ကမ္ဘာအို ဖန်ဆင်းခြင်းဝါဒ (Old-Earth Creationism) – နောက်ဆုံးပိုင်း

၃။ ကမ္ဘာဦးခေတ်တွင် မည်သူမျှ အသက်မရှင်ဖူးခဲ့ပါ။ ကမ္ဘာဦးခေတ်ကာလ၏ တဦးတည်းသော မျက်မြင်သက်သေမှာ (only eye-witness of the creation) ဖန်ဆင်းရှင်ဘုရားသခင်သာလျှင် ဖြစ်သည်မှန်သော်လည်း စကြဝဠာနှင့် ကမ္ဘာမြေ၏မူလအစနှင့် ပတ်သက်၍ မျက်မှောက်ခေတ် သိပ္ပံပညာရှာဖွေတွေ့ရှိမှုများကိုလည်း သမ္မာကျမ်းစာအားအနက်ပြန်ဆိုရာတွင် ထည့်သွင်းစဉ်းစားသင့်သည်ဟု OEC များက ယုံကြည်ကြသည်။

OEC များသည် နယ်ပယ်တော်တော်များများတွင် Mainstream Science ကို လက်ခံကြသည်။ စာရေးသူဆိုလိုသည့် “နယ်ပယ်” ဆိုသည်မှာ စကြဝဠာဗေဒ၊ နက္ခတ္တဗေဒ၊ ဇီဝဗေဒ၊ ဓာတုဗေဒ၊ ရူပဗေဒ စသည့်သိပ္ပံရပ်ဝန်းနယ်ပယ်များကို ဆိုလိုပါသည်။ ဤအချက်တွင် YEC တို့နှင့် ဆန့်ကျင်ဘက်ဖြစ်လေသည်။ နှိုင်းယှဉ်ဖော်ပြရလျှင် YEC များသည် ကမ္ဘာဦးကျမ်းစာရှိ ဖန်ဆင်းခြင်းအဖြစ်အပျက်များကို စာသားအတိုင်း တိုက်ရိုက်အနက်ပြန်လိုက်သည်။ ထို့ကြောင့် ၎င်းတို့၏ Literal Interpreatation ကို အထောက်အပံ့ပြုနိုင်မည့် သီအိုရီများကို ရှာဖွေကြရသည်။ ဥပမာ စကြဝဠာနှင့် ကမ္ဘာသက်တမ်းသည် နှစ် ၁၀၀၀၀ အောက်ဖြစ်ကြောင်း၊ နောဧခေတ်တွင် တကမ္ဘာလုံးရေလွှမ်းမိုးခဲ့သည်ဟု ယုံကြည်သည့်အတွက် ၎င်းအတွက် သီးခြားသက်သေကို ရှာဖွေစုဆောင်းကြရသည်။ ထို့ကြောင့် ၎င်းတို့အယူတွင် Mainstream Science ရှိ စကြဝဠာ၏မူလအစ Big Bang Theory၊ သက်ရှိတို့၏ ဆင့်ကဲပြောင်းလဲခြင်း Evolution Theory စသည်များကို လက်မခံဘဲ ငြင်းပယ်ကြပြီး ၎င်းတို့၏ကိုယ်ပိုင်ဗားရှင်း Creation Science ခေါ် Scientific Creationism၊​ နောဧခေတ်ရေလွှမ်းမိုးခြင်းအတွက် Flood Geology စသည့် ဩဝါဒအမျိုးမျိုးကို ဖြန့်ဝေကြရတော့သည်။ OEC များကမူ Mainstream Science က ရှာဖွေတွေ့ရှိမှုများ၊ သုတေသနပြုမှုများကို မပြတ်နားစွင့်နေကြသည်။ ထို့နောက် သဘာဝတရားကို သိပ္ပံနည်းလမ်းစဉ်များကို အသုံးပြု၍ စုဆောင်းရရှိလာသည့် အသိ (Knowledge) အမျိုးမျိုးကို ဆင်ခြင်သုံးသပ်၍ ကမ္ဘာဦးကျမ်းကို မှန်ကန်စွာနားလည်နိုင်မည့်နည်းလမ်းကို ကြိုးပမ်းရှာဖွေကြသည်။ သို့သော်သတိပြုရမည်မှာ OEC များသည် သိပ္ပံပညာကို သမ္မာကျမ်းစာထဲ အတင်းသွပ်သွင်းဖို့ကြိုးစားကြတာမျိုးတော့ မဟုတ်သည်ကို တွေ့ရှိရသည်။ မြင်သာအောင်ဖော်ပြရလျှင် ရောမဩဝါဒစာစောင်ကို လေ့လာသည့်အခါ ရောမဩဝါဒစာစောင်၏ သမိုင်းနောက်ခံကို သိထားလျှင် ပို၍မှန်ကန်စွာ အနက်ပြန်နိုင်မည်ဖြစ်သည်။ ဂလာတိဩဝါဒစာစောင်ကို လေ့လာပါက ထိုခေတ်အခါက မည်ကဲ့သို့ ပြဿနာများဖြစ်ပေါ်နေ၍ မည်သည့်အကြောင်းကြောင့် တမန်တော်ပေါလုက ဤဩဝါဒစာစောင်ကို ရေးရသည့် သမိုင်းနောက်ခံကို သိရှိထားပါက ထိုကျမ်းစာစောင်များကို လေ့လာရာတွင် ပိုမိုနားလည်လွယ်မည်ဖြစ်သည် မဟုတ်ပါတကား။ ဤသည်မှာ မိမိတို့ သိရှိထားသော သမိုင်းနောက်ခံ အသိ (Knowledge) ကို သမ္မာကျမ်းစာနှင့် မညီညီအောင် အတင်းလုပ်ယူ၊ ညှိယူတာမျိုးမဟုတ်ဘဲ ယင်းကျမ်း၏ ဆိုလိုရင်းကို ပိုမိုနားလည်စေရန် ထိုအသိကို အသုံးချခြင်းသာဖြစ်သည်ဟု OEC များက ဆိုကြသည်။ ထိုနည်း၎င်းပင် ကမ္ဘာဦးကျမ်းရှိ စကြဝဠာအစ၊ ကမ္ဘာမြေအစ၊ လူသားအစ စသည့် မူလဇစ်မြစ်​(Origins) နှင့်စပ်ဆိုင်သောအရာများကိုလေ့လာသည့်အခါတွင်လည်း စကြဝဠာဗေဒ၊ နက္ခတ္တဗေဒ၊ ဇီဝဗေဒများကို ထိုက်သင့်သလောက်သိရှိထားမှသာလျှင် ထိုကျမ်းကို လေ့လာရာ၌ ပိုမိုနားလည်လွယ်စေမည် မဟုတ်ပါတကား။ ထို့ကြောင့် OEC များသည် ကမ္ဘာဦးခေတ်တွင် မည်သူမျှ အသက်မရှင်ဖူးခဲ့သည်မှန်သော်လည်း စကြဝဠာအစ၊ ကမ္ဘာမြေ၏အစ စသည့် မူလဇစ်မြစ်ကို လေ့လာနေသော မျက်မှောက်ခေတ်သိပ္ပံရှာဖွေတွေ့ရှိမှုများကို လုံးဝမျက်ကွယ်ပြုပြီး မိမိတို့ရဲ့ စာသားအတိုင်း အနက်ပြန်ဆိုခြင်းသည်သာ မှန်ကန်သော အနက်ပြန်ဆိုခြင်းဖြစ်သည်ဟု ကြွေးကြော်နေခြင်းသည် မှန်ကန်၍သမ္မာနည်းကျသည့် အနက်ပြန်ဆိုမှုကို ရရှိနိုင်မှာ မဟုတ်ကြောင်း OEC များက ယုံကြည်ကြပါသည်။ သို့သော်လည်း ရှေ့အပိုင်းများတွင် ဖော်ပြခဲ့ပြီးသည့်အတိုင်း OEC အားလုံး သက်ရှိတို့၏ ဆင့်ကဲပြောင်းလဲခြင်းဖြစ်စဉ်ကို အပြည့်အဝလက်ခံကြသည်တော့ မဟုတ်ပေ။ မည်သည့် အဖွဲ့အစည်းများသည် Evolution Theory ကို အပြည့်အဝ လက်မခံကြကြောင်း ရှေ့အပိုင်းများတွင် စာရေးသူ ဖော်ပြခဲ့ပြီးဖြစ်ပါသည်။

၄။ နောဧခေတ် ရေလွှမ်းမိုးခြင်းသည် တကယ်ဖြစ်ခဲ့ပါသည် သို့သော် တကမ္ဘာလုံးရေလွှမ်းခြင်း မဟုတ်သကဲ့သို့ ကျောက်ဖြစ်ရုပ်ကြွင်းများနှင့် မျက်မှောက်ခေတ် ကမ္ဘာမြေကျောက်လွှာများဖွဲ့စည်းတည်ဆောက်ပုံ၊ ဘူမိမြေပြင်ဖွဲ့စည်းပုံများသည် နောဧခေတ်ရေလွှမ်းမိုးမှုကြောင့်မဟုတ်ပါဟု OEC များက ယုံကြည်ကြသည်။

OEC များသည် YEC တို့၏ Scientific Creationism အတွက် ပင်မအသက်သွေးကြောကြီးဖြစ်သော  “Flood Geology” ကို ငြင်းပယ်ကြပါသည်။ Flood Geology သည် Science မဟုတ်ဘဲ Pseudoscience သာဖြစ်ပါသည်။ မျက်မှောက်ခေတ် သိပ္ပံရှာဖွေတွေ့ရှိချက်များတွင် နောဧခေတ် တကမ္ဘာလုံးရေလွှမ်းခြင်း အတွက် သက်သေအထောက်အထားတစုံတရာ မရှိပေ။ သို့သော် သိပ္ပံပညာရှင်များသည် နောဧခေတ်က ထိုနေရာတဝိုက်၌သာ ဖြစ်ပွားခဲ့သော ရေလွှမ်းမိုးမှု (Local Flood) တော့ရှိနိုင်သည်ဟု မှတ်ချက်ပေးကြသည်။ OEC များသည် ထိုအချက်ကို သဘောတူလက်ခံကြပြီး ထိုသို့ လက်ခံခြင်းသည် ခရစ်ယာန်ယုံကြည်မှုဆိုင်ရာ ကိုးကွယ်မှုများနှင့် တန်ဖိုးများကို လျော့ကျထိခိုက်စေနိုင်သည်ဟု မရှုမြင်ကြပါ။ အကြောင်းမှာ သင်သည် သခင်ယေရှုခရစ်တော်ကို မိမိအသက်တာ၏ ကယ်တင်ပိုင်ရှင်ဘုရားအဖြစ် ယုံကြည်လက်ခံခြင်းကသာ ထိုကိုးကွယ်မှုတန်ဖိုးများအတွက် အဓိကအထွတ်အထိပ်ဖြစ်ပြီး ကမ္ဘာသက်တမ်းအား သင်မည်ကဲ့သို့ ယုံကြည်လက်ခံခြင်းဆိုသည်မှာ သာမည ဖြစ်သည်ဟု ရှုမြင်သောကြောင့်သာ ဖြစ်သည်။