မျက်မှောက်တော်

ခွင့်လွှတ်ခြင်း မျက်မှောက်တော်  (Forgiving Presence)

ထို​ကြောင့် ညီ​အစ်​ကို​တို့၊ ယေ​ရှု၏ ကိုယ်​ခ​န္ဓာ​တော်​တည်း​ဟူ​သော ကု​လား​ကာ​အား​ဖြင့် ထို​သ​ခင် ပြင်​ဆင်​တော်​မူ​သော အ​သက်​လမ်း​သစ်​တွင်၊- ငါ​တို့​သည် သန့်​ရှင်း​ရာ​ဌာ​န​ထဲ​သို့၊ အ​သွေး​တော်​ကို အ​မှီ​ပြု၍ အ​ဆီး​အ​တား​မ​ရှိ၊ ဝင်​ရ​သော​အ​ခွင့် ရှိ​သ​ဖြင့်​လည်း​ကောင်း၊ ဘု​ရား​သ​ခင်၏​အိမ်​တော်​ကို အုပ်​စိုး​သော ယဇ်​ပု​ရော​ဟိတ်​မင်း ရှိ​သ​ဖြင့်​လည်း​ကောင်း၊- ငါ​တို့​သည် သ​စ္စာ​နှင့်​ပြည့်​စုံ​သော သ​ဘော​ရှိ၍၊ ဝိ​စိ​ကိ​စ္ဆာ​နှင့်​ကင်း​သော ယုံ​ကြည်​ခြင်း၌ တည်​လျက်၊ စိတ်​နှ​လုံး​ကို သံ​ဝေ​ဂ​တ​ရား​နှင့် လွတ်​အောင် ဖျန်း​ခြင်း၊ ကိုယ်​ကာ​ယ​ကို​လည်း ကြည်​သော​ရေ​ဖြင့် ဆေး​ကြော​ခြင်း​ရှိ​ပြီး​မှ၊ အ​ထံ​တော်​သို့ တိုး​ဝင်​ချဉ်း​ကပ်​ကြ​ကုန်​အံ့။  
ဟေဗြဲ ၁၀ : ၁၉ -၂၂

အပြစ်မှ ခွင့်လွှတ်ခံရခြင်း ရဲ့တန်ဖိုးဟာ ဘာလဲ လို့ မေးရင် ခရစ်တော်ယေရှုဘုရားရဲ့  အသွေးတော်ကိုပဲ ညွှန်ပြရမှာဖြစ်ပါတယ်။ ထိုမျှလောက် တန်ဖိုးကြီးပါတယ်။

လက်​ဝါး​ကပ်​တိုင်​မှာ သွန်း​သော အ​သွေး​တော်​အား​ဖြင့် ရန်​ကို​ငြိမ်း​စေ၍၊ ကောင်း​ကင်​အ​ရာ​ဖြစ်​စေ၊ မြေ​ကြီး​အ​ရာ​ဖြစ်​စေ၊ ခပ်​သိမ်း​သော​အ​ရာ​တို့​ကို သား​တော်​အား​ဖြင့် ဘု​ရား​သ​ခင်​နှင့် မိတ်​သ​ဟာ​ယ ဖွဲ့​စေ​ခြင်း​ငှာ​လည်း​ကောင်း အ​လို​ရှိ​တော်​မူ၏။  ကောလောသဲ ၁ : ၂၀

ထိုအသွေးတော်ဟာ အမျက်တော်နဲ့ ပြည့်နေတဲ့ မျက်မှောက်တော်ကို သနားဂရုဏာ အဖြစ် ပြောင်းလဲစေကာ လူသားနဲ့ ဘုရားအကြား ပြန်လည် မိတ်သဟာယ ဖွဲ့စေနိုင်ခဲ့ပါတယ်။

ဒါကြောင့်မို့လို့  သားတော်ယေရှုခရစ်အားဖြင့် အပြစ်ကနေရွေးနှုတ်ခံရပြီး ဖြောင့်မတ်ရာသို့ သွင်းခြင်းကို ခံရတဲ့ ယုံကြည်သူ သားသမီးတွေဟာ အချိန်တိုင်း ဘုရားရဲ့  သနားခြင်းဂရုဏာ နဲ့ ပြည့်နေတဲ့ မျက်မှောက်တော်ကို ခံစားရမှာဖြစ်ပါတယ်။ တချိန်တည်းမှာ ဘာကြောင့် သနားခြင်းဂရုဏာတော် နဲ့ လက်ခံခြင်းခံရသလဲ ဆိုတာကို ဆင်ခြင်တဲ့အခါ မှာ မိမိဟာ များစွာသော အပြစ်တို့နဲ့ လွတ်ခဲ့ကြောင်းကို ပြန်လည်အောက်မေ့ပြီး အပြစ်လွှတ်ပေး တဲ့ အရှင်ကို သာ၍ ချစ်ကာ ကိုယ်တော့်စကားကို နားထောင် အသက်ရှင်ဖို့ ဖြစ်ပါတယ်။

တချိန်က အာဒံနဲ့ဧဝတို့ နှစ်ဦးဟာ မိမိတို့ရဲ့ နားမထောင်မှုကြောင့် “မျက်မှောက်တော်” ကနေ ပြေးထွက် ပုန်း‌ရှောင်နေခဲ့ရသလိုမျိုး အခုကျွန်တော်တို့ ယုံကြည်သူ ခရစ်ယာန်တွေဟာ ပုန်းရှောင်စရာ မလိုတော့ပါဘူး။ ဒါပေမယ့် ဘာကြောင့် မလိုတော့ သလဲ ဆိုတာကိုတော့ သေချာနားလည်ဖို့ လို ပါလိမ့်မယ်။

ယနေ့ခေတ်မှာ ဘုရားမျက်မှောက်တော်လို့ ဆိုတာနဲ့ ကျွန်‌တော်တို့စိတ်ထဲ ပြေးမြင်မိတတ်တာက ဝတ်ပြုကိုးကွယ်မှုဦးဆောင်တဲ့သူတွေ၊ ဂီတပညာရှင်တွေ မျက်စိမှိတ်၊ ခေါင်းမော့ လက်မြှောက်ပြီး သီချင်းဆို၊ ဘုရားကို အာရုံပြုနေတဲ့ ပုံစံမျိုးပဲဖြစ်ပါတယ်။ အဲလိုအချိန်မှာ လူတယောက်ဟာ ရာနှုန်းပြည့်နီးပါး ဘုရားအတူရှိခြင်းကို အာရုံစိုက်နေနိုင်မယ်ဆိုတာ မငြင်း လိုပါဘူး။ ဘာဖြစ်လို့လဲဆိုတော့ ငွေကြေးချမ်းသာတဲ့အသင်းတော်တွေ ၊ ငွေကြေးအင်အား ၊အလှူ များများရတဲ့ အသင်းတော်တွေဟာ ဝတ်ပြုဖို့နေရာဆိုလည်း အဲယားကွန်းအပြည့်၊ စိတ်ကို လည်း အာရုံပြုလို့ကောင်းအောင် ရှေ့ကဦးဆောင်ပေးတဲ့သူ၊ သံစဉ်အလိုက် ဂီတတီးခတ် ပေးတဲ့သူ၊ ကျမ်းပိုဒ်လေးတွေနဲ့ ဆုတောင်းပေးတဲ့သူ စသဖြင့် အဖက်ဖက်ကနေမှ ဝတ်ပြု ကိုးကွယ်လို့ ကောင်းအောင် ဖန်တီးထားတဲ့အခြေအနေ မို့လို့ပဲဖြစ်ပါတယ်။ ဒီလိုအခြေအနေ မှာ ဘုရားရဲ့မျက်မှောက်တော် ကို ခံစားရပြီး ဝမ်းမြောက်တယ် ဆိုတာကို မှားတယ်လို မဆိုလိုပါဘူး။ ကျွန်တော်ကိုယ်တိုင်လည်း ခံစားဖူးပါတယ်။ ဒါပေမယ့် ဝတ်ပြုခြင်းအစီအစဉ်ပြီးလို့ ကိုယ့် အစီအစဉ်နဲ့ကိုယ် ဆက်သွားတဲ့ အခါမှာတော့ ပုံစံတမျိုးဖြစ်သွားတတ်ပါတယ်။ ကျွန်တော်ဟာ အထက်ကပြောသလိုမျိုး ဝမ်းမြောက်ပြီး အလွန်ပဲခွန်အားရတဲ့ အခန်းထဲကမျက်မှောက် တော်ဟာ နာရီပိုင်းလောက်ပဲ ဖြစ်ပါတယ်။ ပြီးတဲ့အခါမှာတော့ ကျန်တဲ့အချိန်တွေ၊ အခြားသူ တွေနဲ့ တွေ့တဲ့အခါ ပြောဆိုဆက်ဆံတဲ့အခါ၊ တယောက်တည်း အပြစ်သွေးဆောင်ခြင်းတွေ ကြုံရတဲ့အခါမှာတော့ ခုနပြောခဲ့တဲ့ “မျက်မှောက်တော်” ဆိုတာကို ကျွန်‌တော် မျက်စိမှောက်သွားခဲ့ပါပြီ။ အပြစ်ကို အသွေးအသားဆန္ဒပါလျက်လုပ်မိတဲ့အခါ မှာ “မျက်မှောက်တော်” က ဘာပြောသလဲ ဆိုတာကို မကြားချင်တော့ပါဘူး။ ဝတ်ပြုကိုးကွယ် နေတုန်းကတော့ “ကိုယ်တော်သာကျွန်ုပ်အလိုအပ်ဆုံးပါ” လို့ ညည်းရင်း မျက်ရည်ကျနေခဲ့တဲ့ ကျွန်တော်က အခု “ဒီဟာလေးတော့ မရှောင်နိုင်လို့ တခါတော့ လုပ်လိုက်မယ်” နော် ဆိုပြီး   ဧသောလို သားဦးအရာကို ပဲဟင်းတခွက်နဲ့ လဲစားခဲ့တဲ့ အကြိမ်ပေါင်းလည်း မနည်းတော့ ပါဘူး။

ဒီနေရာမှာအဓိကပြောချင်တာက ဘုရားရဲ့ မျက်မှောက်တော်ဟာ လူရဲ့ စိတ်ခံစားချက် တခုကိုပဲ သာယာစေတာမျိုး လုံးဝမဟုတ်ပါဘူး။ ကိုယ်တော်နဲ့အတူရှိခြင်းဟာ မိမိရဲ့ မစုံလင် ခြင်း၊ အားနည်းခြင်းတွေ၊ အပြစ် ဒုစရိုက်တွေအတွက် ကြေကွဲဝမ်းနည်းစေမှာဖြစ်သလို ထိုအရာတွေအတွက် ဝမ်းနည်း နှိမ့်ချတဲ့ စိတ်နှလုံးနဲ့ သခင်ထံ ပြန်လည်တိုးဝင်ဖို့ဖြစ်ပါတယ်။ ယုံကြည်သူတယောက်ဟာ အချိန်တိုင်းမျက်မှောက်တော်မှာ ဝမ်းမြောက်စွာ သီချင်းဆို ချီးမွမ်း နေနိုင်မှာ မဟုတ်ပါဘူး။ အပြစ်ရဲ့သွေးဆောင်ခြင်းကို လိုက်ပါမိလို့ မျက်မှောက်တော် မှာ မိမိအပြစ်အတွက် ဝမ်းနည်းပူဆွေး၊ နောင်တရတဲ့ အချိန်လည်းရှိမှာ ဖြစ်ပါတယ်။

သေချာတဲ့အချက်ကတော့ သခင့်ရဲ့ အသွေးတော်ဟာ ကျွန်တော်တို့အတွက် ထာဝရကုသိုလ် ကို သွတ်သွင်းပေးတော်မူခဲ့တာမို့လို့  ကျွန်တော်တို့ရရှိထားတဲ့ မျက်မှောက်တော်ဟာ ဘယ်နည်းနဲ့မှ ပျောက်ပျက်သွားစရာမရှိပါကြောင်း ခွန်အားပေးရင်း……………….

“ငါ​သည်​လည်း ကပ်​က​မ္ဘာ​ကုန်​သည်​တိုင်​အောင် သင်​တို့​နှင့်​အ​တူ အ​စဉ်​မ​ပြတ် ရှိ​သည်​ဟု တ​ပည့်​တော်​တို့​အား မိန့်​တော်​မူ၏”