ကမ္ဘာပျို ဖန်ဆင်းခြင်းဝါဒ (Young-Earth Creationism) – အပိုင်း(၃)

၄။ သိပ္ပံဆိုင်ရာသက်သေအထောက်အထားများကို မှန်မှန်ကန်ကန် အနက်ပြန်ပါက ကျမ်းစာအား စာသားအတိုင်းအနက်ပြန်ဆိုခြင်းနှင့် ကိုက်ညီမှုရှိသည်ဟု YEC များက ယုံကြည်ကြသည်။

OEC ခရစ်ယာန်များ၊ ဘာသာမဲ့များနှင့် သိပ္ပံပညာရှင်များသည် ဖန်ဆင်းခြင်း ၆ ရက်၌ တရက်လျှင် ၂၄ နာရီတိတိသာ ကြာမြင့်ခဲ့သည်ကို မယုံကြည်ကြခြင်းမှာ သိပ္ပံဆိုင်ရာသက်သေအထောက်အထားများကို မှန်မှန်ကန်ကန် အနက် မပြန်ဆိုနိုင်ခြင်းကြောင့် ဖြစ်သည်ဟု ခံယူကြသည်။ မိမိတို့ YEC များသည် သိပ္ပံဆိုင်ရာသက်သေအထောက်အထားများကို မှန်မှန်ကန်ကန် အနက်ပြန်ဆိုနိုင်သည့်အတွက် မိမိတို့၏ယုံကြည်ခြင်းသည် သိပ္ပံနည်းကျ ယုံကြည်ခြင်းမျိုးဖြစ်သည်ဟု ဆိုကြပါသည်။ 

၅။ ကျောက်ဖြစ်ရုပ်ကြွင်းများနှင့် မျက်မှောက်ခေတ် ကမ္ဘာမြေကျောက်လွှာများဖွဲ့စည်းတည်ဆောက်ပုံ၊ ဘူမိမြေပြင်ဖွဲ့စည်းပုံများသည် နောဧခေတ်၌ တကမ္ဘာလုံးရေလွှမ်းခြင်း၏ ခြေရာလက်ရာများဖြစ်သည်ဟု YEC များက ယုံကြည်ကြသည်။

ဤယုံကြည်ချက်ကို “Flood Geology” ဟု ခေါ်တွင်ပါသည်။ Flood Geology သည် Science မဟုတ်ဘဲ Pseudoscience သာဖြစ်ပါသည်။ စင်စစ် Flood Geology သည် YEC တို့၏ Scientific Creationism အတွက် ပင်မအသက်သွေးကြောကြီးဖြစ်လေသည်။ သို့မှသာ ၎င်းတို့၏ ကမ္ဘာသက်တမ်း နှစ် ၆၀၀၀ ဟူသည့် အနက်ပြန်ဆိုခြင်းနှင့် ကိုက်ညီမည်ဖြစ်ပေသည်။ ၎င်းတို့သည် နောဧခေတ်တွင် လူသားတို့၏ အပြစ်ကို စီရင်ရန်အတွက် တကမ္ဘာလုံးကို ရေလွှမ်းမိုး(Global Flood)ခဲ့သည်ကို မယုံကြည်ပါက အခြားသော ခရစ်ယာန်ယုံကြည်မှုဆိုင်ရာ ကိုးကွယ်မှုများနှင့် တန်ဖိုးများကို လျော့ကျထိခိုက်စေနိုင်သည်ဟု ရှုမြင်ကြသည်။ ထို့ကြောင့် မျက်မှောက်ခေတ် ကမ္ဘာမြေကျောက်လွှာများဖွဲ့စည်းတည်ဆောက်ပုံနှင့် ကျောက်ဖြစ်ရုပ်ကြွင်းများသည် လွန်ခဲ့သော နှစ်သန်းပေါင်းများစွာ ဖြစ်ပေါ်ခဲ့သည်ဟူသည့် သိပ္ပံရှာဖွေတွေ့ရှိချက်များကို YEC များက ငြင်းပယ်ကြသည်။ မျက်မှောက်ခေတ် သိပ္ပံရှာဖွေတွေ့ရှိချက်များတွင် နောဧခေတ် တကမ္ဘာလုံးရေလွှမ်းခြင်း အတွက် သက်သေအထောက်အထားတစုံတရာ မရှိပေ။ သို့သော် သိပ္ပံပညာရှင်များသည် နောဧခေတ်က ထိုနေရာတဝိုက်၌သာ ဖြစ်ပွားခဲ့သော ရေလွှမ်းမိုးမှု (Local Flood) တော့ရှိနိုင်သည်ဟု မှတ်ချက်ပေးကြသည်။ OEC များသည် ထိုအချက်ကို သဘောတူလက်ခံကြပြီး ထိုသို့ လက်ခံခြင်းသည် ခရစ်ယာန်ယုံကြည်မှုဆိုင်ရာ ကိုးကွယ်မှုများနှင့် တန်ဖိုးများကို လျော့ကျထိခိုက်စေနိုင်သည်ဟု မရှုမြင်ကြပါ။ အကြောင်းမှာ သင်သည် သခင်ယေရှုခရစ်တော်ကို မိမိအသက်တာ၏ ကယ်တင်ပိုင်ရှင်ဘုရားအဖြစ် ယုံကြည်လက်ခံခြင်းကသာ ထိုကိုးကွယ်မှုတန်ဖိုးများအတွက် အဓိကအထွတ်အထိပ်ဖြစ်ပြီး ကမ္ဘာသက်တမ်းအား သင်မည်ကဲ့သို့ ယုံကြည်လက်ခံခြင်းဆိုသည်မှာ သာမည ဖြစ်သည်ဟု ရှုမြင်သောကြောင့်သာ ဖြစ်သည်။

၆။ ကမ္ဘာသက်တမ်းမှာ သမ္မာကျမ်းစာအရ ထင်သလောက် မအိုမင်းသေးပါ။ အိုမင်းသည်ဟု သင်တို့ ထင်မြင်နေခြင်းသက်သက်သာဖြစ်သည်ဟု YEC များက ယုံကြည်ကြသည်။

သိပ္ပံသက်သေအထောက်အထားများအရ စကြဝဠာနှင့် ကမ္ဘာသက်တမ်းသည် နှစ်သန်းပေါင်းများစွာ ကြာမြင့်ခဲ့ပြီဖြစ်ပြီး အလွန်ရှေးကျနေပြီဟု ထင်ကောင်းထင်နိုင်ပါသည်။ သို့သော် အမှန်မှာ မအိုမင်းသေးပါ ဟူ၍ဖြစ်သည်။ ဤအရာနှင့်ပတ်သက်၍ YEC များသည် အာဒံ၏ မူလဖန်ဆင်းခါစ အခြေအနေကို အကြောင်းပြချက်ပေးကြသည်။ ဆိုလိုသည်မှာ ဘုရားသခင်သည် အာဒံကို စတင်ဖန်ဆင်းချိန်တွင် လူသည် အရွယ်ရောက်ပြီးသားဖြစ်ပြီး မွေးကင်းစ ကလေးငယ်ပုံစံဖြင့် မဟုတ်ပါ။ အာဒံသည် အရွယ်ရောက်ပြီးလူကြီးပုံစံအဖြစ် ဖန်ဆင်းခံရသော်လည်း ဖန်ဆင်းခါစက သူ၏ အသက်မှာ ၁ နှစ်ပင် မပြည့်သေးဟု ဆိုကြသည်။ ထိုအရာကို Appearance of Age Interpretation ဟုလည်းခေါ်ကြသည်။ အမှတ်တမဲ့ဆိုလျှင် ယုတ္တိရှိပြီး ကျိုးကြောင်းဆီလျော်သည်ဟု ထင်ရသော်လည်း စင်စစ် YEC တို့၏ ဤယုံကြည်ချက်၌ ဓမ္မရှုထောင့်အရရော၊ ဒဿနိကရှုထောင့်အရပါ စိန်ခေါ်ချက် ကြီးကြီးမားမားရှိပါသည်။ ဖြစ်ရပ်အားလုံးဟာ အမှန်တကယ်ရှေးမကျသေးပါဘူး၊ ရှေးကျတယ်လို့ ထင်နေရခြင်းဖြစ်ပါသည်ဆိုသည်မှာ သေချာပါသလား။ သေချာသည်ဆိုလျှင် “ဘုရားသခင်သည် စကြဝဠာကြီးနှင့် ကမ္ဘာမြေကြီးကို လွန်ခဲ့သည့် သောကြာနေ့ကမှ ဖန်ဆင်းလိုက်ပါသလား .. ကမ္ဘာသက်တမ်းမှာ ထင်သလောက် မအိုမင်းသေးပါ။ အိုမင်းသည်ဟု ကျွန်ုပ်တို့ ထင်မြင်နေခြင်းသက်သက်သာဖြစ်သည်ဆိုလျှင်ပေါ့”
Appearance of Age Interpretation အရ ကမ္ဘာကြီးသက်တမ်းဟာ နှစ် ၆၀၀၀ မရှိသေးပါ .. လွန်ခဲ့သော သောကြာနေ့ကမှ ဖန်ဆင်းလိုက်ခြင်းဖြစ်ပါသည်ဟု မည်သူမဆို ကြွေးကြော်နိုင်သည် မဟုတ်ပါလား။ ဘူမိဗေဒဆိုင်ရာအချက်အလက်များအရရော၊ ကျောက်ဖြစ်ရုပ်ကြွင်းပညာဆိုင်ရာ(Palaeontological) သက်သေအထောက်အထားများအရပါ ကမ္ဘာသက်တမ်းသည် အမှန်တကယ်ပင် ရှေးကျနေပြီဖြစ်ပါသည်။ ယနေ့ခေတ်ကာလ၌ ကမ္ဘာသက်တမ်း နှစ်ထောင်ဂဏန်းသာရှိသေးသည်ဟု ယုံကြည်ခြင်းသည် မျက်မှောက်ခေတ်၌ ကမ္ဘာကြီး ပြားသည်ဟု ယုံကြည်နေကြသေးသည့် ခရစ်ယာန်များနှင့် ဆင်တူနေမည်လားဟု ဆင်ခြင်သုံးသပ်စရာ ရှိနိုင်ပါသည်။ မြန်မာနိုင်ငံ၌ပင် ကမ္ဘာကြီးလုံးသည်ကို လက်မခံဘဲ ကျမ်းစာသားအတိုင်း တိုက်ရိုက်အနက်ပြန်ပြီး ကမ္ဘာပြားသည်ဟု ယုံကြည်ကြသည့် ခရစ်ယာန်များ တကယ်ရှိပါသည်။ ထိုခရစ်ယာန်များကို YEC များ မည်ကဲ့သို့ ရှုမြင်ကြမည်နည်းဟူသည်မှာ အတော်စိတ်ဝင်စားစရာပင်။

၇။ ဒါဝင်၏ သိပ္ပံဆိုင်ရာ ဆင့်ကဲပြောင်းလဲခြင်းဖြစ်စဉ် သီအိုရီ၌ ပြစ်ချက်များရှိသည်၊ သမ္မာကျမ်းစာနှင့် ကိုက်ညီမှုမရှိဟုဆိုကာ ဒါဝင်၏ ဆင့်ကဲပြောင်းလဲခြင်းဖြစ်စဉ်သီအိုရီကို YEC များက အပြည့်အဝ လက်မခံကြပါ။

လူနှင့် ချင်ပန်ဇီတို့သည် ရှေးဘုံတူ ဘိုးဘေးမျိုးစိတ်(common ancenstor) ဖြစ်သည့် လူဝံ (Ape) ကဲ့သို့သောသတ္တဝါမျိုးမှ အချိန်ကာလကြာမြင့်လာသည့်အခါ တဖြည်းဖြည်း ဆင့်ကဲပြောင်းလဲလာခဲ့သည်ဟူသည့် သိပ္ပံဆိုင်ရာ ဆင့်ကဲပြောင်းလဲခြင်းဖြစ်စဉ် သီအိုရီကို ငြင်းပယ်ကြသည်။ YEC တို့သည် မျိုးစိတ်အတွင်း ဆင့်ကဲပြောင်းလဲခြင်းကိုသာ လက်ခံကြပြီး မျိုးစိတ်တစ်ခုမှ နောက်မျိုးစိတ်တခုသို့ ဆင့်ကဲပြောင်းလဲခြင်းကိုမူ သမ္မာကျမ်းစာ သွန်သင်ချက်နှင့် မညီဟု ဆိုကာ လက်မခံနိုင်ကြပေ။ YEC တို့ အခေါ် မျိုးစိတ်အတွင်း ဆင့်ကဲပြောင်းလဲခြင်းကို Micro-evolution ဟု ခေါ်ကြသည်။ ဥပမာ .. ခွေးမျိုးစိတ်တခုမှ ဝိသေသနလက္ခဏာမတူသော အခြားခွေးမျိုးကွဲသို့ ဆင့်ကဲပြောင်းလဲခြင်းမျိုးကို သူတို့ဆိုလိုကြခြင်းဖြစ်သည်။ ထို့ကြောင့် ခွေးဘီလူး၊ ခွေးစုတ်ဖွား၊ ဟတ်စကီးခွေးမျိုး စသဖြင့် အမျိုးကွဲများအဖြစ် ထွက်ပေါ်လာကြခြင်းဖြစ်သည်ဟု ဆိုသည်။  ကြောင်မျိုးစိတ်၊ ကျားမျိုးစိတ်၊ မျောက်မျိုးစိတ်များလည်း ထိုနည်း၎င်းပင်။ YEC တို့သည် ၎င်းတို့၏ Scientific Creationism ပါ Micro-evolution ကို ကမ္ဘာဦးကျမ်း ၁ : ၂၀ ပါ ကျမ်းစာသားဖြစ်သည့် “ … အမျိုး အလိုက် ( … according to its kind)” ဟူသည့်အရာနှင့် ခိုင်းနှိုင်းပြောဆိုလေ့ရှိကြပြီး Macro-evolution ကိုမူ မျိုးစိတ်တစ်ခုမှ နောက်မျိုးစိတ်တခု(မျောက်မှ လူ) သို့ ဆင့်ကဲပြောင်းလဲခြင်းအဖြစ် ပြောဆိုကြသည်။ စင်စစ် မျက်မှောက်ခေတ်သိပ္ပံပညာရပ်ဝန်းက ဖော်ပြသော Micro-evolution နှင့် Macro-evolution ၏ အဓိပ္ပါယ်များမှာမူ ထိုသို့ မဟုတ်ပါချေ။ 

Mainstream Science ၏ အဓိပ္ပါယ်ဖွင့်ဆိုချက်မှာ အောက်ပါအတိုင်းဖြစ်ပေသည်။