လူတော်တော်များများဆီကနေ “အလိုတော်ပါပဲ” ဆိုပြီး သာမန်ကာလျှံကာပြောဆိုမှုမျိုးတွေကြားဖူးပါတယ်။ အလိုတော်လို့ဆိုလိုက်တာနဲ့ တချို့တွေက ခုထိဘာမှန်းမသိကြသေးပါ။ တခုခုဖြစ်လာ၊ ဖြစ်ပျက်ပြီးသွားမှ အလိုတော်ဝန်ခံရမှာပေါ့ ဆိုတာကြီးကလည်းမဟုတ်သေးပြန်ပါဘူး။
“ထိုကြောင့် သတိမရှိသောသူမဖြစ်၊ သခင်ဘုရား၏ အလိုတော်ရှိရာကို ပိုင်းခြား၍ သိသောသူ ဖြစ်ကြလော့။”
ဧဖက်ဩဝါဒစာ ၅း၁၇
“Therefore do not be foolish, but understand what the will of the Lord is.”
Ephesians 5:17 ESV
ဧဖက်အသင်းတော်ကို တမန်တော်ကြီးရှင်ပေါလုက “သတိမရှိ”(foolish)တဲ့သူတွေမဖြစ်ဘဲ သခင်ဘုရားရဲ့ “အလိုတော်”(will)ကိုပိုင်းခြား၍ “သိသော”(understand)သူတွေဖြစ်ဖို့ သတိပေးတိုက်တွန်းနှိုးဆော်ခဲ့ပါတယ်။ သတိရှိလျက် အလိုတော်ကို ပိုင်းခြားသိစေချင်သော အကြောင်းအရင်းကလည်း ဆိုးယုတ်သောကာလအချိန်ဖြစ်သောကြောင့် ရွေးနှုတ်တတ်စေချင်သောကြောင့်ပါ။ အချိန်ကာလရဲ့ဆိုးယုတ်မှုနဲ့အတူ ကိုယ်တိုင်ကလည်း ဆိုးယုတ်မှုနောက်ကို လိုက်နေမယ်၊ အသက်ရှင်နေမယ်ဆိုရင် သေချာတယ် ကိုယ်ဟာ သတိမရှိ၊ အလိုတော်ပိုင်းခြား၍သိချင်သောသဘောနဲ့ ကင်းနေပြီဆိုတာပါပဲ။
“အိမ်ထောင်မှာ”
“သားသမီးတို့၊ သခင်ဘုရား၏ အလိုတော်နှင့်အညီ မိဘစကားကို နားထောင်ကြလော့။ မိဘစကား ကိုနားထောင်ခြင်းအမှုသည် တရားသောအမှု ဖြစ်၏။”
ဧဖက်ဩဝါဒစာ ၆း၁
“အဘတို့၊ ကိုယ်သားသမီးကို စိတ်ဆိုးစေခြင်းငှာ မပြုကြနှင့်။ သခင်ဘုရား၏ အလိုတော်နှင့်ညီသော ဆုံးမ သွန်သင်ခြင်းကိုပြုလျက် ကျွေးမွေးကြလော့။”
ဧဖက်ဩဝါဒစာ ၆း၄
ဆရာကြီးယုဒသန်က သခင်ဘုရား၏အလိုတော်နှင့်အညီ (in the lord)၊ သခင်ဘုရား၏အလိုတော်နှင့်ညီသောဆုံးမသွန်သင်ခြင်း (in the discipline and instruction of the lord) ဆိုပြီးလှပစွာ ပြန်ဆိုထားပါတယ်။ တကယ်တမ်း ဆင်ခြင်ကြည့်တဲ့အခါ သခင်ဘုရား၌ရှိသော အိမ်ထောင်တခုဟာ သခင်ဘုရား၏အလိုတော်၌မွေ့လျော်အသက်ရှင်တယ်ဆိုတာ နားလည်ရပါတယ်။ ကိုယ်က မစုံလင်(imperfect)ရင်တောင်မှ စုံလင်သောသခင်(Perfect Lord)ရဲ့အလိုတော်ကိုပိုင်းခြား၍သိချင်တဲ့ အသက်တာနဲ့ အသက်ရှင်ချင်သောဆန္ဒရှိဖို့ ချစ်သောလူငယ်တို့ သတိပြုပါလေ။
“အသက်တာမှာ”
“ဘုရားသခင်၏ အလိုတော်ဟူမူကား၊ သင်တို့သည် မတရားသောမေထုန်ကို ကြဉ်ရှောင်၍ သန့်ရှင်းစေခြင်းငှာလည်းကောင်း၊ ဘုရားသခင်ကိုမသိသော သာသနာပလူတို့သည် ကိလေသာ တပ်မက်ခြင်းရှိသကဲ့သို့ မရှိ၊ သင်တို့အပေါင်းသည် သန့်ရှင်းခြင်း၊ အသရေတင့်တယ်ခြင်းနှင့် မိမိကိုယ်ကိုမိမိ ထိန်းတတ်စေခြင်းငှာလည်းကောင်း၊ ဤအမှုအရာ၌ လွန်ကျူး၍ ညီအစ်ကိုကို ပရိယာယ်အားဖြင့် မပြစ်မှားစေခြင်းငှာလည်းကောင်း၊ အလိုတော်ရှိ၏။ ငါတို့သည် အထက်က ဟောပြော၍ သစ္စာပေးနှင့်သည်အတိုင်း၊ သခင်ဘုရားသည် ထိုသို့သော ပြစ်မှားခြင်းကို ခံသောသူအပေါင်းတို့ဘက်၌ တရားစီရင်တော်မူလိမ့်မည်။ ဘုရားသခင်သည် ညစ်ညူးစေခြင်းငှာ ငါတို့ကို ခေါ်တော်မူသည်မဟုတ်၊ သန့်ရှင်းစေခြင်းငှာ ခေါ်တော်မူ၏။ ထိုကြောင့်၊ ငါတို့ကိုငြင်းပယ်သောသူသည် လူကိုသာ ငြင်းပယ်သည်မဟုတ်၊ ကိုယ်တော်၏ သန့်ရှင်းသော ဝိညာဉ်တော်ကို ငါတို့အား ပေးတော်မူသော ဘုရားသခင်ကို ငြင်းပယ်၏။”
သက်သာလောနိတ်ဩဝါဒစာပထမစောင် ၄း၃-၈
“ငါ့အသက်တာအတွက် ဘုရားသခင်ရဲ့အလိုတော်က ဘာလဲမသိဘူး” လို့ပြောတတ်တဲ့ချစ်သောလူငယ်တို့ … အထက်ကကျမ်းစာရဲ့အစမှာ “ဘုရားသခင်ရဲ့အလိုတော်ဟူမူကား”(this is the will of God) လို့ အစပြုထားတာ သတိပြုမိပါရဲ့လား။ သတိပြုမိရင် အနောက်မှာဆက်ပြောထားတာကို ပိုပြီးသတိပြုစေချင်ပါတယ်။ မတရားသောမေထုန်ကိုရှောင်ပါ၊ သန့်ရှင်း၍အသရေနှင့်တင်တင့်သောအသက်တာဖြစ်စေလျက် သန့်ရှင်းသောဝိညာဉ်တော်ကို ပေးတော်မူသောဘုရားသခင်၏အလိုတော်ကိုပိုင်းခြား၍သိသောအသက်တာဖြင့်အသက်ရှင်ပါ။
“အစဉ်မပြတ် ဝမ်းမြောက်ခြင်းရှိကြလော့။ မခြားမလပ် ဆုတောင်းပဌနာပြုကြလော့။ အရာရာ၌ ကျေးဇူးတော်ကို ချီးမွမ်းကြလော့။ အကြောင်းမူကား၊ သင်တို့သည် ထိုသို့ကျင့်စေခြင်းငှာ၊ ယေရှုခရစ်၌ ဘုရားသခင်အလိုတော်ရှိ၏။”
သက်သာလောနိတ်ဩဝါဒစာပထမစောင် ၅း၁၆-၁၈
အစဉ်မပြတ်ဝမ်းမြောက်ခြင်း၊ မခြားမလပ်ဆုတောင်းပဌနာပြုခြင်း၊ အရာရာ၌ကျေးဇူးတော်ချီးမွမ်းခြင်း တွေကိုအသက်တာမှာပြုဖို့ ယေရှုခရစ်၌ဘုရားသခင်အလိုရှိပါတယ် ချစ်သောလူငယ်တို့။ ယေရှုခရစ်၌ရှိတယ်ဆိုပြီး ဝမ်းမြောက်ခြင်းဆိုတာ ဝမ်းမြောက်စရာရှိမှ၊ ဆုတောင်းတယ်ဆိုတာ အားတဲ့အခါမှ၊ ကျေးဇူးတော်ချီးမွမ်းတယ်ဆိုတာ ချီးမွမ်းစရာရှိမှဆိုတာမျိုးတော့မဖြစ်သင့်ပါ။ အလိုတော်ကိုဆောင်ချင်ရင်၊ ဝန်ခံချင်ရင် မပျင်းပါနဲ့။ ကိုယ့်အလိုကို ရှေ့တန်းမတင်မိပါစေနဲ့။
“ထိုကြောင့်၊ ဘုရားသခင်၏အလိုတော်သို့ လိုက်ကြလော့။ မာရ်နတ်ကို ဆီးတားကြလော့။ သို့ပြုလျှင်၊ သူသည် သင်တို့ထံက ပြေးသွားလိမ့်မည်။”
ရှင်ယာကုပ်ဩဝါဒစာ ၄း၇
ချစ်သောလူငယ်တို့ ဘုရားသခင်၏အလိုတော်သို့လိုက်ပါ(submit)။ စာတန်ကိုဆီးတားတဲ့ အသက်တာရှိသောသူဟာ သခင်ဘုရား၌ဝန်ခံသောသူ၊ တနည်းဆိုရလျှင် အလိုတော်ကိုဝန်ခံသောသူ၊ တနည်းထပ်ဆိုရလျှင် ယေရှုခရစ်တော်ကဲ့သို့ အသက်ရှင်သောသူဖြစ်ပါတယ်။
ချစ်သောလူငယ်တို့ အလိုတော်ဟာ ဘာမှန်းမသိဖြစ်နေပါသလား။ ဒါဆိုရင် သခင့်ကိုစေ့စေ့ကြည့်ဖို့လိုပါပြီ။ သခင့်ရဲ့နှုတ်ကပတ်တော်ကို မှီဝဲဖို့လိုနေပါပြီ။ ထင်ထားသလို မဖြစ်တတ်တဲ့လောကကြီးထဲ အသက်ရှင်နေထိုင်ချိန်ခဏမှာ အလိုတော်နှင့်အညီကျင့်လျက်တည်သောသူဖြစ်မည်အကြောင်း
“လောကနှင့် လောကီတပ်မက်ခြင်းသည် ရွေ့သွားကွယ်ပျောက်တတ်၏။ ဘုရားသခင်၏ အလိုတော်နှင့်အညီ ကျင့်သောသူမူကား၊ နိစ္စထာဝရတည်၏။”
ရှင်ယောဟန်ဩဝါဒစာပထမစောင် ၂း၁၇
မေတ္တာဖြင့်
ယခုဆောင်းပါးသည် မူရင်းစာရေးသူ ဆရာ The Blessed Desk နှင့် λόγος ၏ မူပိုင်စာမူဖြစ်ပြီး ရေးသားသူ၏ ဘုရားသခင့်အမှုတော်မြတ်အတွက် ကြိုးစားအားထုတ်မှုကို လေးစားတန်ဖိုးထားကြောင်း ပြသသည့်အနေဖြင့် လျော်ကန်သော ချီးကျူးဂုဏ်ပြုမှု (appropriate credit) မပေးဘဲ အခြားနေရာများ၌ စာသားများအား ကူးယူဖော်ပြခြင်း၊ စီးပွါးဖြစ်ထုတ်ဝေကာ ရောင်းဝယ်ဖောက်ကားခြင်းများ မပြုလုပ်ကြပါရန် မေတ္တာရပ်ခံပါသည်။ ကြိုက်နှစ်သက်ပါက မူရင်း website link ကို ဖော်ပြပေးကာ ထပ်ဆင့်ဖြန့်ဝေပေးခြင်းအားဖြင့် ကျွန်ုပ်တို့၏ အမှုတော်မြတ်လုပ်ငန်းကို ပံ့ပိုးကူညီနိုင်ပါသည်။ အသေးစိတ်သိရှိလိုပါက λόγος ၏ “အသုံးပြုခြင်းဆိုင်ရာ သတ်မှတ်ချက်များ” တွင် ဖတ်ရှုလေ့လာပါ။