ဘုရားသခင်၏ သားတော်ကို ယုံကြည်သောသူ

ဒုတိယကမ္ဘာစစ်ကြီးပြီးဆုံးသွားသောအခါ စစ်သားတစ်ဦးသည် အိမ်ပြန်ရန်သင်္ဘောလက်မှတ်တစ်စောင် ဝယ်ယူခဲ့ပါသည်။ ယင်းအချိန်အခါတွင် သွားရမည့်ခရီးသည် ဝေးကွာလွန်းသည်ကတစ်ကြောင်း၊ စစ်ပြီးစဖြစ်နေသည်ကတစ်ကြောင်း၊ သွားရေးလာရေးက အလွန်ခက်ခဲလွန်းနေခဲ့သည်။ ထိုသို့ခက်ခဲလွန်းသည့်အတွက်ကြောင့်လည်း သင်္ဘောလက်မှတ်မှာ အလွန်ဈေးကြီးနေခဲ့သည်။ ထိုသို့ခက်ခဲလွန်းသည့်အတွက်ကြောင့်လည်း သင်္ဘောလက်မှတ်မှာ အလွန်ဈေးကြီးနေခဲ့သည်။ ထို့ကြောင့်သူသည် လမ်းတွင်စားသောက်ဖို့အတွက်ပင် ငွေကြေးမလုံမလောက်ဖြစ်ကာ ပေါင်မုန့်ကြမ်းအချို့နှင့် ရေသန့်ဘူးကိုသာဝယ်ယူခဲ့သည်။ ဤသို့ဖြင့် ထိုစစ်သားသည် သူ၏အိမ်အပြန်ခရီးစဉ်ကို သင်္ဘောဖြင့်စတင်ခဲ့သည်။

ခရီးသွားနေစဉ်အတောအတွင်း အခန်းထဲရှိလူများနှင့်လည်းရင်းနှီးလာပြီး မိတ်ဆွေဖြစ်ခဲ့ကြသည်။ မိတ်ဆွေများက အပြင်ထွက်၍ သူတို့နှင့်အတူ မနက်စာ၊ နေ့လည်စာနှင့် ညစာစားသုံးရန်ခေါ်သော်လည်း ထိုစစ်သားမှငြင်းပယ်ခဲ့သည်။ အကြောင်းမှာ သင်္ဘောလက်မှတ်သည် ဈေးကြီးလွန်းနေသဖြင့် သင်္ဘောပေါ်ရှိ ဝန်ဆောင်မှုများသည်လည်း ဈေးကြီးမည်ဟုယူဆသောကြောင့်ဖြစ်သည်။ ထို့အပြင် သူ့မှာလည်း ဝယ်ယူစားသောက်ရန် ငွေကြေးအလုံအလောက်မရှိခြင်းကြောင့်ဖြစ်သည်။ ထိုသို့ တစ်နေ့ပြီးတစ်နေ့ အချိန်များကုန်ဆုံးလာရာ (၃)ရက်မြောက်သောနေ့၌ သူ့မိတ်ဆွေများသည် သူ့အား မသင်္ကာဖြစ်လာကြသည်။ “သူဘာလို့ ငါတို့နဲ့အတူ ထမင်းလိုက်မစားတာလဲ” ဟုဆိုကာ ထိုစစ်သား၏အခြေအနေကို လေ့လာရန်ဆုံးဖြတ်ခဲ့ကြသည်။ နောက်တစ်နေ့ထမင်းစားချိန်၌ “မနက်စာသွားစားကြမယ်” ဟုနှုတ်ဆက်ကာ သူတို့ထွက်လာပြီး အချိန်အနည်းငယ်ကြာမှ အခန်းထဲသို့ ပြန်လည်ဝင်ရောက်ကြည့်ရှုကြသောအခါ ထိုစစ်သားမှာ ပေါင်မုန့်ကြမ်းနှင့်ရေကိုသာ စားသောက်နေသည်ကို တွေ့မြင်ခဲ့ကြသည်။

ထိုအခါ ၎င်းစစ်သားအား “ဘာလို့ မုန့်နဲ့ရေကိုပဲ စားသောက်နေရတာလဲ” ဟုမေးရာ သူက ထမင်းဟင်းဝယ်စားရန် ပိုက်ဆံအလုံအလောက်မရှိကြောင်း၊ သင်္ဘောပေါ်ရှိ အစားအသောက်ဝန်ဆောင်မှုမှာလည်း ဈေးကြီးမည်ဖြစ်သောကြောင့် ဝယ်မစားနိုင်ခြင်းဖြစ်ကြောင်း ပြန်ဖြေခဲ့ပါသည်။ ဤသို့သိရသောအခါ ထိုစစ်သား၏မိတ်ဆွေ (၃) ဦးက သင်္ဘောပေါ်ရှိအစားအသောက်များ ဈေးကြီးသည်မှာမှန်သော်လည်း ထိုအစားအသောက်အားလုံးအတွက် သင်္ဘောလက်မှတ်ဝယ်ယူခဲ့စဉ်ကပင် ပေးချေခဲ့ပြီးဖြစ်ကြောင်း၊ နောက်ထပ်ပိုက်ဆံပေးရန်မလိုတော့ကြောင်း ရှင်းပြခဲ့ကြသည်။ ထိုအခါမှစစ်သားခင်ဗျာ နားလည်သွားပြီး သူ၏မိတ်ဆွေများနှင့် ပျော်ရွှင်စွာစားသောက်ကာ ခရီးဆက်ကြလေတော့သည်။

ဤသို့ပင် ချစ်သောမိတ်ဆွေ၊ မိဘ၊ ညီအစ်ကိုမောင်နှမတို့ ယနေ့ကျွန်ုပ်တို့သည် ထိုစစ်သားကဲ့သို့ပင် လက်မှတ်နှင့်အတူပါသော အခွင့်အလမ်းများ၊ ရပိုင်ခွင့်များကို သတိမမူ၊ နားမလည်ခြင်းကြောင့် ဒုက္ခရောက်နေတတ်ကြသည်။ ကျွန်ုပ်တို့၌ သင်္ဘောလက်မှတ်တည်းဟူသော ခရစ်တော်ကို ရရှိပိုင်ဆိုင်ထားကြပြီးဖြစ်ပါသည်။ ယေရှုခရစ်တော်နှင့်တွဲလျက်ပါလာသော အရာများစွာရှိပါသည်။ ဘုရားသခင်၏သားတော်ယေရှုကို ယုံကြည်သောသူတို့သည် ထိုအရာများကို ရရှိပိုင်ဆိုင်၊ ခံစားခွင့်ရရှိမည်ဖြစ်သည်။ ထို့ကြောင့် “ဘုရားသခင်၏သားတော်ကို ယုံကြည်သောသူ” ဟူသော နှုတ်ကပတ်တော်ခေါင်းစဉ်ဖြင့် ခွန်အားပေးသွားမည်ဖြစ်ပါသည်။