သင်တို့တွင် အတတ်အလိမ္မာနှင့်ပြည့်စုံသော ပညာရှိ တစ်စုံတစ်ယောက်ရှိလျှင်၊ ထိုသူသည် ပညာ၏ နူးညံ့သိမ်မွေ့ခြင်းနှင့်တကွ၊ ကောင်းမြတ်သော ကျင့်ကြံပြုမူခြင်းအားဖြင့် မိမိအမှုတို့ကို ပြပါစေ။
ရှင်ယာကုပ်ဩဝါဒစာ ၃း၁၃
Who is wise and understanding among you? By his good conduct let him show his works in the meekness of wisdom.
James 3:13 ESV
ယနေ့ခေတ်မှာ “ပြ” သောသူတွေများလာပါတယ်။ “ပြ” လို့ရတဲ့အရာမှန်သမျှကိုလည်းပြလာကြပါတယ်။ ဘယ်လောက် တော်လဲဆိုတာ၊ ဘယ်လောက် လှလဲဆိုတာ၊ ဘယ်လောက် ချမ်းသာလဲဆိုတာ၊ ဘယ်လောက် လှူ နိုင်လဲဆိုတာ၊ စသည်ဖြင့်ပေါ့လေ။
သို့သော် ယုံကြည်သူများကြား အထူးသဖြင့် လူငယ်တွေထဲ ပညာရှိ(wise)သည့်အသက်တာ၊ အသက်ရှင်မှုမျိုးကို “ပြ” သောသူတွေအင်မတန်ရှားပါးလာပါတယ်။
ရှင်ယာကုပ်ကတော့ ကောင်းမြတ်သောကျင့်ကြံပြုမူခြင်းအားဖြင့်(by good conduct) ပြဖို့ယုံကြည်သူတွေကို နှိုးဆော်ထားပါတယ်။ ဒီလိုနှိုးဆော်တဲ့နေရာမှာ သင်တို့တွင် အတတ်အလိမ္မာနှင့်ပြည့်စုံသောပညာရှိတစ်စုံတစ်ယောက်ရှိလျှင် လို့အစပြုထားပါတယ်။
စိတ်မကောင်းစရာက ဒီကနေ့မှာ နှစ်လများစွာဆရာအဖွဲ့၊ လသားဆရာအဖွဲ့၊ ရက်ပိုင်းဆရာအဖွဲ့ စသည့်နေရာမျိုးစုံ၊ ဂိုဏ်းဂဏပေါင်းစုံမှ ဓမ္မဆရာများ၊ အမှုတော်ဆောင်များ ပညာပြ နေကြသည်ကပိုများလာပါတယ်။
ပညာတတ်လို့သာ ပညာတွေပြပြီး မသိမသာ ပညာတွေပြိုင်လာခြင်းတွေသာတိုးလာပါတယ်။ ပညာရှိတွေကတော့ လျော့လာပါတယ်။
“မထီမဲ့မြင်ပြုသောသူကို ဆုံးမသောသူသည် အရှက်ကွဲခြင်းကိုလည်းကောင်း၊ လူဆိုးကို အပြစ်ပြသောသူသည် ကဲ့ရဲ့ခြင်းကိုလည်းကောင်း ခံရလိမ့်မည်။ မထီမဲ့မြင်ပြုသောသူကို မဆုံးမနှင့်။ သင့်ကိုမုန်းလိမ့်မည်။ ပညာရှိကိုအပြစ်ပြလော့။ သူသည် သင့်ကိုချစ်လိမ့်မည်။ ပညာရှိသောသူကိုဆုံးမလျှင်၊ သူသည် သာ၍ပညာရှိလိမ့်မည်။ ဖြောင့်မတ်သောသူကို သွန်သင်လျှင်၊ သူသည် သိပ္ပံအတတ် တိုးပွားလိမ့်မည်။ ထာဝရဘုရားကို ကြောက်ရွံ့သောသဘောသည် ပညာ၏မူလအမြစ်ဖြစ်၏။ သန့်ရှင်းတော်မူသောဘုရားကို သိကျွမ်းသောသဘောသည် ဉာဏ်ဖြစ်၏။”
သုတ္တံကျမ်း ၉း၇-၁၀
အတတ်အလိမ္မာနှင့်ပြည့်စုံသော ပညာရှိ တစ်စုံတစ်ယောက်ရှိလျှင် ဆိုတဲ့ကျမ်းစကားအရ၊ အဲ့တစ်စုံတစ်ယောက် ကိုယ်ဖြစ်ဖို့အရေးကြီးပါတယ်။ ဘာလို့လဲဆိုရင် အထက်က သုတ္တံကျမ်းရဲ့ပထမပိုင်းမှာ ဖော်ပြထားတဲ့အတိုင်း မထီမဲ့မြင်ပြုသောသူ၊ လူဆိုးဆိုတဲ့သူတွေက ဆုံးမ မရ၊ အပြစ်ကိုပြလို့ မရသည့်အပြင် သူတို့ရဲ့အမုန်းတရား၊ ကဲ့ရဲ့ခြင်း၊ အရှက်ခွဲခြင်းကိုတောင် ခံရပါသေးတယ်။
ချစ်သောလူငယ် တစ်စုံတစ်ယောက်ဟာ ကိုယ့်ကို သွန်သင်၊ ဆုံးမ၊ အပြစ်ကိုဖော်ပြလာရင် အထက်က လူဆိုးမျိုးဖြစ်မလာချင်ပါနဲ့။ တစ်စုံတစ်ယောက်ကဲ့သို့သာဖြစ်ဖို့ နာခံကာ ဆင်ခြင်ပါ။ ထိုသို့မဟုတ်ဘဲ သင်က “ငါ့ကိုမစီရင်နဲ့။ ဘုရားပဲစီရင်မယ်” ဆိုပြီးတော့ တင်းခံနေမယ်ဆိုရင်တော့ ဒါဟာ သင်ရွေးချယ်မှုပါပဲ။
သို့သော် သတိပေးပါရစေ လူတစ်ယောက်က ကိုယ့်ကိုစီရင်သွန်သင်တာတောင် သင်မလိုချင်၊ မခံယူနိုင်ရင် ကောင်းကင်ဗိုလ်ခြေထာဝရဘုရားသခင်၏ စီရင်ခြင်းကို သင်ဘယ်လိုခံယူမလဲ။
“ပညာရှိကိုအပြစ်ပြလော့။ သူသည် သင့်ကိုချစ်လိမ့်မည်။”
ပညာရှိကိုအပြစ်ပြလို့ရတဲ့အပြင် သူ့အပြစ်သူမြင်ပြီး နောင်တရလွတ်မြောက်ကာ အပြစ်ပြသွန်သင်တဲ့သူကိုတောင် ချစ်ဦးမယ်တဲ့။
“ပညာရှိသောသူကိုဆုံးမလျှင်၊ သူသည် သာ၍ပညာရှိလိမ့်မည်။ ဖြောင့်မတ်သောသူကို သွန်သင်လျှင်၊ သူသည် သိပ္ပံအတတ် တိုးပွားလိမ့်မည်။”
နောက်ပြီး ပညာရှိကိုဆုံးမရင် သူကပညာတောင် ပိုရှိလာတယ်တဲ့။ အဲ့အပြင်ဖြောင့်မတ်ခြင်းအရာကို သင်လ်ိုခြင်းအရာတောင် တိုးပွားလိမ့်မယ်လို့ဆိုပါတယ်။
“ထာဝရဘုရားကို ကြောက်ရွံ့သောသဘောသည် ပညာ၏မူလအမြစ်ဖြစ်၏။ သန့်ရှင်းတော်မူသောဘုရားကို သိကျွမ်းသောသဘောသည် ဉာဏ်ဖြစ်၏။”
သန့်ရှင်းတော်မူသောထာဝရဘုရားကို ကြောက်ရွံ့၊သိကျွမ်းသော သဘောဟာ ပညာရဲ့မူလအမြစ်၊ ဥာဏ်ဖြစ်တယ်တဲ့။
ဒါကြောင့် တစ်စုံတစ်ယောက်ဆိုတဲ့ ပညာရှိသောသူဟာ သန့်ရှင်းတော်မူသောထာဝရဘုရားကို ကြောက်ရွံ့၊သိကျွမ်းသူဖြစ်တယ်ဆိုတာနားလည်ရပါတယ်။
ဒါကြောင့် ဘုရားပဲငါ့ကိုစီရင်မယ်လို့ပြောနေတဲ့ ချစ်သောလူငယ် … သင်တကယ်ပဲ သန့်ရှင်းတော်မူသောထာဝရဘုရားကို ကြောက်ရွံ့၊သိကျွမ်း သူဟုတ်ပါသလား။
ဘုရားက ကိုယ့်ရဲ့အပြစ်ကိုဆေးကြော၊ စီရင်အဆုံးသတ်ပေးသွားခဲ့ပေးပြီဆိုတဲ့အရာကိုပြောနေတာထက်၊ လောကမှာ နေ့စဥ်ကိုယ့်အသက်ရှင်လှုပ်ရှားမှုတိုင်းမှာ ဘုရားကိုကြောက်ရွံ့သိကျွမ်းမရှိဘဲ – တနည်းဆိုရရင်ကိုယ့်ကိုကိုယ်ခရစ််ယာန်ဆိုပြီး ပညာမဲ့စွာအသက်ရှင်နေထိုင်နေတာကို “လာမစီရင်နဲ့ဘုရားပဲငါ့ကိုစီရင်မယ်”ဆိုတာက ကြောက်စရာကောင်းတယ်လို့မခံစားရဘူးလား။
ဒါဟာ “မိုက်မဲခြင်း၏ ကြမ်းကြုတ်ခြင်းနှင့်တကွ၊ ဆိုးညစ်သော ကျင့်ကြံပြုမူခြင်းအားဖြင့် မိမိအမှုတို့ကိုပြ” နေခြင်းပါပဲ။
အိုချစ်သောလူငယ် လောကီပညာတွေကို အပတ်တကုတ် သင်ယူကြိုးစားနေတဲ့သင့်ကို စာရေးသူ လေးစားပါတယ်။ သို့သော် အတတ်ပညာတွေနဲ့ပညာတွေပြနေတဲ့ ဘုရားကို မကြောက်ရွံ့၊ မသိကျွမ်းတဲ့ ယုံကြည်သူတော့ မဖြစ်စေချင်ပါ။
ထာဝရဘုရားကိုကြောက်ရွံ့ရိုသေခြင်းမှအစပြု ဖြစ်တည်သော ပညာအားဖြင့် ပညာရှိကာ၊ ထိုပညာအား နူးညံ့သိမ်မွေ့ခြင်းနှင့်တကွ၊ ကောင်းမြတ်သော ကျင့်ကြံပြုမူခြင်းအားဖြင့် မိမိအမှုတို့ကိုဤလောက၌ “ပြ” သောသူဖြစ်မည်အကြောင်း
ကိုယ်တိုင်ဆင်ခြင်ကာ မေတ္တာဖြင့်
ယခုဆောင်းပါးသည် မူရင်းစာရေးသူ ဆရာ The Blessed Desk နှင့် λόγος ၏ မူပိုင်စာမူဖြစ်ပြီး ရေးသားသူ၏ ဘုရားသခင့်အမှုတော်မြတ်အတွက် ကြိုးစားအားထုတ်မှုကို လေးစားတန်ဖိုးထားကြောင်း ပြသသည့်အနေဖြင့် လျော်ကန်သော ချီးကျူးဂုဏ်ပြုမှု (appropriate credit) မပေးဘဲ အခြားနေရာများ၌ စာသားများအား ကူးယူဖော်ပြခြင်း၊ စီးပွါးဖြစ်ထုတ်ဝေကာ ရောင်းဝယ်ဖောက်ကားခြင်းများ မပြုလုပ်ကြပါရန် မေတ္တာရပ်ခံပါသည်။ ကြိုက်နှစ်သက်ပါက မူရင်း website link ကို ဖော်ပြပေးကာ ထပ်ဆင့်ဖြန့်ဝေပေးခြင်းအားဖြင့် ကျွန်ုပ်တို့၏ အမှုတော်မြတ်လုပ်ငန်းကို ပံ့ပိုးကူညီနိုင်ပါသည်။ အသေးစိတ်သိရှိလိုပါက λόγος ၏ “အသုံးပြုခြင်းဆိုင်ရာ သတ်မှတ်ချက်များ” တွင် ဖတ်ရှုလေ့လာပါ။