“ဘုရားသခင့်ထံတော်၌ သစ္စာကတိပြုမိလျှင်၊ သစ္စာဝတ်ကို မဖြေဘဲမနေနှင့်။ မိုက်သောသူတို့ကို အားရနှစ်သက်တော်မမူ။ သစ္စာကတိပြုသည်အတိုင်း ဝတ်ကိုဖြေလော့။ သစ္စာကတိပြု၍ ဝတ်ကိုမဖြေဘဲနေသည်ထက်၊ သစ္စာကတိအလျှင်းမပြုဘဲနေသော် သာ၍ကောင်း၏။”
ဒေသနာကျမ်း ၅း၄-၅
“When you vow a vow to God, do not delay paying it, for he has no pleasure in fools. Pay what you vow. It is better that you should not vow than that you should vow and not pay.”
Ecclesiastes 5:4-5
ခရစ်ယာန်လူငယ်တော်တော်များရဲ့ ဆယ်ကျော်သက်အရွယ်ကာလဆုတောင်းတွေဟာ ကတိကဝတ်ပြုခြင်းတွေနဲ့ဘုရားထံ “ပူဆာ”တာများပါတယ်။ “ပူဇော်”တဲ့အပိုင်းကျပြန်တော့လည်း သစ္စာကတိတည်သည်က နည်းပါတယ်။ ဥပမာတခုပြရင်လျှင် ဘုရားထံမှာလိုချင်သောအရာတစုံတခုကို တောင်းပြီး၊ ရရှိလာလျှင် ဘုရားသခင်ကို တခုခုပြန်ပြီးဆက်ကပ်မယ်ဆိုပြီး သစ္စာကတိထားတတ်ကြသော်လည်း တကယ်တမ်းရေရှည်မှာ ထိုသစ္စာကတိဝတ်ကိုမဖြေဘဲ ပြုတတ်ကြသည်မျိုးပေါ့။ ကျေးဇူးတော်ချီးမွမ်းတတ်ပြီး သစ္စာကတိကို မတည်သည်မျိုးကတော့ မဖြစ်သင့်ပါ။
ချစ်သောလူငယ်တို့ကို “ယေဖသ”၏အသက်တာအားဖြင့် ရှေ့ဦးစွာတိုက်တွန်းခွန်အားပေးလိုပါသည်။ ယေဖသ ဟာ အခြားတပါးသောမိန်းမရဲ့သားဆိုတဲ့ အကြောင်းပြချက်နဲ့ဂိလဒ်ပြည်ကနေနှင်ထုတ်ခံခဲ့ရသူပါ။ သို့သော်လည်း ဘုရားသခင်ရဲ့ကျေးဇူးပြုခြင်းအားဖြင့် ယေဖသဟာ ဂိလဒ်ပြည်သို့တဖန် ပြန်လည်ရောက်ရှိရခြင်း၊ ရန်သူအမ္မုန်အမျိုးသားတို့ကို အောင်နိုင်ရခြင်းအခွင့်နှင့်အတူ ဣသရေလလူတို့ကို ခြောက်နှစ်အုပ်စိုးခဲ့ပါတယ်။ သို့သော်ယေဖသဟာ အမ္မုန်အမျိုးသားတို့ကို စစ်မတိုက်မီ သစ္စာကတိတခုထားခဲ့ပါတယ််။
“ထိုအခါ ထာဝရဘုရား၏ဝိညာဉ်တော်သည် ယေဖသအပေါ်မှာ သက်ရောက်၍၊ သူသည် ဂိလဒ်ပြည်၊ မနာရှေပြည်ကိုလျှောက်လျက် ဂိလဒ်ပြည် မိဇပါမြို့ကို လွန်၍ အမ္မုန်လူတို့ရှိရာသို့ ချီသွားလေ၏။ ယေဖသသည် ထာဝရဘုရားအား သစ္စာကတိထားလျက်၊ အကယ်၍ ကိုယ်တော်သည် အမ္မုန်အမျိုးသားတို့ကို အကျွန်ုပ်လက်၌ အပ်တော်မူလျှင်၊ အကျွန်ုပ်သည် အမ္မုန်အမျိုးသားတို့ရှိရာမှ ငြိမ်ဝပ်စွာ ပြန်လာသောအခါ၊ အကျွန်ုပ်ကို ခရီးဦးကြို ပြုအံ့သောငှာ အကျွန်ုပ်အိမ်တံခါးဝမှ ထွက်လာသောသူ မည်သည်ကို ထာဝရဘုရားအား အမှန်ဆက်သ၍ မီးရှို့ရာယဇ် ပူဇော်ပါမည်ဟု သစ္စာကတိထားပြီးမှ၊”
တရားသူကြီးမှတ်စာ ၁၁း၂၉-၃၁
ထာဝရဘုရားရဲ့ဝိညာဉ်တော်ဟာ သူနှင့်အတူရှိနေတယ်။ တနည်းအားဖြင့် အောင်ခြင်းအခွင့်ဟာရှိနေတယ်ဆိုတာ ယေဖသ မသိနိုင်စရာအကြောင်းတော့ မရှိပါ။ နောက်ပြီး ဘုရားသခင်ဘက်ကနေလည်း သူဆီကနေဘာကိုမှလည်း မတောင်းဆိုပါ။ သူ့ရဲ့ စိတ်အားကြီးခြင်းကနေပြုခဲ့မိသော သစ္စာကတိသည် သူ့အားကြေကွဲ ဝမ်းနည်းစေခဲ့ပါသည်။ သို့သော် “ခွန်အားကြီးသောသူရဲ” ဆိုသည်အတိုင်း ထိုသစ္စာကတိဝတ်ကို ယေဖသ ဖြေခဲ့ပါတယ်။
ချစ်သောလူငယ်တို့ ကိုယ်မလုပ်နိုင်တဲ့အရာဆိုရင်၊ ကျရှုံးမှာကိုကြောက်တတ်သူဆိုရင် ဘုရားသခင်ထံမှာ သစ္စာကတိကို အလျင်တဆော မလုပ်မိပါစေနှင့်။ မလုပ်သင့်တဲ့အရာဆိုရင်လည်း လုပ်ဖို့ မကြိုးစားမိပါစေနှင့်။ သစ္စာကတိမထားလို့ ဘုရားကကိုယ့်ကို အပြစ်မတင်ပါဘူး။ အကယ်၍ထားလာပြီးမှ ထိုဝတ်ကိုမဖြေဘဲနေခြင်းကသာ ဘုရားသခင်ရှေ့မှာအားရနှစ်သက်ခြင်းကိုခံရမှာ မဟုတ်ပါဘူး။ ဘုရားသခင်ထံ၌ သစ္စာကတိထားခြင်းအရာကို ပေါ့သေးသေးမမှတ်ယူပါနှင့်။
နောက်တဦးကတော့ “ဟန္န”ပါ။ ဟန္န ဟာခင်ပွန်းရဲ့ချစ်ခြင်းကို ခံရသောသူဖြစ်သော်လည်း ထာဝရဘုရားသည် သားဘွားသောအခွင့်ကိုပေးတော်မမူသောကြောင့် ဟန္န စိတ်ဆိုးအောင် သူမရဲ့ပြိုက်ဖက်ဖြစ်သူ သားသမီးရှိတဲ့ “ပေနိန္န”က နှောင့်ယှက်တတ်ပါတယ်။ ထိုသို့နှောင့်ယှက်ခြင်းက ဟန္နကို အစားမဝင်၊ ငိုကြွေးပင်ပန်းစေခဲ့ပါတယ်။
“ဟန္နသည် ညှိုးငယ်သောစိတ်နှင့် ထ၍၊ မျက်ရည်များစွာကျလျက် ထာဝရဘုရားကို ဆုတောင်းသည်ကား၊ အိုကောင်းကင် ဗိုလ်ခြေအရှင်ထာဝရဘုရား၊ ကိုယ်တော်၏ ကျွန်မကို မေ့လျော့တော်မမူဘဲ၊ ကိုယ်တော်ကျွန်မ၏ ဆင်းရဲခြင်းကို ကြည့်ရှုအောက်မေ့သဖြင့်၊ သားယောက်ျားကို ပေးသနားတော်မူလျှင်၊ သူ၏ဆံပင်ရိတ်ခြင်းကို အလျှင်းမပြု။ တစ်သက်လုံး ထာဝရဘုရား၏ကျွန်ဖြစ်စေခြင်းငှာ ကျွန်မအပ်ပါမည်ဟု သစ္စာကတိပြုလေ၏။”
ဓမ္မရာဇဝင်ပထမစောင် ၁း၁၀-၁၁
ဟန္နရဲ့သစ္စာကတိကတော့ တကယ့်ကို အရှက်ကွဲအကျိုးနည်းဆင်းရဲခံရခြင်းထဲကနေပြုခဲ့တာပါ။ သားယောက်ျားကို ပေးလျှင် ထာဝရဘုရားရဲ့ကျွန်ဖြစ်စေမယ်ဆိုတဲ့ သစ္စာကတိပဲဖြစ်ပါတယ်။ ထာဝရဘုရားကလည်း သူ့ရဲ့ဝမ်းကိုဖွင့်လျက် သားယောကျ်ားကိုပေးသနားခဲ့ပါတယ်။ အရှက်ကွဲခံရခြင်း၊ နှောင့်ယှက်ခံရခြင်းတို့ကို ပျောက်လွင့်စေမည့် သားယောကျ်ားကို သစ္စာကတိထားသည်အတိုင်း ဘုရားသခင်ထံအပ်ရမည်ဆိုသည်ကလွယ်ကူသည့်အရာတော့မဟုတ်ပါ။
“ထိုအခါ ဤသူငယ်ကိုရမည်အကြောင်း ဆုတောင်းပါ၏။ တောင်းသည်အတိုင်း ထာဝရဘုရားသည် ပေးသနားတော်မူပြီ။ ထိုကြောင့် ကျွန်မသည် သူ့ကို ထာဝရဘုရားအား ငှားပါပြီ။ သူသည် တစ်သက်လုံး ထာဝရဘုရားထံတော်၌ အငှားခံ၍ နေရပါမည်သခင်ဟု လျှောက်ပြီးမှ၊ ထိုအရပ်၌ ထာဝရဘုရားကို ကိုးကွယ်ကြ၏။”
ဓမ္မရာဇဝင်ပထမစောင် ၁း၂၇-၂၈
ဘုရားသခင်ထံမှာတောင်းခံခဲ့သည်အတိုင်း ဘုရားသခင်ကပေးခဲ့သလို၊ ပေးသနားတော်မူသော ဘုရားထံတော်သို့လည်း သစ္စာကတိတည်လျက် ဟန္နပြုခဲ့ပါတယ်။ ချစ်သောလူငယ်တို့ ဘဝအသက်တာမှာ တခါတရံကြုံတွေ့ရတဲ့ အခက်အခဲ၊ နာကျင်မှုတွေဟာ အကြောင်းမဲ့တော့ မဟုတ်ပါဘူး။ ထိုအရာတွေကနေ ထာဝရဘုရားထံဝန်ခံအပ်နှံတတ်တဲ့အသက်တာဖြစ်လာဖို့ အခွင့်အရေးများသာဖြစ်ပါတယ်။ နောက်ပြီး ကိုယ့်အသက်တာရဲ့ တချို့သော နယ်ပယ်တွေမှာ လွန်ကျူးနေမိတဲ့ ဒုစရိုက်ပြဿနာတွေကို ကျော်လွှားဖို့ သစ္စာကတိထားသည့်အခါမှာလည်း ပေါ့ပေါ့တန်တန် ပြီးပြီးရောမလုပ်မိပါစေနှင့်။
ဒါကြောင့် အသက်တာမှာ အောင်မြင်ခြင်းကိုကြုံတွေ့ရဖို့ဖြစ်ပါစေ၊ အရှက်ကွဲခြင်းကိုလွန်မြောက်ဖို့ဖြစ်ပါစေ ထာဝရဘုရားထံဆုတောင်းတိုးဝင်လျက် သစ္စာကတိပြုသည့်အခါတိုင်း ပရမ်းပတာမဖြစ်စေဘဲ အလေးအနက်ထားတတ်သော လူငယ်တို့ဖြစ်ကြပါမည်အကြောင်းသတိပေး တိုက်တွန်းနှိုးဆော်ပါရစေ။
မေတ္တာဖြင့်
ယခုဆောင်းပါးသည် မူရင်းစာရေးသူ ဆရာ The Blessed Desk နှင့် λόγος ၏ မူပိုင်စာမူဖြစ်ပြီး ရေးသားသူ၏ ဘုရားသခင့်အမှုတော်မြတ်အတွက် ကြိုးစားအားထုတ်မှုကို လေးစားတန်ဖိုးထားကြောင်း ပြသသည့်အနေဖြင့် လျော်ကန်သော ချီးကျူးဂုဏ်ပြုမှု (appropriate credit) မပေးဘဲ အခြားနေရာများ၌ စာသားများအား ကူးယူဖော်ပြခြင်း၊ စီးပွါးဖြစ်ထုတ်ဝေကာ ရောင်းဝယ်ဖောက်ကားခြင်းများ မပြုလုပ်ကြပါရန် မေတ္တာရပ်ခံပါသည်။ ကြိုက်နှစ်သက်ပါက မူရင်း website link ကို ဖော်ပြပေးကာ ထပ်ဆင့်ဖြန့်ဝေပေးခြင်းအားဖြင့် ကျွန်ုပ်တို့၏ အမှုတော်မြတ်လုပ်ငန်းကို ပံ့ပိုးကူညီနိုင်ပါသည်။ အသေးစိတ်သိရှိလိုပါက λόγος ၏ “အသုံးပြုခြင်းဆိုင်ရာ သတ်မှတ်ချက်များ” တွင် ဖတ်ရှုလေ့လာပါ။