကို ရောက်ရှိဖို့ ဗတ္တိဇံ ( ဆေးကြောခြင်း / နှစ်ခြင်း ) ခံရပါမယ်။  ဗတ္တိဇံခံခြင်း (Water Baptism) က ဘုရားသခင်နိုင်ငံတော် ဝင်နိုင်ဖို့ ပတ်စ်ပို့ (passport) ပါပဲ။

‘သင်​တို့​သည် လော​ကီ​နိုင်​ငံ​အ​ရပ်​ရပ် ရှိ​သ​မျှ​သို့​သွား၍၊ ဝေ​နေ​ယျ​သ​တ္တ​ဝါ အ​ပေါင်း​တို့​အား ဧ​ဝံ​ဂေ​လိ​တ​ရား​ကို ဟော​ကြ​လော့။- ယုံ​ကြည်၍ ဗ​တ္တိ​ဇံ​ကို​ခံ​သော​သူ​သည် ကယ်​တင်​တော်​မူ​ခြင်း​သို့ ရောက်​လ​တ္တံ့။ မ​ယုံ​ကြည်​သော​သူ​မူ​ကား အ​ပြစ်​စီ​ရင်​ခြင်း​ကို ခံ​ရ​လ​တ္တံ့။- ‘

ရှင်မာကု 16:15-16

‘ယေ​ရှု​က​လည်း၊ ရေ​နှင့် ဝိ​ညာဉ်​တော် မ​မွေး​သော​သူ​မည်​သည်​ကား၊ ဘု​ရား​သ​ခင်၏​နိုင်​ငံ​တော်​သို့ မ​ဝင်​ရ​ဟု ငါ​အ​မှန်​အ​ကန်​ဆို၏။– ထို​နောက်​မှ ယေ​ရှု​သည် တ​ပည့်​တော်​တို့​နှင့်​အ​တူ ယု​ဒ​ပြည်၏​ကျေး​လက်​သို့ ကြွ​တော်​မူ​လျှင်၊ ထို​အ​ရပ်၌ တ​ပည့်​တော်​တို့​နှင့်​တ​ကွ နေ​တော်​မူ၍ ဗ​တ္တိ​ဇံ​ကို ပေး​လေ၏။– ‘

ရှင်ယောဟန် 3:5,22

‘ပေ​တ​ရု​က​လည်း၊ သင်​တို့၏​အ​ပြစ်​ကို​လွတ်​စေ​ခြင်း​ငှာ နောင်​တ​ရ၍ တစ်​ယောက်​မျှ​မ​ကြွင်း၊ ယေ​ရှု​ခ​ရစ်၏​နာ​မ၌ ဗ​တ္တိ​ဇံ​ကို​ခံ​ကြ​လော့။ သို့​ပြု​လျှင် သန့်​ရှင်း​သော ဝိ​ညာဉ်​တော်​တည်း​ဟူ​သော ဆု​ကျေး​ဇူး​တော်​ကို ခံ​ရ​ကြ​လိမ့်​မည်။- ‘

တမန်တော် 2:38

‘သင်​တို့​သွား၍ လူ​မျိုး​တ​ကာ​တို့​ကို ငါ့​တ​ပည့် ဖြစ်​စေ​လျက်၊ ခ​မည်း​တော်၊ သား​တော်၊ သန့်​ရှင်း​သော​ဝိ​ညာဉ်​တော်၏​နာ​မ၌ ဗ​တ္တိ​ဇံ​ကို ပေး​ကြ​လော့။- ငါ​သည် သင်​တို့​အား ပေး​သ​မျှ​သော ပ​ညတ်​တော်​တို့​ကို စောင့်​ရှောက်​စေ​ခြင်း​ငှာ ဆုံး​မ​ဩ​ဝါ​ဒ​ပေး​ကြ​လော့။ ငါ​သည်​လည်း ကပ်​က​မ္ဘာ​ကုန်​သည်​တိုင်​အောင် သင်​တို့​နှင့်​အ​တူ အ​စဉ်​မ​ပြတ် ရှိ​သည်​ဟု တ​ပည့်​တော်​တို့​အား မိန့်​တော်​မူ၏။ ရှင်​မဿဲ​ခ​ရစ်​ဝင်​ပြီး၏။’

ရှင်မာသေဦး (ခေါ်) ရှင်မဿဲ 28:19-20

ဗတ္တိဇံခံပြီးနောက် ခရစ်ယာန်တစ်ယောက်ဖြစ်လာရင် ခရစ်ယာန်အသက်တာမှာ အရေးကြီးဆုံးဖြစ်တဲ့ ဝိညာဉ်တော်ကို ထိခိုက်ပြစ်မှားတဲ့ အပြစ်မလုပ်မိဖို့ လိုအပ်သလို ဘုရားသခင်အလိုတော်ရှိတဲ့အတိုင်း သခင်ခရစ်တော်နဲ့သဏ္ဍန်တူသော မွန်မြတ်သန့်ရှင်း စင်ကြယ်သည့် အသစ်သောအသက်တာ၌ ကျင်လည် အသက်ရှင်ဖို့လည်း လိုအပ်ပါတယ်။ 

‘ထို​ကြောင့် ငါ​ဆို​သည်​ကား၊ ပြစ်​မှား​သော​အ​ပြစ်၊ ဘု​ရား​ကို ကဲ့​ရဲ့​သော​အ​ပြစ်​အ​မျိုး​မျိုး​တို့​နှင့် လွတ်​စေ​ခြင်း​အ​ခွင့်​ကို လူ​တို့​သည် ရ​နိုင်​ကြ၏။ ဝိ​ညာဉ်​တော်​ကို ကဲ့​ရဲ့​သော​အ​ပြစ်​နှင့် လွတ်​စေ​ခြင်း​အ​ခွင့်​ကို လူ​တို့​သည် မ​ရ​နိုင်​ကြ။- လူ​သား​ကို နှုတ်​ဖြင့်​ပြစ်​မှား​သော​သူ၏​အ​ပြစ်​ကို​လည်း လွှတ်​နိုင်၏။ သန့်​ရှင်း​သော​ဝိ​ညာဉ်​တော်​ကို နှုတ်​ဖြင့် ပြစ်​မှား​သော​သူ၏​အ​ပြစ်​ကို ယ​ခု​ဘ​ဝ​နောင်​ဘ​ဝ၌ မ​လွှတ်​နိုင်။- ‘

ရှင်မာသေဦး (ခေါ်) ရှင်မဿဲ 12:31-32

‘ယေ​ရှု​ခ​ရစ်၌ ဗ​တ္တိ​ဇံ​ကို​ခံ​သော​သူ​ရှိ​သ​မျှ​တို့​သည် အ​သေ​ခံ​တော်​မူ​ခြင်း၌ ဗ​တ္တိ​ဇံ​ကို​ခံ​ကြ​သည်​ဟု သင်​တို့ မ​သိ​သ​လော။- ထို​ကြောင့်၊ အ​သေ​ခံ​တော်​မူ​ခြင်း၌ ဗ​တ္တိ​ဇံ​ကို ခံ​သော​အား​ဖြင့်၊ ထို​သ​ခင်​နှင့်​အ​တူ သင်္ဂြိုဟ်​ခြင်း​ကို ခံ​ကြ၏။ အ​ကြောင်း​မူ​ကား၊ ခ​ရစ်​တော်​သည် ခ​မည်း​တော်၏ ဘုန်း​တန်​ခိုး​အား​ဖြင့် သေ​ခြင်း​မှ ထ​မြောက်​တော်​မူ​သည်​နည်း​တူ၊ ငါ​တို့​သည်​လည်း အ​သစ်​သော​အ​သက်၌ ကျင်​လည်​ရ​ကြ​သ​တည်း။- ‘

ရောမ 6:3-4

‘ထို​သို့​သော ဥ​ပ​မာ​အ​တိုင်း၊ ယ​ခု​တွင် ဗ​တ္တိ​ဇံ​သည် ယေ​ရှု​ခ​ရစ် ထ​မြောက်​တော်​မူ​သော​အား​ဖြင့်၊ ငါ​တို့​ကို ကယ်​တင်​တတ်၏။ ဗ​တ္တိ​ဇံ​ဟု​ဆို​သော်၊ ကိုယ်​ကာ​ယ၏ အ​ညစ်​အ​ကြေး ဆေး​ကြော​ခြင်း​ကို မ​ဆို​လို။ ကိုယ်​ကို​ကိုယ်​သိ​သော​စိတ် ကြည်​လင်၍၊ ဘု​ရား​သ​ခင့်​ရှေ့၌ ဝန်​ခံ​ခြင်း​ကို ဆို​လို​သ​တည်း။- ‘

၁ ရှင်ပေတရု 3:21

လေကြောင်းလိုင်းတွေမှာ စည်းကမ်းချက်တွေရှိသလို စည်းကမ်းချိုးဖောက်ရင် လေယဉ်ပေါ်တက်ခွင့်မရပါဘူး။ ဘုရားသခင်နိုင်ငံဝင်ဖို့အတွက်လည်း ပညတ်တော်တွေ လိုက်နာရပါမယ်။ အပြစ်ဒုစရိုက်တွေ ရှောင်ရပါမယ်။

ဒီနေရာမှာ စာဖတ်သူ မယုံကြည်သူဓမ္မမိတ်ဆွေအနေနဲ့ မေးခွန်းတစ်ခုမေးနိုင်ပါတယ်။

သခင်ခရစ်တော်ကို ယုံကြည်ပြီး အပြစ်ဒုစရိုက် ကျူးလွန်နေရင်ကော ဘုရားသခင်နိုင်ငံ ရောက်နိုင်ပါသလား။

အဖြေကတော့ ခရစ်တော်ကို ယုံကြည်သူတွေဟာ အပြစ်မလုပ်မိအောင်နေကြသလို အပြစ်ဒုစရိုက်မှ လွတ်ကင်းစေဖို့ ဘုရားသခင်ဆီမှာ ဆုတောင်းကြပါတယ်။ အပြစ်ဒုစရိုက်မှာ ပျော်မွေ့နေတာ၊ နောင်တရခြင်းအလျင်းမရှိဘဲ ရည်ရွယ်ချက်ရှိရှိ ဆက်တိုက်ကျူးလွန်သူတွေဟာ အစကတည်းကကို ယုံကြည်သူ အစစ်အမှန် မဟုတ်ခဲ့နိုင်ပါဘူး။ စစ်မှန်တဲ့ ယုံကြည်သူတယောက်ကလည်း သူယုံကြည်ကိုးကွယ်တဲ့အရှင်ကို ချစ်မြတ်နိုးပြီး ထိုသခင်မြတ်ရဲ့စကားတော်တွေကို အမြဲနာခံလိုက်လျှောက်ဖို့ ကြိုးစားအားထုတ်ပါလိမ့်မယ်။ 

မယုံကြည်သူ ဓမ္မမိတ်ဆွေအနေနဲ့ yes or no အဖြေပဲ ပေးပါဆိုရင်တော့ 

ခရစ်တော်ကိုယ်တိုင် ပြောထားတဲ့ ကျမ်းပိုဒ်ကို ဖတ်ကြည့်ပေးပါ။

‘သ​ခင်၊ သ​ခင်​ဟု ငါ့​ကို​လျှောက်​သော​သူ​တိုင်း ကောင်း​ကင်​နိုင်​ငံ​တော်​သို့ ဝင်​ရ​လိမ့်​မည်​မ​ဟုတ်။ ကောင်း​ကင်​ဘုံ၌ ရှိ​တော်​မူ​သော ငါ့​ခ​မည်း​တော်၏​အ​လို​ကို ဆောင်​သော​သူ​သာ​လျှင် ဝင်​ရ​လိမ့်​မည်။- ထို​နေ့၌​ကား၊ သ​ခင်၊ သ​ခင်၊ အ​ကျွန်ုပ်​တို့​သည် ကိုယ်​တော်​အ​ခွင့်​နှင့် ဆုံး​မ​ဩ​ဝါ​ဒ​ပေး​ပါ​ပြီ မ​ဟုတ်​လော။ ကိုယ်​တော်​အ​ခွင့်​နှင့် နတ်​ဆိုး​တို့​ကို နှင်​ထုတ်​ပါ​ပြီ မ​ဟုတ်​လော။ ကိုယ်​တော်​အ​ခွင့်​နှင့် များ​စွာ​သော တန်​ခိုး​တို့​ကို ပြ​ပါ​ပြီ​မ​ဟုတ်​လော​ဟု အ​များ​သော သူ​တို့​သည် လျှောက်​ကြ​လိမ့်​မည်။- ထို​သို့​လျှောက်​ကြ​သော​အ​ခါ သင်​တို့​ကို ငါ​အ​လျှင်း​မ​သိ၊ အ​ဓ​မ္မ​အ​မှု​ကို ပြု​သော​သူ​တို့၊ ငါ့​ထံ​မှ ဖယ်​ကြ​ဟု ထို​သူ​တို့​အား အ​တည့်​အ​လင်း ငါ​ပြော​မည်။- အ​ကြင်​သူ​သည် ငါ​ဟော​ပြော​သော ဤ​စ​ကား​ကို ကြား၍​နား​ထောင်၏။ ထို​သူ​သည် ကျောက်​ပေါ်​မှာ အိမ်​ဆောက်​သော ပ​ညာ​ရှိ​နှင့် တူ​ကြောင်း​ကို ငါ​ပုံ​ပြ​မည်။- မိုး​ရွာ၍ ရေ​စီး​သည်​နှင့် လေ​လာ၍ ထို​အိမ်​ကို တိုက်​သည်​ရှိ​သော်၊ ကျောက်​ပေါ်​မှာ တည်​သော​ကြောင့် မ​ပြို​မ​လဲ​နေ၏။- အ​ကြင်​သူ​သည် ငါ​ဟော​ပြော​သော ဤ​စ​ကား​ကို​ကြား၍ နား​မ​ထောင်​ဘဲ​နေ၏။ ထို​သူ​သည် သဲ​ပေါ်​မှာ အိမ်​ဆောက်​သော လူ​မိုက်​နှင့်​တူ​ကြောင်း​ကို ငါ​ပုံ​ပြ​မည်။- မိုး​ရွာ၍ ရေ​စီး​သည်​နှင့် လေ​လာ၍ ထို​အိမ်​ကို တိုက်​သော​အ​ခါ၊ ကြီး​စွာ​သော ပြို​လဲ​ခြင်း​သို့ ရောက်​လေ​သည်​ဟု ဟော​တော်​မူ၏။- ‘

ရှင်မာသေဦး (ခေါ်) ရှင်မဿဲ 7:21-27

ဒါဆို ယုံကြည်သူ ဖြစ်ပြီးသွားရင် ဘယ်တော့မှ အပြစ်မလုပ်တော့ဘူးတဲ့လား။ တကယ်လို့ အပြစ်ကျူးလွန်မိရင်ရော? အဲ့အတွက်အဖြေကို ဒီမှာ ပေးထားပါတယ်။

‘ဘု​ရား​သ​ခင်​သည် အ​လင်း၌​ရှိ​တော်​မူ​သ​ကဲ့​သို့၊ ငါ​တို့​သည် အ​လင်း၌​ကျင်​လည်​လျှင်၊ အ​ချင်း​ချင်း မိတ်​သ​ဟာ​ယ​ဖွဲ့​ခြင်း ရှိ​ကြ​သည်​ဖြစ်၍၊ ဘု​ရား​သ​ခင်၏​သား​တော် ယေ​ရှု​ခ​ရစ်၏ အ​သွေး​တော်​သည်၊ ငါ​တို့​အ​ပြစ်​ရှိ​သ​မျှ​ကို ဆေး​ကြော​တော်​မူ၏။- ကိုယ်​အ​ပြစ်​မ​ရှိ​ဟု ငါ​တို့​သည်​ဆို​လျှင်၊ ကိုယ်​ကို​ကိုယ် လှည့်​ဖြား​ကြ၏။ ငါ​တို့၌ သ​စ္စာ​တ​ရား​မ​ရှိ။- ကိုယ်​အ​ပြစ်​တို့​ကို ဖော်​ပြ​တောင်း​ပန်​လျှင်၊ ငါ​တို့​အ​ပြစ်​များ​ကို​လွှတ်၍ ဒု​စ​ရိုက်​ရှိ​သ​မျှ​နှင့် ကင်း​စင်​စေ​ခြင်း​ငှာ ဘု​ရား​သ​ခင်​သည် သ​စ္စာ​တ​ရား​နှင့်​လည်း​ကောင်း၊ ဖြောင့်​မတ်​ခြင်း​တ​ရား​နှင့်​လည်း​ကောင်း ပြည့်​စုံ​တော်​မူ၏။- ဒု​စ​ရိုက်​ကို​မ​ပြု​ပြီ​ဟု ငါ​တို့​သည်​ဆို​လျှင်၊ ဘု​ရား​သ​ခင်​ကို မု​သား​အ​ပြစ်​တင်​ကြ၏။ နှုတ်​က​ပတ်​တော်​လည်း ငါ​တို့၌​မ​ရှိ။’

၁ ရှင်ယောဟန် 1:7-10

အပြစ်ကျူးလွန်မိရင် ဘုရားသခင်ကို အားနာသောစိတ်ဖြင့် စစ်မှန်သောနောင်တရပြီး မိမိအပြစ်တွေကို ဘုရားသခင့်ရှေ့တော်မှာ ဝန်ချတောင်းပန်ပါ။ ထိုသို့ နောင်တရလျက် ဝန်ချတောင်းပန်ရင် သခင်ယေ​ဇူးခ​ရစ်၏ အ​သွေး​တော်​မြတ်သည် ကျွန်ုပ်​တို့​အ​ပြစ်​ရှိ​သ​မျှ​ကို ဆေး​ကြော​တော်​မူပြီး အပြစ်ဖြေလွှတ်ပေးမယ်လို့ ကတိတော်ရှိပါတယ်။ ထိုကဲ့သို့သော အပြစ်ဝန်ချတောင်းပန်/အာပတ်ဖြေခြင်း စက္ကရမင်တူး (Sacrament) ထားပေးထားခြင်းကိုက ဘုရားသခင်ရဲ့ “ကျေးဇူးတော်” သက်သက်ပဲ ဖြစ်ပါတယ်။

ဒီစာသည် ယုံကြည်ခြင်းအကြောင်းပြောသည့်စာဖြစ်လို့ “ယုံကြည်ခြင်း” အကြောင်းကို ဆက်သွားပါမယ်။ လောကီရေးရာ ကိစ္စများတွင်လည်း ယုံကြည်ခြင်းသည် အရေးပါသော အရာတစ်ခုဖြစ်ပါတယ်။ အိမ်ထောင်တစ်ခုတွင် တစ်ဦးပေါ်တစ်ဦး ယုံကြည်မှုရှိဖို့ လိုအပ်ပါတယ်။

ယုံကြည်မှု အားနည်းရင် တစ်ဦးပေါ် တစ်ဦး အပြစ်မြင်ပြီး အိမ်ထောင်ရေးသာယာမှာ မဟုတ်ပါ။

ထို့အတူ လုပ်ငန်းကိစ္စများတွင်လည်း လူတစ်ဦးပေါ်တစ်ဦး ယုံကြည်မှုရှိရန် လိုအပ်ပါတယ်။ ယုံကြည်မှု အားနည်းလျှင် အပြစ်မြင်လာပြီး လုပ်ငန်းအောင်မြင်မှု ရရှိရန် ခက်ခဲလှပါတယ်။ ခရစ်ယာန်တစ်ယောက်သည် ယုံကြည်ခြင်းအားနည်းရင် အပြစ်ဒုစရိုက်သွေးဆောင်ခြင်းနောက်သို့ လိုက်ပါပြီး ဘုရားသခင်နှင့် ဝေးကွာပြီး ပျက်စီးခြင်းသို့ ရောက်ပါလိမ့်မယ်။ ယုံကြည်ခြင်းကိုရရှိရန် မိမိရဲ့ နှိမ့်ချသော စိတ်နှလုံးဖြင့် ဘုရားသခင်ထံမှ တောင်းခံခြင်းအားဖြင့် ယုံကြည်ခြင်းကျေးဇူးတော် ရရှိနိုင်ပါတယ်။

စာဖတ်သူ မိတ်ဆွေအနေနဲ့ မယုံကြည်သူဖြစ်ပါက စိတ်နှလုံးနှိမ့်ချစွာဖြင့် “ခမည်းတော်၊ သားတော် သန့်ရှင်းသောဝိညာဉ်တော်” ပုဂ္ဂိုလ်သုံးပါး ဘုရားတဆူတည်းသော ထာဝရဘုရားထံ ယုံကြည်ခြင်း ရရှိရန် တောင်းခံကြည့်ပါ။ အသက်ရှင်သော ခရစ်တော်ကယ်တင်ရှင်ဘုရားသည် သင့်နှလုံးကို တို့ထိပြီး ယုံကြည်ခြင်းကျေးဇူးကို ပေးအပ်ပါလိမ့်မယ်။ စမ်းသပ်ဖို့ တောင်းခံခြင်းထက် နှိမ့်ချသောစိတ်နဲ့ တောင်းခံခြင်းက ပို၍ပြည့်စုံခြင်းကို ရပါလိမ့်မယ်။

ယုံကြည်ခြင်းကို အားနည်းစေသောအရာသည် သံသယစိတ် ဖြစ်ပါတယ်။ ဒါကြောင့် ဤစာကိုဖတ်သူ မယုံကြည်သူမိတ်ဆွေများအနေနဲ့ မည်သည့် အကြောင်းအရာနှင့်ပတ်သတ်၍ ယုံကြည်ခြင်းအပေါ် သံသယ ဖြစ်နေသလဲ။

ထိုအရာများကို သိရှိဖို့အတွက် မိမိဉာဏ်နဲ့ နားလည်ရန် ကြိုးစားနေခြင်းက အချင်းအနှီးဖြစ်နေပါလိမ့်မယ်။

ထိုနက်နဲသော ယုံကြည်ရာများကို သိရှိနားလည်ဖို့ရန် သန့်ရှင်းသောဝိညာဉ်တော်ရဲ့ ဉာဏ်အလင်းကျေးဇူးတော် လိုအပ်ပါတယ်။ ထို့ကြောင့် ဘုရားသခင်ထံ နှိမ့်ချခြင်းဖြင့် ဆုတောင်းရင်း မိမိလိုအပ်သော ဉာဏ်အလင်းများ၊ ယုံကြည်ခြင်းများ၊ ဆုကျေးဇူးတော်များ ခံစားရရှိပြီး ပိုမိုပြီးပြည့်စုံတဲ့ ခရစ်ယာန်အသက်တာကို ပိုင်ဆိုင်နိုင်ကြပါစေလို့ ဆုတောင်းရင်း …..

ဖတ်ရှုသူတစ်ယောက်ချင်းစီတိုင်းကို ကျေးဇူးတင်ပါတယ်။

ဘုရားသခင်ကောင်းချီးပေးပါစေ။ အာမင်🙏။