ချစ်သော လူငယ်သို့ – အပိုင်း(၂၀)

မဝေဖန်နဲ့၊ အပြစ်တင်မစီရင်နဲ့ လို့ပြောတဲ့သူတော်တော်များများဟာ တကယ်တမ်းတော့ ဝေဖန်၊ပြစ်တင်၊စီရင်ခြင်းတွေကို မလုပ်နဲ့လို့သူတပါးကိုပြောရင်း ကိုယ်တိုင်လွန်ကျူးနေတတ်ကြသူတွေပါ။ 

~ ဝေဖန်ခြင်း ~

လောကမှာ လူတွေပြောနေကျစကားတချို့ရှိပါတယ်။ 

“မင်းအလုပ်တခုခုလုပ်ရင် ဝေဖန်မှုတွေကြုံရမယ်။ ဒါတွေကို ဂရုမစိုက်နဲ့ လုပ်စရာရှိတာလုပ်” ဆိုပြီးအားပေးသလို။ “ဝေဖန်လာတဲ့ စကားတွေကို အားအဖြစ်ပြောင်းလဲလိုက် ပြန်တုန့်မပြန်နဲ့” ဆိုပြီးစသည်ဖြင့် အားပေးတတ်ကြပါတယ်။ ပြောရမယ်ဆိုရင် ဒါတွေက စိတ်ဓာတ်ခွန်အားမြှင့်တင်ပေးရုံသက်သက် motivational ဆန်တဲ့စကားတွေပါပဲ။ ထိုစကားတွေကျတော့ လောကအရာနဲ့ပက်သက်လာရင် motivated ဖြစ်ကြပေမယ့်၊ ဝိညာဥ်ရေးနဲ့ပက်သက်ပြီးကိုယ့်ရဲ့အားနည်းချက်၊ ပေါ့လျော့မှုစတာတွေကို ညီအစ်ကိုချင်းက ဝေဖန်ထောက်ပြတဲ့အခါကျတော့ တချို့က အားမဖြစ်ဘဲ “ငါ့ကိုပဲပြောနေတယ်” “လာဆုံးမနေတယ်” “ဆရာကြီးလား” “သူကျတော့ပြည့်စုံတာကျနေတာပဲ” ဆိုပြီးပြန်လည်ချေပတတ်ကြပါတယ်။ စိတ်မကောင်းစရာက “ဝေဖန်ထောက်ပြသည့်အရာကမှန်လိုက်တာ၊ငါလိုအပ်နေတာကွာ” ဆိုတာမျိုးဖြစ်မလာဘဲ၊ ကိုယ့်ကိုယ်ကိုအဆင်ပြေတယ် ဘုရားနဲ့မှန်သလိုအသက်တာမျိုးဖြင့်လည်ပင်းခိုင်မာတတ်ကြခြင်းပါ။ ဝေဖန်ထောက်ပြသူကို မဝေဖန်နဲ့ဆိုပြီး ပြန်လည်ဝေဖန်လိုက်ခြင်းသဘောမျိုးပါပဲ။

~ အပြစ်တင်စီရင်ခြင်း ~

ဒီအပိုင်းကလည်း ယုံကြည်သူများကြား အငြင်းပွားမှုအများဆုံးဆိုလည်း မမှားပါဘူး။ ခေတ်အနေအထားအရလည်း ကိုယ်ကြည်ညိုသူထံကနေသာ အဆုံးအမကိုခံယူလာကြခြင်း၊ ပစားအလေးပေးခြင်းမျိုးတွေကြောင့် social media လိုနေရာမျိုးတွေမှာ အာမင်ထူးလိုက် ဆဲလိုက်နဲ့ ခရစ်ယာန်အသိုင်းအဝိုင်းကြီးက အင်မတန်မှအရုပ်ဆိုးအကျဥ်းတန်လှပါသည်။ 

ကိုယ်ချစ်တဲ့သူက အမှားတွေများနေတာတောင် အပြစ်မတင်ရက်လောက်အောင် ဘာလုပ်လုပ် အပြစ်မမြင်တော့တဲ့လူတွေရှိပါတယ်။ ဒါပေမယ့် ဒီသဘောထားမျိုးက ခရစ်ယာန်အသိုင်းအဝိုင်းတွေထဲမှာတော့ အဆင်မပြေပါဘူး။ ဘာကြောင့်လဲဆိုရင် နှုတ်ကပတ်တော်သာ နောက်ဆုံးသောအခွင့်အာဏာ final authority ဖြစ်သောကြောင့်ပါ။ ဗေရိမြို့သားတွေလို ထူးမြတ်ပြီး နှုတ်ကပတ်တော်မှန်သည်မမှန်သည်ကိုစစ်ဆေးတတ်တဲ့ ယုံကြည်သူတွေကိုမြင်တွေ့လာရခြင်းမရှိတာကလည်း မထူးဆန်းပါဘူး။ ထို​ ဗေရိမြို့သားတွေဟာ ဖြစ်ကတတ်ဆန်းခံယူသူတွေမဟုတ်ကြပါ။ 

ဒီကနေ့ခရစ်ယာန်အသိုင်းအဝိုင်းထဲမှာတော့ နမော်နမဲ့ဖြစ်ကတတ်ဆန်းခံယူလာကြတဲ့အခါ တဦးနှင့်တဦးပြစ်တင်စီရင်ကာ မချစ်နိုင်ဘဲ သူအဖွဲ့ကိုယ့်အဖွဲ့ ကိုယ့်ခံယူချက်နဲ့ ကိုယ့်နှုတ်ကပတ်တော်သာ မှန်တယ် ကောင်းတယ်ဆိုပြီး ဆရာတွေရဲ့တပည့်တွေဖြစ်လာကြပါတယ်။ ခရစ်တော်၏နောက်တော်သို့လိုက်ပြီး တပည့်တော်ဖြစ်သောကြောင့် ဤလောကရဲ့အပြစ်တင်ခြင်းကိုခံရတာထက် ယားသောနားဖြင့်များပြားသောဆရာတို့နောက်လိုက်ပြီး ယုံကြည်သူချင်း ကိုက်ဖြတ်နေကြတာကပိုများလာပါတယ်။ 

လူငယ်အများစုဆိုရင် ကိုယ့်ကိုပစားတဲ့နေရာဆို သဘောကျတတ်ကြပါတယ်။ အပြစ်ကိုဖော်ပြလျက် ဆုံးမသွန်သင်တဲ့နေရာ၊ ဆရာသမား၊ ခရစ်တော်၌ညီကိုချင်းကသွန်သင်တဲ့အခါဆိုရင်တော့ သဘာမကျ၊ ဘဝင်မကျဖြစ်လာတတ်ကြပါတယ်။ သက်တူရွယ်တူအချင်းချင်းတွေဆို ကြားဖူးနားဝလေးတွေနဲ့တုန့်ပြန်တတ်ကြပါသေးတယ်။ “အပြစ်နဲ့ကင်းရင်ခဲနဲ့စပေါက်လိုက်ကွာ” “စီရင်လိုက်ကွာ” ဆိုတဲ့စကားတွေနဲ့ပေါ့။ စိတ်မကောင်းစရာက မှားယွင်းခြင်းအမှုကိုလက်ပူးလက်ကြပ်မိတဲ့အမျိုးသမီးရဲ့အဖြစ်အပျက်ကို ဒီကနေ့မှာ လူတချို့က “သွား၍အပြစ်ကိုထပ်မပြုဖို့ထက်” ကိုယ့်ကိုကိုယ် ကာကွယ်ဖို့အတွက်သာ ခံယူသွန်သင်နေခြင်းက ကြောက်စရာကောင်းလှသည်။ 

ဒီနေ့လူငယ်တွေရဲ့ motto/slogan ကိုကြည့်ရင် “only God can judge me” တွေများလာပါတယ်။ လူလူချင်းကသတိပေး၊ အပြစ်ကိုဖော်ပြတာကိုတောင် မခံနိုင်၊ မခံချင်တဲ့သူဟာ “G”အကြီးနဲ့ရေးထားတဲ့ဘုရားရဲ့စီရင်ခြင်းကိုပဲလိုချင်တယ်ဆိုတာက တော်ရုံဇတော့ မဟုတ်ပါ။ 

ချစ်သောလူငယ်တို့ ဤလောကရဲ့အပြစ်ကိုဆောင်သွားသောသိုးသငယ်ကို စေ့စေ့ကြည့်ရှုပါ။ 

“ထာ​ဝ​ရ​ဘု​ရား၏​ကျွန်​သည် အ​ညွန့်​ကဲ့​သို့​လည်း​ကောင်း၊ သွေ့​ခြောက်​သော​မြေ၌ ပေါက်​သော​အ​တက်​ကဲ့​သို့​လည်း​ကောင်း၊ ရှေ့​တော်၌ ကြီး​ပွား၏။ ပ​မာ​ဏ​ပြု​စ​ရာ အ​ဆင်း​တင့်​တယ်​ခြင်း​မ​ရှိ။ ချစ်​လို​ဖွယ်​သော မျက်​နှာ​လ​က္ခ​ဏာ​နှင့် မ​ပြည့်​စုံ။ မ​ထီ​မဲ့​မြင်​ပြု​ခြင်းကိုခံ၍၊ လူ​တို့​တွင်​အ​ယုတ်​ဆုံး​သော​သူ​ဖြစ်​၏။ ငြို​ငြင်​သော​သူ၊ နာ​ကြည်း​ခြင်း​ဝေ​ဒ​နာ​နှင့် ကျွမ်း​ဝင်​သော​သူ ဖြစ်၏။ သူ​တစ်​ပါး​မျက်​နှာ​လွှဲ​ခြင်း​ကို ခံ​ရ​သော​သူ​ကဲ့​သို့ ဖြစ်၏။ မ​ထီ​မဲ့​မြင်​ပြု​ခြင်း​ကို​ခံ​လျက်​ရှိ၍၊ ငါ​တို့​သည် မ​ရို​သေ​ကြ။ သို့​သော်​လည်း၊ ထို​သူ​သည် ငါ​တို့​အ​နာ​ရော​ဂါ ဝေ​ဒ​နာ​များ​ကို ယူ​တင်​ဆောင်​ရွက်​လေ၏။ ဒဏ်​ခတ်​တော်​မူ​ခြင်း​ကို​လည်း​ကောင်း၊ ဘု​ရား​သ​ခင်​ဆုံး​မ၍ နှိမ့်​ချ​တော်​မူ​ခြင်း​ကို​လည်း​ကောင်း ခံ​ရ​သော​သူ​ဖြစ်​သည်​ဟု ငါ​တို့​သည် ထင်​မှတ်​ကြ​ပြီ။ ထို​သူ​သည် ငါ​တို့​လွန်​ကျူး​ခြင်း အ​ပြစ်​များ​ကြောင့်၊ နာ​ကျင်​စွာ ထိုး​ခြင်း၊ နှိပ်​စက်​ခြင်း​ကို ခံ​ရ​လေ၏။ ငါ​တို့၏ ငြိမ်​သက်​ခြင်း​ချမ်း​သာ​ကို ဖြစ်​စေ​သော ဆုံး​မ​ခြင်း​သည် သူ့​အ​ပေါ်​သို့​ရောက်၍၊ သူ​ခံ​ရ​သော ဒဏ်​ချက်​အား​ဖြင့် ငါ​တို့​သည် အ​နာ​ပျောက်​လျက်​ရှိ​ကြ၏။ ငါ​တို့​ရှိ​သ​မျှ​သည် သိုး​ကဲ့​သို့​လမ်း​လွဲ​လျက်၊ ကိုယ်​လမ်း​သို့ အ​သီး​အ​သီး လိုက်​သွား​ကြ​သည်​ဖြစ်၍၊ ထာ​ဝ​ရ​ဘု​ရား​သည် ခပ်​သိမ်း​သော ငါ​တို့၏​အ​ပြစ်​များ​ကို သူ့​အ​ပေါ်၌​တင်​တော်​မူ၏။ ထို​သူ​သည် ညှဉ်း​ဆဲ​ခြင်း​နှင့် နှိမ့်​ချ​ခြင်း​ကို​ခံ၍ နှုတ်​ကို မ​ဖွင့်​ဘဲ​နေ၏။ အ​သေ​သတ်​ခြင်း​ငှာ ဆောင်​သွား​သော သိုး​သ​ငယ်​ကဲ့​သို့ သူ့​ကို​ဆောင်​သွား၍၊ သိုး​သည် အ​မွေး​ညှပ်​သော​သူ​ရှေ့​မှာ မ​မြည်​ဘဲ​နေ​သ​ကဲ့​သို့၊ သူ​သည် နှုတ်​ကို​မ​ဖွင့်​ဘဲ နေ၏။ မ​တ​ရား​စွာ စီ​ရင်​ခြင်း​အား​ဖြင့် သူ့​ကို​ထုတ်​သွား​ကြ၏။ အ​သက်​ရှင်​သော သူ​တို့၏​နေ​ရာ​မှ သူ့​ကို သုတ်​သင်​ပယ်​ရှင်း​သည်​ဖြစ်၍၊ သူ၏​အ​မျိုး​အ​နွယ်​ကို အ​ဘယ်​သူ ပြ​ညွှန်​မည်​နည်း။ ငါ၏​လူ​မျိုး​အ​ပြစ်​ကြောင့် ဒဏ်​ခတ်​တော်​မူ​ခြင်း​ကို ခံ​လေ၏။ ပြစ်​မှား​ခြင်း​ကို မ​ပြု။ သူ​၏​နှုတ်​၌ မု​သား​မ​ရှိ​သော်​လည်း၊ လူ​ဆိုး​တို့​နှင့်​အ​တူ မြေ​မြုပ်​ခြင်း​ငှာ စီ​ရင်​ကြ​၏။ သို့​ရာ​တွင် သေ​ပြီး​မှ သူ​ဌေး​၌​ရှိ​၏။”

ဟေရှာယအနာဂတ္တိကျမ်း ၅၃း၂-၉

ချစ်သောလူငယ် ဝေဖန်ပြစ်တင်စီရင်ခြင်းဆိုတာက ကိုယ်တိုင်ဤလောကမှာရှိနေသ၍ ရှောင်လွဲလို့ မရတဲ့အရာပါ။ ကိုယ်ခံရတဲ့အချိန်ရှိသလို ကိုယ်ပြောရတဲ့အချိန်လည်းရှိပါလိမ့်မယ်။ သို့သော်လည်း ထိုအချိန်နှစ်ခုလုံးမှာ ကိုယ့်လွန်ကျူးခြင်းထက် ခရစ်ယာန်ဖြစ်သောကြောင့်ခံရလျင် ချီးမွမ်းပါ။ ဝေဖန်ပြစ်တင်စီရင်ခြင်းကို ဘယ်တော့မှငါမလုပ်ဘူးဆိုပြီးယတိပြတ်ဆုံးဖြတ်ချက်ချတာမျိုး၊ ပြောကိုပြောရမယ် မပြောလို့မဖြစ်ဘူးဆိုတာမျိုး တယူသန် တဖက်သက် ပညာမဲ့စွာ ပညာရှိမဆန်လိုက်ပါနဲ့။ ပြောသင့်တဲ့အချိန်၊ ပြောသင့်တဲ့အခြေအနေ ကိုပညာရှိစွာနဲ့ ကိုယ်တိုင်ပြင်ဆင်တတ်၊ ဆင်ခြင်ဖို့လိုပါတယ်။ သို့မှမဟုတ်ရင် တယောက်နဲ့တယောက်တိုက်ခိုက်ကာ၊ လွဲမှားစွာစီရင်ရင်း ဘုရားနေရာကိုယူနေမိမှန်းမသိဖြစ်နေပါလိမ့်မယ်။ 

“သင်​တို့​သည် စစ်​ကြော​ဆုံး​ဖြတ်​ခြင်း​နှင့် ကင်း​လွတ်​ရ​မည်​အ​ကြောင်း သူ​တစ်​ပါး၏​အ​မှု၌ စစ်​ကြော ဆုံး​ဖြတ်​ခြင်း​ကို မ​ပြု​ကြ​နှင့်။- သင်​တို့​သည် အ​ကြင်​တ​ရား​အ​တိုင်း သူ​တစ်​ပါး​ကို​စီ​ရင်​ကြ၏၊ ထို​တ​ရား​အ​တိုင်း စီ​ရင်​ခြင်း​ကို ခံ​ရ​ကြ​မည်။ အ​ကြင်​ချိန်၊ တင်း​ပ​မာ​ဏ​နှင့် သူ​တစ်​ပါး​အား ပေး၏။ ထို​ပ​မာ​ဏ​အ​တိုင်း ကိုယ်​ခံ​ရ​ကြ​မည်။- ကိုယ်​မျက်​စိ၌​ရှိ​သော တံ​ကျင်​ကို မ​အောက်​မေ့​ဘဲ ညီ​အစ်​ကို​မျက်​စိ၌​ရှိ​သော ငြောင့်​ငယ်​ကို အ​ဘယ်​ကြောင့် ကြည့်​ရှု​သ​နည်း။- ကိုယ်​မျက်​စိ၌ တံ​ကျင်​ရှိ​လျက်​ပင် ညီ​အစ်​ကို​အား သင်၏​မျက်​စိ၌​ရှိ​သော ငြောင့်​ငယ်​ကို ထုတ်​ပါ​ရ​စေ​ဟု အ​ဘယ်​သို့​ဆို​သ​နည်း။- လျှို့​ဝှက်​သော​သူ၊ ကိုယ်​မျက်​စိ၌​ရှိ​သော တံ​ကျင်​ကို ရှေး​ဦး​စွာ ထုတ်​ပစ်​လော့။ နောက်​မှ ညီ​အစ်​ကို မျက်​စိ၌​ရှိ​သော ငြောင့်​ငယ်​ကို ထုတ်​ပစ်​ခြင်း​ငှာ ရှင်း​လင်း​စွာ​မြင်​လိမ့်​မည်။- ဖြူ​စင်​သော​အ​ရာ​ကို ခွေး​တို့​အား မ​ပေး​ကြ​နှင့်။ ပု​လဲ​ရ​တ​နာ​တို့​ကို ဝက်​တို့​ရှေ့​မှာ မ​ချ​မ​ထား​ကြ​နှင့်။ သို့​ပြု​လျှင် ထို​အ​ရာ​တို့​ကို ကျော်​နင်း၍ သင်​တို့​ကို​လှည့်​လျက် ကိုက်​ဖြတ်​ကြ​လိမ့်​မည်။”

ရှင်မဿဲခရစ်ဝင် ၇း၁-၆

အပြစ်ကိုစီရင်ပိုင်တာ ဘုရားတပါးတည်းပါ။ အပြစ်နဲ့ပြည့်တဲ့လောကမှာရှိနေတာ ကျွန်ုပ်တို့ပါ။ လောကနဲ့မဆိုင်တဲ့ ကျွန်ုပ်တို့ဟာ အပြစ်ကိုအပြစ်လို့ ဝေဖန်ထောက်ပြပြီး သမ္မာတရားမှာလျောက်လှမ်းဖို့ရာအင်မတန်အရေးကြီးပါတယ်။ 

ချစ်သောလူငယ်တို့ မဖြူစင်တဲ့ကျွန်ုပ်တို့ကို၊ မသန့်ရှင်းတဲ့ကျွန်ုပ််တို့ကို ဘုရားသခင်က သားတော်အားဖြင့် ဖြူစင်စုံလင်စေသောကြောင့်၊ ထိုဖြူစင်စုံလင်စေသောတရားတည်းဟူသော ဧဝံဂေလိတရားအားဖြင့် ကိုယ့်ကိုစစ်ကြောလျက်၊ တပါးသူအားလည်း ထိုတရားကိုဝေငှလျက် ပညာကိုသွန်သင်လျက် မှန်ကန်စွာ ဝေဖန်ပြစ်တင်စီရင် နိုင်ပါမည်အကြောင်းဆင်ခြင်ခွန်အားပေးရင်း

မေတ္တာဖြင့်