ရှင်ယာကုပ် ဩဝါဒစာစောင် – နောက်ခံသမိုင်းကြောင်း

“၎င်းဟာ ကနဦးအသင်းတော်အတွက် သာသနာပြုခြင်းအမှုတော်ရဲ့ အသက်သွေးကြောနဲ့ဆိုင်တဲ့ အပိုင်းကို ပြောဆို ခြင်းသာမဟုတ်ဘဲ၊ ကမ္ဘာအနှံ့မှာ ပျံ့နှံ့လျက်ရှိနေတဲ့ အသင်းတော်တွေရဲ့  အသက်တာနေထိုင်မှုမှာ ယုံကြည်ခြင်း ရဲ့ မရှိမဖြစ်အရေးကြီးပုံကို သိရှိနားလည်နေရုံမျှမက နေ့စဥ်နှင့်အမျှ လူ့ကျင့်ဝတ်နှင့်ဆိုင်တဲ့ ကိစ္စများ၊ ကြွယ်ဝခြင်းနှင့် အဆင့်အတန်းအပေါ် ဓလေ့ထုံးတမ်းအရ ဝေဖန်မှတ်ချက်ပြုမှုများနဲ့အတူ ပေါ်ပေါက် လာတတ်သော အများနှင့်ဆိုင်တဲ့ ကိစ္စရပ်များမှာ လိုအပ်တဲ့လမ်းညွှန်မှုများကို ပုံဖော်ပေးနေတဲ့ သွန်သင်ချက်များဖြစ်ပါတယ်။”

အသင်းတော်ရဲ့ စည်းကမ်းနဲ့ အနာရောဂါငြိမ်းခြင်းအလေ့အကျင့် ဆိုင်ရာကိစ္စရပ်တွင် ဆုတောင်းခြင်း၊ ဆီသွန်း လောင်းခြင်း နှင့် နာမကျန်းသူအတွက် အနာငြိမ်းခြင်းအကျိုးရှိစေရန် အပြစ်ဝန်ချတောင်းပန်ခြင်း စသည့် အချက်များအား အလေးထား ဖော်ပြထားသည်ကို တွေ့ရပါတယ်။ သြဝါဒစာစောင်ရဲ့ အခန်းကြီး ၁၊ အခန်းငယ် ၂ မှ ၄၊ ၁၉ မှ ၂၇ တို့တွင်တည်ကြည်ခြင်း၊ ညှင်းပန်းနှိပ်စက်ခြင်းထဲမှ ဝမ်းမြောက်ခြင်း တို့ဟာ မြင့်မားသောကိုယ်ကျင့်တရား ပိုင်းဆိုင်ရာ လိုအပ်ချက်များပါတဲ့ သန့်စင်တဲ့ကိုးကွယ်မှု တခုအပေါ်အခြေပြုဖြစ်တည်လာကြောင်း ဖော်ပြထားပါတယ်။

“အကျင့်နှင့်ကင်းသောယုံကြည်ခြင်းသည်အသေဖြစ်သည်” ဆိုသည့် ရှင်ယာကုပ်၏ ဖော်ပြချက်ကို

“လူ​မည်​သည်​ကား၊ ပ​ညတ်​တ​ရား၏ အ​ကျင့်​မ​ရှိ​ဘဲ ယုံ​ကြည်​ခြင်း​အား​ဖြင့် ဖြောင့်​မတ်​ရာ​သို့ ရောက်​တတ်​သည်​ဟု​ယူ​ရ၏”

ဆိုသည့် ရှင်ပေါလု၏ ဖော်ပြ ချက်နှင့် အဘယ်သို့ နှိုင်းယှဥ်ရမည်နည်းဆိုသည့် အငြင်းအခုံသည် သမိုင်းတလျှောက် ဖြစ်နေဆဲပင်ဖြစ်သည်။ 

ခရစ်ယာန် သာသနာသမိုင်းမှာ အဓိကကျတဲ့ ထိုငြင်းခုံမှုဟာ တကယ်တော့ ရိုးရှင်းတဲ့အချက်တခုကိုသတိမထားမိလို့ပဲ ဖြစ်ပါတယ်။ ရှင်ပေါလု ပြောခဲ့တဲ့ အကျင့်ဟာ “ပညတ်တရားရဲ့ အကျင့် နဲ့ (တနည်း) ဂျူးလူမျိုးတွေလိုက်လျှောက်ရတဲ့ အကျင့်/လုပ်ဆောင်မှုတွေဖြစ်ပြီး ဆိုလိုတာက  တပါးအမျိုးသားတွေ မလုပ်ဆောင်တဲ့ကျင့်ဆောင်မှုတွေကို ရည်ညွှန်း နေတာပဲဖြစ်တယ်။ ဂျူးတွေကျင့်ဆောင်ရတဲ့ ပညတ်တော် (၁၀)ပါးအပါအဝင်၊ အရေဖျားလှီးခြင်းဆိုင်တဲ့ အကျင့်/လုပ်ဆောင်မှု၊ အစားအသောက်နဲ့ ဆိုင်တဲ့ အကျင့်/လုပ်ဆောင်မှုတွေကို ရှင်ပေါလုက ရည်ညွှန်းနေတာ ဖြစ်ပါတယ်။

အခြားတဖက်မှာ  တမန်တော်ရှင်ယာကုပ်ပြောတဲ့ “အကျင့်” ဆိုတာကတော့ ပညတ်တရားက တောင်းဆို တဲ့ အကျင့်ကိုပြောနေတာမဟုတ်ဘဲ ချစ်ခြင်းမေတ္တာ၊ သနားခြင်းဂရုဏာရဲ့ အကျင့်ကို ရည်ညွှန်းနေတာဖြစ်ပါတယ်။ ထို့ကြောင့် ထို ဖော်ပြချက် ၂ မျိုးဟာ တခုနဲ့ တခု သင့်မြတ်နေရုံမျှမက တခုစီဟာ မတူညီတဲ့ ပြသနာတွေအပေါ် ရည်ညွှန်းပြောဆိုနေခြင်းဖြစ်တယ်။ တမန်တော်ရှင်ပေါလုဆိုရင် ဂလာတိ ၆ : ၂ မှာ ညီအစ်ကိုတွေ ထမ်း​ရွက်​စ​ရာ​ဝန်​ချင်း​တို့​ကို အ​ချင်း​ချင်း​ကူ​ညီ၍ ထမ်း​ရွက်ဖို့အတွက် “ခရစ်တော်ရဲ့တရား”(the law of Christ) ကို “ကျင့်” ကြလော့ ဟူ၍တောင်မှ ပြောထားတာတွေ့ရပါတယ်။ ရှင်ပေါလုပြောတဲ့ ထိုအကျင့်ဟာ တမန်တော်ရှင်ယာကုပ်က ရှင်ယာကုပ် သြဝါဒစာ အခန်းကြီး ၂ အငယ် ၈ မှာပြောထားတဲ့

 “ကိုယ်​နှင့်​စပ်​ဆိုင်​သော​သူ​ကို ကိုယ်​နှင့်​အ​မျှ​ချစ်​လော့​ဟု ကျမ်း​စာ၌​ပါ​သော ရွှေ​ပ​ညတ်​တော်​ကို သင်​တို့​သည် စောင့်​ရှောက်​လျှင်၊ ကောင်း​သော​အ​ကျင့်​ကို ကျင့်​ရာ​သို့​ရောက်​ကြ၏။– ရွှေပညတ်ဖြစ်တဲ့  “ချစ်ခြင်းမေတ္တာရဲ့ အကျင့်” ပင်ဖြစ်ပါတယ်။ တမန်တော်ရှင်ပေါလုအသုံးပြုခဲ့သည့် ဘာသာစကားပုံစံသည် တမန်တော်ရှင်ယာကုပ် ၏ စိတ်ထဲတွင်ထပ်တူရှိမည်ဟု မယူဆနိုင်ပါ။  ရှင်ယာကုပ်သြဝါဒစာ အခန်းကြီး ၂ မှာ ရှင်ယာကုပ်က အကျင့်အားဖြင့် ဖြောင့်မတ်ရာသို့ရောက်သည်အား ဖော်ပြရာတွင် အာဗြံဟံအား ဥပမာအဖြစ်အသုံးပြုခဲ့သလို တမန်တော်ရှင်ပေါလု သည်လည်း ရောမသြဝါဒစာ အခန်းကြီး ၄ တွင် ယုံကြည်ခြင်းအားဖြင့် ဖြောင့်မတ်ရာသို့‌ရောက်သည်ကို ဖော်ပြရာ၌ အာဗြံဟံကိုသာပင် ဥပမာပြ ဖော်ပြခဲ့ကြောင်း တွေ့ရပါတယ်။ ဒါကြောင့်မို့လို့ သြဝါဒစာ ၂ စောင်ဟာ မတူညီတဲ့ ရည်ရွယ်ချက် ၂ ခုနဲ့ သွန်သင်ပေးနေတယ်ဆိုတာ ဆင်ခြင်ရပါတယ်။

—————————————————————————————————————————————————————-     

ထာဝရဘုရား၏ ပညတ်တော် ၁၀ ပါး

• ငါ​မှ​တစ်​ပါး အ​ခြား​သော​ဘု​ရား​ကို မ​ကိုး​ကွယ်​နှင့်။
• အ​ထက်​မိုး​ကောင်း​ကင်၌​လည်း​ကောင်း၊ အောက်​အ​ရပ်​မြေ​ကြီး​ပေါ်၌​လည်း​ကောင်း၊ မြေ​ကြီး​အောက်​ရေ​ထဲ၌​လည်း​ကောင်း ရှိ​သော​အ​ရာ​နှင့် ပုံ​သ​ဏ္ဌာန်​တူ​အောင်၊ ရုပ်​တု​ဆင်း​တု​ကို ကိုယ်​အ​ဖို့​မ​လုပ်​နှင့်။ဦး​မ​ချ​ဝတ်​မ​ပြု​နှင့်။ အ​ကြောင်း​မူ​ကား၊ သင်၏​ဘု​ရား​သ​ခင် ငါ​ထာ​ဝ​ရ​ဘု​ရား​သည်၊ သင်၌​အ​ပြစ်​ရှိ​သည်​ဟု ယုံ​လွယ်​သော​ဘု​ရား၊ ငါ့​ကို​မုန်း​သော​သူ​တို့၏ အ​မျိုး​အ​စဉ်​အ​ဆက်၊ တ​တိ​ယ​အ​ဆက်၊ စ​တု​တ္ထ​အ​ဆက်​တိုင်​အောင်၊ အ​ဘ​တို့၏​အ​ပြစ်​ကို သား​တို့​၌​ဆပ်​ပေး​စီ​ရင်​သော​ဘု​ရား၊ ငါ့​ကို​ချစ်၍ ငါ့​ပ​ညတ်​တို့​ကို​ကျင့်​သော​သူ​တို့၏ အ​မျိုး​အ​စဉ်​အ​ဆက် အ​ထောင်​အ​သောင်း​တိုင်​အောင်၊ က​ရု​ဏာ​ကို​ပြ​သော ဘု​ရား​ဖြစ်၏။ 
• သင်၏​ဘု​ရား​သ​ခင်​ထာ​ဝ​ရ​ဘု​ရား၏ နာ​မ​တော်​ကို မု​သား​နှင့်​ဆိုင်၍ မ​မြွက်​မ​ဆို​နှင့်။ အ​ကြောင်း​မူ​ကား၊ နာ​မ​တော်​ကို မု​သား​နှင့်​ဆိုင်၍ မြွက်​ဆို​သော​သူ​ကို အ​ပြစ်​မ​ရှိ​ဟု ထာ​ဝ​ရ​ဘု​ရား​မှတ်​တော်​မ​မူ။
• ဥ​ပုသ်​နေ့​ကို​သန့်​ရှင်း​စေ​ခြင်း​ငှာ၊ ထို​နေ့​ရက်​ကို​အောက်​မေ့​လော့။ခြောက်​ရက်​ပတ်​လုံး အ​လုပ်​မျိုး​ကို​ကြိုး​စား၍ လုပ်​ဆောင်​လော့။ သ​တ္တ​မ​နေ့​ရက်​သည် သင်၏​ဘု​ရား​သ​ခင်​ထာ​ဝ​ရ​ဘု​ရား၏ ဥ​ပုသ်​နေ့​ဖြစ်၏။ ထို​နေ့၌ သင်​မှ​စ၍​သင်၏​သား​သ​မီး၊ ကျွန်​ယောက်ျား၊ မိန်း​မ၊ တိ​ရ​စ္ဆာန်၊ သင်၏ တံ​ခါး​အ​တွင်း၌​နေ​သော ဧည့်​သည်​အာ​ဂ​န္တု​သည် အ​လုပ်​မ​လုပ်​ရ။ အ​ကြောင်း​မူ​ကား၊ ထာ​ဝ​ရ​ဘု​ရား​သည် မိုး​ကောင်း​ကင်၊ မြေ​ကြီး၊ သ​မု​ဒ္ဒ​ရာ၊ အ​ရပ်​ရပ်၌​ရှိ​သ​မျှ​တို့​ကို ခြောက်​ရက်​တွင်​ဖန်​ဆင်း​၍ သ​တ္တ​မ​နေ့​ရက်၌ ငြိမ်​ဝပ်​စွာ​နေ​တော်​မူ၏။ ထို​ကြောင့် ထာ​ဝ​ရ​ဘု​ရား​သည် သ​တ္တ​မ​နေ့​ရက်​ကို ကောင်း​ချီး​ပေး​၍ သန့်​ရှင်း​စေ​တော်​မူ​၏။ 
• သင်​၏​ဘု​ရား​သ​ခင်​ထာ​ဝ​ရ​ဘု​ရား ပေး​သ​နား​တော်​မူ​သော​ပြည်၌ သင်၏​အ​သက်​တာ ရှည်​မည်​အ​ကြောင်း၊ သင်၏​မိ​ဘ​ကို​ရို​သေ​စွာ​ပြု​လော့။
• လူ​အ​သက်​ကို မ​သတ်​နှင့်။
• သူ့​မ​ယား​ကို မ​ပြစ်​မှား​နှင့်။
• သူ့​ဥ​စ္စာ​ကို မ​ခိုး​နှင့်။
• ကိုယ်​နှင့်​စပ်​ဆိုင်​သော​သူ​တစ်​ဖက်၌ မ​မှန်​သော​သက်​သေ​ကို မ​ခံ​နှင့်။
• ကိုယ်​နှင့်​စပ်​ဆိုင်​သော​သူ၏​အိမ်​ကို တပ်​မက်​လို​ချင်​သော​စိတ် မ​ရှိ​စေ​နှင့်။ ကိုယ်​နှင့်​စပ်​ဆိုင်​သော​သူ၏ မ​ယား၊ သူ၏ ကျွန်​ယောက်ျား၊ မိန်း​မ၊ နွား၊ မြည်း​မှ​စ၍ ကိုယ်​နှင့်​စပ်​ဆိုင်​သော​သူ၏ ဥ​စ္စာ​တစ်​စုံ​တစ်​ခု​ကို​မျှ တပ်​မက်​လို​ချင်​သော​စိတ်​မ​ရှိ​စေ​နှင့်​ဟု မိန့်​တော်​မူ၏