အသည်းရောင်အသားဝါ “စီ” ပိုးရောဂါအကြောင်းသိကောင်းစရာများ

ယေဘူယျအားဖြင့် စီပိုးဝင်ရောက်ခံရသူများတွင် ရက်၊လ အနည်းငယ်အတွင်း အသည်းရောင်ရောဂါ(Acute Hepatitis) ဖြစ်စေပြီး၊ ပျောက်ကင်းသွားသူများ ရှိသကဲ့သို့ အသည်းရောင် လက္ခဏာမပြ၊ ပိုးဝင်ခံရမှုမသိဘဲ နှစ်ပေါင်းအတန်ကြာမှ နာတာရှည်အသည်းရောင်ရောဂါ (Chronic Hepatitis)၊ အသည်းခြောက် (Cirrhosis)၊ အသည်းကင်ဆာ (Hepatocellular Carcinoma) များဖြစ်ပွားစေနိုင်သော ပိုးဖြစ်ပါသည်။ အသည်းရောင် စီပိုးစတင်ကူးစက်ဝင်ရောက်ပြီး ရောဂါလက္ခဏာ ပြရန်ကြာချိန်မှာ (၇–၈) ပတ်မှ (၆) လအထိကြာမြင့်လေ့ရှိပါသည်။ အသည်းအင်ဇိုင်း ALT(Alanine Aminotransferase) သည်လည်း မြင့်တက်နေပါသည်။ Anti HCVဟုခေါ်သော ပဋိပစ္စည်းမှာ ပိုးကူးစက်ခံရသူများ၏ သွေးထဲတွင် ‘စီပိုး‘ စတင်ဝင်ရောက်ပြီး (၁၂) ပတ်အကြာတွင် တွေ့ရှိနိုင်ပါသည်။ Anti HCV ခေါ် ပဋိပစ္စည်းသည် သွေးထဲတွင် တစ်ခါပေါ်ပြီးလျှင် အမြဲတမ်း ကျန်ရှိနေတော့မည် ဖြစ်သည်။

အသည်းရောင်စီပိုး စတင်ဝင်ရောက်ပြီးနောက် ရလဒ်နှစ်မျိုး ဖြစ်နိုင်ပါသည်။

၁။ စီပိုးဗိုင်းရပ်(စ်)ကို ခန္ဓာကိုယ်မှ အပြီးတိုင် သုတ်သင်ရှင်းလင်းနိုင်ပြီး ခန္ဓကိုယ်တွင်အသည်းရောင်စီပိုးမရှိတော့ခြင်း၊ (ဖြစ်နိုင်ချေ ၁၅–၃၀%)

၂။ခန္ဓာကိုယ်၏ ခုခံအားစနစ်မှ ဗိုင်းရပ်(စ်)ပိုးကို မသုတ်သင်မရှင်းလင်းနိုင်သောကြောင့် နာတာရှည် အသည်းရောင်စီပိုးအဖြစ် ကျန်ရစ်ခြင်းတို့ဖြစ်နိုင်သည်။ (ဖြစ်နိုင်ချေ ၇၀–၈၅%)