သမီးလေးကို အိပ်ဖို့ပြောတယ် (ဒီအရွယ်က အိပ်ရမယ့်အရွယ်၊ အိပ်သင့်တဲ့အချိန်)… မအိပ်ဘူးဆိုပြီး ဟိုပြေးဒီပြေးလုပ်နေတော့ လှမ်းပြောလိုက်တယ် ..
“အိပ်လို့ … ပါးပါး ကောင်းကောင်းပြောနေတယ် ..” သူ နားမထောင်ဘူး၊ ဂရုမစိုက်ဘူး။
ကျွန်တော် လေသံကို မြှင့်လိုက်တယ်၊ စကားလုံးတွေက တိုလာတယ် …”အိပ်တော့လို့ ပြောနေတယ်”
ဒါနဲ့ ကုတင်ပေါ် သူ ပြေးတက်လာတယ် …
ကျွန်တော်လည်း အလိုက်သင့် ထွေးပွေ့ဖို့လုပ်တော့ … “မဖက်နဲ့ ပါးပါး… သမီးကို ပါးပါးက မချစ်ဘူး”တဲ့
သူ့ကို ဆူရမလား ဆိုတဲ့ လေသံမျိုးနဲ့လေ …🥺
ဟိုဘက်လှည့်သွားတယ် … စိတ်ကောက်ရင်းနဲ့ကို အိပ်သွားတာ သိုးလို့ …
သူလေး အိပ်မောကျနေတာကို ကြည့်ရင်း မေတ္တာတစ်စက်ကလေးမှ မလျော့တဲ့ ဖခင်တစ်ဦးရဲ့ ပီတိနဲ့ “သမီးရယ် … သမီးလေးကျန်းမာဖို့၊ ကိုယ်ခံအား ကောင်းဖို့ ဖေကြီး အိပ်ခိုင်းရတာပါနော်”
ဆိုပြီး သမီးလေးရဲ့ နှဖူးလေးကို ညှင်သာစွာ အနမ်းပေးလိုက်တယ် ….
တစ်ခါတစ်ခါ ဒီလောကမှာ အသက်ရှင်စဉ်ကာလ ခဏလေးမှာ လုပ်သင့်လုပ်ထိုက်တဲ့အရာတွေက ကိုယ်လုပ်ချင်တာတွေနဲ့ မကိုက်ညီတဲ့အခါ
သို့မဟုတ်
ကိုယ်လုပ်ချင်တာ လုပ်ခွင့် မရှိတဲ့အခါမှာ (လိုအင်ဆန္ဒတွေ ဖြစ်မလာတဲ့အခါမှာ) အခြေအနေတွေကို အပြစ်ဖို့ပြီး … “ဘုရားသခင်က ငါ့ ကို မချစ်ဘူး” လို့ လွယ်လွယ်ပြောတတ်ကြတယ်။ ပြောခဲ့ဖူးကြတယ်။ ဘုရားသခင်ကို စိတ်ကောက်ကြတယ်။ ဒီလိုနဲ့ ဘဝကို လုံးပန်း ရုန်းကန်နေကြတယ်။
တကယ်တော့ ဘုရားသခင်က မချစ် တော့တာ မဟုတ်ဘူး။ ကျွန်တော်တို့တွေက ဖြစ်သင့်တာထက် လုပ်ချင်တဲ့ စိတ်နဲ့ ယစ်မူးနေကြလို့ပါ။ ထာဝရကို မကြည့်ဘဲ တခဏကိုကြည့်ပြီး လုံးပန်းနေကြတာလေ။
ဒီလိုနဲ့ ကျွန်တော်တို့တွေ ပင်ပန်းလို့ မောဟိုက်ပြီး ဘဝတစ်ကွေ့မှာ သခင့်ကို မေ့တေ့တေ့ဖြစ်နေခိုက်မှာတောင် ကောင်းကင်ဖခင်က မေတ္တာတစ်စက်ကလေးမှ မလျော့တဲ့ အချစ်တွေနဲ့ သူ ကျွန်တော်တို့ကို ထွေးပွေ့နေဆဲဆိုတာ သံသယ မရှိတော့ပါဘူးလေ …
ထာဝရဘုရားသည် အဝေးကထင်ရှား၍ မိန့်တော်မူသည်ကား၊ အကယ်စင်စစ် ထာဝရမေတ္တာနှင့် သင့်ကို ငါချစ်၏။ ထိုကြောင့်၊ ကရုဏာကျေးဇူးကို သင်၌ ကြာမြင့်စွာပြ၏။
ယေရမိအနာဂတ္တိကျမ်း ၃၁:၃
“ထာဝရဘုရားသည် ကောင်းမြတ်တော်မူ၍၊ ကရုဏာတော်အစဉ်အမြဲတည်သောကြောင့်၊ ဂုဏ်ကျေးဇူးတော်ကို ချီးမွမ်းကြလော့။ ကောင်းကင်ဘုံ၏အရှင်ဘုရားသခင်၏ကရုဏာတော်သည် အစဉ်အမြဲတည်သောကြောင့်၊ ဂုဏ်ကျေးဇူးတော်ကို ချီးမွမ်းကြလော့။”
ဆာလံ ၁၃၆:၁ :၂၆
#God’s Love
ယခုဆောင်းပါးသည် မူရင်းစာရေးသူ ဆရာ An Abiding Branch နှင့် λόγος ၏ မူပိုင်စာမူဖြစ်ပြီး ရေးသားသူ၏ ဘုရားသခင့်အမှုတော်မြတ်အတွက် ကြိုးစားအားထုတ်မှုကို လေးစားတန်ဖိုးထားကြောင်း ပြသသည့်အနေဖြင့် လျော်ကန်သော ချီးကျူးဂုဏ်ပြုမှု (appropriate credit) မပေးဘဲ အခြားနေရာများ၌ စာသားများအား ကူးယူဖော်ပြခြင်း၊ စီးပွါးဖြစ်ထုတ်ဝေကာ ရောင်းဝယ်ဖောက်ကားခြင်းများ မပြုလုပ်ကြပါရန် မေတ္တာရပ်ခံပါသည်။ ကြိုက်နှစ်သက်ပါက မူရင်း website link ကို ဖော်ပြပေးကာ ထပ်ဆင့်ဖြန့်ဝေပေးခြင်းအားဖြင့် ကျွန်ုပ်တို့၏ အမှုတော်မြတ်လုပ်ငန်းကို ပံ့ပိုးကူညီနိုင်ပါသည်။ အသေးစိတ်သိရှိလိုပါက λόγος ၏ “အသုံးပြုခြင်းဆိုင်ရာ သတ်မှတ်ချက်များ” တွင် ဖတ်ရှုလေ့လာပါ။